Popular Bible Verses from Hibriyuhanen 4

Share

Uuyag is Lalag te Megbevayà ne zekelà is gehem din. Iring te sundang he zezuwa is gerangan din he utew meg̵arang, iyan, meg̵arang pa is Lalag te Megbevayà kenà haazà is sundang su edlembasan din minsan is isip ta, gehinawa ta, wey tuyù ta ne igkepetuenan din kenita ke hengkey is ked-isipa kenita te Megbevayà.

Ne tenged kandin, wazà igkelenew te isip tew te ked-uvey zutun te etuvangan te mekeg̵eg̵ehem he Megbevayà pinaag̵i te ked-ampù su utew velig̵eg̵awen is Megbevayà. Ingkehizu kiw zin ne edtevangan kiw zin dutun te timpu te menge kemereg̵enan.

Ne heini si Jesus is lavew he memumuhat tew, nesavut din is keg̵uyè tew tenged te kememenusiyai tew su neseg̵azan din he mibpenulayan sikandin dengan ni Setanas te minsan hengkey he paag̵i iring te ebpenulayan kiw zaan, iyan, wazà mulà sikandin mepenulayi.

Is Megbevayà, kenà sikandin egkeelesan te minsan hengkey. Egkeehè din layun is minsan hengkey he ed-ul-ulahan ta. Ne ke minsan hengkey is ed-ul-ulahan ta, iyan sikandin edsusi.

Ne tenged kayi, menge suled, edhemenan tew is kedtuu he impenurù kenitew. Su zuen utew lavew he memumuhat he iyan datù tew he nekid-etuvang en te Megbevayà. Iyan heini si Jesus he Anak te Megbevayà.

Umba, sikitew zaan, ebeelan tew is taman te egkehimu tew wey kiw zaan mekeseled dutun te edhimelayan he midteg̵ana te Megbevayà. Kenè tew ed-iringan haazà is menge etew zengan he wazà mebpemineg te Lalag te Megbevayà su wey wazà minsan sevaha kenitew he kenà ebmehimuwen he mekeseled dutun te edhimelayan.