Popular Bible Verses from KO ‘AISEA 43

Share

Vakai, ‘oku ou ngāue ki ha me‘a fo‘ou; na‘a mo ena ‘oku fisiki mai; ‘ikai ‘oku mou ‘ilo ki ai? ‘Ā, te u ‘ai ha hala ‘i he fonua maomaonganoa, ‘ani vaitafe ‘i he lala.

Ka ke ka ‘alu ‘i he vai, te u ‘iate koe; ‘io, ‘i he ngaahi vaitafe, ‘e ‘ikai te nau lōmekina koe: ka ke ka laka ‘i he afi, ‘e ‘ikai te ke mōfia; pea ‘e ‘ikai lave ‘a e vela ‘o e ulo.

‘Oua te mou manatu ki he ngaahi ‘uluaki me‘a, pea ko e ngaahi me‘a mu‘a ‘oua te mou tokanga ki ai.

KA ‘i he taimi ni ko eni ‘a e folofola ‘a Sihova, ‘a ia na‘a ne ngaohi koe, ‘e Sēkope, mo ia na‘a ne fa‘u koe, ‘e ‘Isileli: ‘Oua te ke manavahē, he kuo u huhu‘i koe; kuo u ui hingoa koe; ‘oku ‘o‘oku koe.

Hono kuo u mahu‘inga‘ia ‘iate koe; hono ‘oku ke tu‘utai, pea u ‘ofa kiate koe ‘e au, ko ia ‘oku ou ‘atu kakai ko ho fetongi, moni fa‘ahinga telia ho‘o mo‘ui.

He ko au Sihova ‘a ho ‘Otua, ko e Tāpuhā ‘o ‘Isileli, ‘a ho Fakamo‘ui; kuo u tuku ‘a ‘Isipite ko e totongi ‘o ho huhu‘i, ‘a Kusa mo Sapa ko ho fetongi.

‘Oua te ke manavahē; he ‘oku ou ‘iate koe ‘e au; te u ‘omi ho hako mei hahake, pea te u tānaki koe mei lulunga

Ko au, ko au pē ia ‘oku ou tāmate‘i ho‘o ngaahi angahala, koe‘uhi pē ko au; pea ko ho‘o ngaahi hia ‘e ‘ikai te u manatua.

Ko kimoutolu ‘a e kau fakamo‘oni ‘a‘aku–ko Sihova ia mei he Ta‘ehāmai–mo e sevāniti ‘a‘aku kuo u fili: koe‘uhi ke mou ‘ilo au, mo tui mai, ‘o mahino kiate kimoutolu ko au ia; na‘e ‘ikai ha ‘Otua ‘e fa‘u ‘i mu‘a ‘iate au, pea hili au ‘e ‘ikai.

Ko au, ko au pē ‘a Sihova; pea ka tuku au, ‘oku ‘ikai ha taha ‘oku fai fakamo‘ui.

Tala atu, mei he ‘aho ni ‘o fai atu, ko au ia; pea ‘oku ‘ikai ha taha ‘e fakahaofi mei hoku nima: ‘oku ou ala ke fai, pea ko hai ‘e ta‘ofi mai?

‘E fakahīkihiki‘i au ‘e he manu ‘o e vao, ‘a e fanga siakali mo ‘ositalesi: koe‘uhi ko ‘eku tuku ‘ani vai ‘i he fonua maomaonganoa, ‘ani vaitafe ‘i he lala, ke inu ai ‘eku kakai, ‘eku pele: ko e kakai kuo u ngaohi ma‘aku, te nau ‘a‘au hoku fakamālō.

te u fekau ki he tokelau, Tuku mai; pea ki he tonga, ‘Oua ‘e ta‘ofi; ‘omi hoku ngaahi foha mei he mama‘o na, mo hoku ngaahi ‘ōfefine mei he ngata‘anga ‘o māmani; ‘a ia kotoa ‘oku ui‘aki hoku hingoa; he kuo u fakatupu ia mōku fakalāngilangi‘i; kuo u fa‘u ia; ‘io, kuo u ngaohi.

Ko e folofola eni ‘a Sihova, ‘a ia ‘oku ne tuku ha hala ‘i he tahi, mo e founga ‘i he vai‘oho; ‘oku ne fakahā‘ele atu ‘a e sāliote mo e hoosi, ‘a e kongakau mo e helo–‘oku nau fetākoto‘i fakataha, ‘oku ‘ikai ha‘anau toe tu‘u hake; ‘oku lolomi kinautolu, ‘oku nau mate hangē ko e filo ‘o e maama.

Ko au Sihova ia ko homou Tāpuhā, ko au ia na‘e fakatupu ‘a ‘Isileli, ko homou tu‘i.