Popular Bible Verses from Kalētiá 6

Share

Ka ‘oua na‘a ta fiu ‘i he failelei, he te ta utu ‘i hono fa‘ahita‘u, ‘o kapau ‘e ‘ikai te ta vaivai.

Pea kapau ko ia, pea lolotonga ‘oku ta faingamālie, ta ngāue ‘aonga ki he kakai kotoa pē: kae lahi pē kiate kinautolu ‘oku ‘i he fāmili ‘o e lotu.

Mou fetoutou fefua‘aki homou ngaahi mafasia‘anga: pea ‘i ho‘omou fai pehē, kuo mou ‘osiki ‘aupito ‘a e lao ‘a Kalaisi.

‘Oua na‘a tuku ke fakahala‘i kimoutolu: tala‘ehai ‘oku ala pā‘usi‘i ‘a e ‘Otua; he ‘ilonga pē e me‘a ‘oku tō ‘e ha tangata, ko ia ia te ne utu foki.

He ko ia ‘oku ne tō ‘i hono kakano, te ne utu mei he kakano ‘a e ‘auha: ka ko ia ‘oku ne tō ‘i he laumālie, te ne utu mei he laumālie ‘a e mo‘ui ta‘engata.

KĀINGA, neongo pē ‘e puke nima ha taha lolotonga ‘ene fai ha kovi; ka ko kimoutolu, ‘a e kau fakalaumālie, mou faito‘o ki ha taha pehē ‘o anga fakaalaala; pea ke vakai kiate koe na‘a ‘iloange ‘e ‘ahi‘ahi‘i mo koe foki.

Seuke, kapau ‘oku ‘afungi ‘e ha taha ko ha me‘a ia; ‘osi, ‘oku ‘ikai ko ha momo‘i me‘a ia, ‘oku fakahala‘i ia ‘e hono loto. Ka ke takitaha sivi ‘ene ngāue ‘a‘ana; pea te ne toki fakafuofua ‘aki ia pē hono pōlepole‘anga, ‘o ‘ikai ‘aki ha taha kehe: koe‘uhi kuo pau ke takitaha fua ‘ene kavenga ‘a‘ana.