Popular Bible Verses from KOHELETI 2

Share

He ko e tangata ‘oku ne lelei‘ia ai, ‘oku foaki ‘e he ‘Afio ki ai ‘a e poto mo e ‘ilo mo e fiefia: ka ki he angahala ‘oku foaki ‘e ‘Elohimi ‘a e fakaongosia; ke ne tānaki mo fokotu‘utu‘u ke ‘ange kiate ia ‘oku lelei‘ia ai ‘a ‘Ene ‘Afio. Ko e muna mo ia foki, mo e kai matangi.

‘Oku ‘ikai ha lelei ‘i he nofo, ka ko ‘ete kai pē mo inu, mo fafanga ‘aki hoku loto ‘a e lelei ‘oku ma‘u ‘i he‘ete ngāue. Na‘a mo ia na‘a ku vakai ‘oku meia ‘Elohimi pē. He ko hai te ne lava ke kai, pea ko hai te ne lava ke ongo‘i mālie, ‘o ‘atā mei He‘ene ‘Afio?

Pea u toki hanga ki he me‘a kehekehe kuo fai ‘e hoku nima, mo e ngāue kuo u fakafitefita‘a ke fai, pea tā ko e muna pē hono kotoa mo e kai matangi, pea ‘ikai hano fua ‘i he lalo la‘ā.

Pea neongo pe ko e hā na‘e holi ki ai ‘a hoku mata, na‘e ‘ikai te u ta‘ofi mei ai; na‘e ‘ikai te u fakafisi ki hoku loto ha momo‘i fiefia ‘e taha: seuke, na‘e ma‘u fiefia ‘e hoku loto mei he‘eku ngāue kotoa; ‘io, ko hoku ‘inasi ia mei he‘eku ngaahi ngāue kehekehe.

Pea u vakai ‘oku hulu ‘a e poto ‘i he fakasesele hangē ‘oku hulu ‘a e maama la‘ā ‘i he po‘uli

ko e ongo fo‘i mata ‘o e poto ‘oku ‘i hono ‘ulu, ka ko e fakasesele ‘oku ha‘ele ‘i he po‘uli: ka na‘e e‘a kiate au foki ‘oku ai ha iku‘anga pē taha kiate kinaua ‘osi pē.

He ‘oku ai ha tangata, ‘a ia ko ‘ene ngāue na‘e fai poto, pea na‘e fai ‘ilo pea na‘e fai ke mafai; ka te ne tuku ia ki ha tangata na‘e ‘ikai te ne ngāue ki ai mōno tofi‘a. Ko e muna mo ia foki mo e kovi lahi.