Popular Bible Verses from Roma 1

Share

Lau ega laifa oma, gome iifa faunina Iesu Kristo fouga meagaina alapa'aua. Gome ega'ina auga Deo ega isapu, ke kai mo kai mo iifa faunina Iesu fouga ega'ina kepako'ania au'i, Deo isa kania'i ageagamauga. Ke Deo Iudea papiau'i kania'i ageagamau kakaua afegai kai, Iudea papiau'i laa'i au'i kania'i ageagamauga.

Gome iifa faunina Iesu fouga alogai, papiau Deo maagai alo opai au'i akemia auga epafokia. Ke Deo papiau epalagaini'i ke'ina e'i pako'a Iesu eegai keoge auga, ega koa mo agelao fuagai, isa Deo maagai alo opai au'i akemia. Ega'ina auga Deo ega iifa pukagai iina eifa oma koa i'opoga: “Deo maagai alo opai auga emia auga ega pako'ai ageagu aoniamo,” eoma.

Ke isa epakina'i efua laoma, gome Deo ega isapu akaiki'a ageka aoniamo auga, ke Deo egama mo egama, ke kai aga'o aeisaisa auga agofa'a epagama mo kinagai kapa ma'oai papiau epakina afe'aini'i. Ke papiau ma'o Deo kaisau auga kelogo efua. Ega puo kai aga'o Deo oko aelogo ageoma afaekaina.

Lau ega laifa oma, gome isa Deo oko kelogo mo ganinagai, isa Deo akeau afagaina, au akaiki'a akepamia, ke tenkiu akepenia. Kai isa opo'iai kapa aga'o afakepagama kapa'i au'i mo keopolani'i. Ke gua'i kapa'ina felo, o apala auga aelogo auga isa alo'i epa'uminania.

Ega'ina papiau'i auga Deo ega iifa ko'a ipauma auga pifogeai keoge pagainia. Ke Deo epagama kapa'i au'i mo keau afagaini'i, ke e'i pinauga kekapa. Kai isa ega koa fakekapa kai, Deo kapa ma'oai epagama'i auga fekeau afagaina aoniamo. Amen.

Deo ega iifa pukagai ega eifa oma, gome pako'a laa'i aisama, papiau Deo aina kainai akepea au'i, ke maagai alo opai au'i laa'i, e'i laomai apala'iai Deo ega iifa ko'a kekaisapua au'i, ufai Deo ega guakupu isa epakina'i.

Ega'ina puogai Deo isa epua'afuni'i meagai lao'i mai'i kemaani'i au'i mo kekapa'i. Ega'ina alogai isa epo'iai papie au'i au fou fekeamage auga laoga maina keoge pagainia kai, isa ifo'i papie mo papie mo fou kefeu. Ega koa i'opoga au isafa papie fou fekeamage fekeagu auga laoga maina kepua'afuga kai, ifo'i epo'iai aga'o aga'o fou fekefeu auga laoga maina alo'iai lo koa i'opoga eaga. Ke isa au mo au mo fou kefeu. Ke isa Deo maagai laomai apala'i ipauma'i kekapa'i. Ke isa e'i kelele afa fekeafia auga isa ifo'i kepenii'i efua koa i'opoga. Ega'ina mo laa'i kai, Deo ega iifa logo oko fekelogo auga keopolaga kapa aga'o laa'i keoma puo, Deo isa epua'afuni'i, ega koa Deo isa opola'i eumakalaina auga opolagai Isa maagai kapa'ina fakekapa eoma auga kekapa.

Ke isa ifo'i keifa ikifa au'i keoma kai isa kafo'o au'i kemia. Ega kainai isa Deo eague aoniamo auga ega akaiki'a keoge pagainia iisa i'oina kepamia, papiau aumauni afakeagu aoniamo, ke inei, ke a'o, ke gua'iai keku au'i koa i'opo'i kepamia.