Popular Bible Verses from IBRANI 11

Share

Sin pengelan inah éh, uleu' ngelan mu'un adang uleu' omok alaa' éh kepelum lu' inah ngan jam éh pu'un kenat mu'un na' péh éh bé' jak omok ta'an lu'. Uban pengelan tepun lu' sahau Allah payoo' kenin tong réh.

Bé' kelunan omok ngepayoo' kenin Allah hun néh bé' ngelan tong Néh. Kelunan éh tavin Allah, tekep éh ngelan Allah pu'un ngan ngelan Iah omok mena' ngan irah éh mekat pitah Éh.

Uban neu' pengelan uleu' jam tana' ngan langit iteu' pu'un senuai Allah Neu' ha' Néh awah. Kekat-kekat éh ta'an lu' hun iteu' péh senuai Néh palaa' ha' Néh awah.

Neu' pengelan, Abraham kivu sohoo' Allah hun Allah nyohoo' éh piso tai tana' éh jah éh pejajii' Allah ngan néh. Hun néh piso bé' éh jam semah-semah éh juk tai nah. Neu' pengelan, Abraham mokoo' barei' kelunan éh tejeu' tong tana' éh pejajii' Allah ngan néh. Pu'un éh mokoo' tong lamin pai pemung ngan Ishak rawah Yakub, éh alaa' jajii' éh kua' jin Allah.

Neu' pengelan, Noh mihau ha' Allah éh bara' tong kekat éh juk pu'un éh bé' jak sakui ta'an néh, pu'un Noh kivu sohoo' Allah, ngan maneu' kapen ke' néh purip usah néh ngan pemanak néh. Tana' iteu' kenukum, bang Allah pepoléng Noh nah kelunan éh jian neu' pengelan néh.

Neu' pengelan, Henokh bé' matai. Bang iah pu'un netéé' ngan nihin tavin Allah. Bé' pu'un séé'-séé' na'at éh kepéh Uban néh lepah netéé' Allah. Lem surat Allah pu'un éh senurat, bé' jak Allah metéé' Henokh, pu'un éh ngepayoo' kenin Allah.

Neu' pengelan, Habel mena' pengena' éh pelapah jian jin pengena' Kain ngan Allah. Neu' pengelan Habel nah, inah Allah bara' kenin Habel nah pu'un teneng mu'un, uban pengena' néh nah pu'un éh ngepayoo' kenin Allah. Neu' pengelan néh inah, na' péh Habel nah lepah matai sahau, seleket néh pu'un pané ngan uleu' hun iteu' kepéh.

Neu' pengelan, Abraham omok pu'un anak na' péh éh lepah mukun ngan Sara péh mukun ngan nyalun. Pu'un Abraham ngelan tong ha' jajii' Allah bara' éh omok pu'un anak.

Kebit kenin néh mena Allah mihin éh mokoo' mu'un tong leboo' éh senuai Allah éh pu'un lihei' reken mu'un.

Uban neu' pengelan, Musa hun néh lepah ja'au usah, iah bé' kejeraa' kelunan mateng éh anak redo éh anak Raja' Mesir. Musa pulang keloo' keta pemung ngan irah éh pohoo' néh éh anah Allah, jin néh alaa' penyenang urip, maneu' penyala' éh metok awah. Musa peseruh pelapah jian iah teneng keta uban Kristus jin hun néh alaa' kekat pengekaya' tong tana' Mesir, uban Musa ngelan tong éh pejajii' Tuhan tong jaka' éh temurei' kepéh. Uban neu' pengelan, Musa kelap jin tana' Mesir ngan bé' medai rek raja'. Barei' hun néh pu'un na'at Allah éh bé' omok ta'an kelunan.

Neu' pengelan, Abraham sedia' mematai anak néh Ishak barei' jah pengena' ngan Allah, inah éh tovoo' Allah nesek kenin néh. Pu'un Allah mena' jajii' Néh ngan Abraham bang Abraham iah makang kivu sohoo' Allah dokoo' mematai anak néh éh jah de ke' inah.

Uban neu' pengelan, Rahab redo éh bavah inah, bé' teneng pematai pemung ngan irah éh ngelawan Allah. Uban iah alaa' rawah pohoo' Israel éh ngelong tana' inah ngan jian kenin.

Uban neu' pengelan, irah Israel makang papit baa' Banget bala pekua' hun réh lakau tong tana' awah. Bang hun irah Mesir tupat juk papit kepéh, bé' réh omok, irah matai menyet.

Uban neu' pengelan, irah Israel maneu' pagin tutuh leboo' Yerikho nah kuba' jin la'o réh lakau nutuh leboo' inah tujuu' dau kelebéé'.

Uban neu' pengelan, Musa nyohoo' irah Israel mematai anak domba ngan mosoo' dahaa' néh tong usit tapé réh dokoo' meliket patai bé' mematai anak tuken irah Israel.

Uban neu' pengelan, Yusup hun néh jam éh juk matai, inah maneu' éh bara' tong jalan Allah juk mihin kelunan Israel piso jin tana' Mesir. Iah kepéh bara' tong jalan réh mihin tulang néh hun mah réh piso.

Uban neu' pengelan, Yakub bara' tong jalan Allah juk maneu' jian ngan ayam néh éh anak Yusup, bé' jak éh matai. Pu'un éh madaa' bau sekot néh ngan seva' Allah.

Uban neu' pengelan, Ishak bara' tong jajii' Allah juk maneu' éh jian ngan Yakub rawah Esau.