Popular Bible Verses from KO ‘ISIKELI 1

Share

Pea u fakasio, pea tā ko e ‘ahiohio ‘ena ‘oku ha‘u mei he potu tokelau, ko e fu‘u ‘ao, mo e afi ‘oku fetakai‘aki; pea na‘e ‘ai ha maama ki ai takatakai, pea ko e uho‘i afi na‘e hangē ko e hā ‘a e ukamea ‘afu vela ‘i he loto afi. Pea ‘i he loto me‘a na‘e ‘ilonga mai ha Faa‘i Me‘a Mo‘ui. Pea ko ‘enau hā mai na‘e peheni; ko ‘enau fotu mai na‘e ngali ko e tangata. Pea na‘e taki fā honau fofonga, pea na‘e taki fā honau kapakau. Pea ko honau va‘e ko e va‘e tu‘u ‘ete; pea ko honau ‘ulu‘uluva‘e na‘e hangē ko e ‘ulu‘ulu-va‘e ‘o e kafi: pea na‘e fetapatapaki hangē ko e palasa ‘afu hina. Pea ko e nima ‘o e tangata na‘e hā mei he lalo kapakau ‘i honau fa‘ahi ‘e fā takitaha: pea na‘e ma‘u ‘a e fā takitaha ‘a e ngaahi fofonga mo e ngaahi kapakau. Na‘e felave ‘a e kapakau ‘o e taha mo e kapakau ‘o e taha: na‘e ‘ikai te nau tafoki ‘i he‘enau ‘alu; na‘a nau hanga ‘alu ‘aki honau fofonga ‘e taha.

Pea ko e tatau ‘o honau mata ko e mata ‘o e tangata; pea mei to‘omata‘u na‘e ma‘u ‘e he Toko Fā ‘a e mata ‘o e laione; pea ma‘u ‘e he Toko Fā ‘i to‘ohema ‘a e mata ‘o e pulu; pea ma‘u ‘e he Toko Fā ‘a e mata ‘o e ‘īkale. Pea ko honau ngaahi mata mo honau ngaahi kapakau na‘e māvahevahe mei ‘olunga; na‘a nau takitaha ha kapakau ‘e ua na‘e felave, pea takitaha ha kapakau ‘e ua na‘e fufū ‘aki honau sino.