Popular Bible Verses from फिलिप्‍पी 2

Share

स्‍वार्थपूर्ण अभिलाषा सँ वा अपना केँ किछु बनयबाक लेल कोनो काज नहि करू, बल्‍कि नम्र भऽ कऽ दोसर केँ अपना सँ श्रेष्‍ठ मानू। अहाँ सभ मे सँ प्रत्‍येक लोक अपनेटा नहि, बल्‍कि दोसरो लोकक हितक ध्‍यान राखू।

अहाँ सभ वैह भावना राखू जे मसीह यीशु मे छलनि

ओ वास्‍तव मे परमेश्‍वर छलाह, मुदा तैयो ओ परमेश्‍वरक तुल्‍य रहबाक अधिकार केँ पकड़ने रहऽ वला वस्‍तु नहि बुझलनि। तकरा बदला मे ओ अपन सभ किछु त्‍यागि देलनि आ दासक स्‍वरूप धारण कऽ मनुष्‍य बनि गेलाह। एहि तरहेँ मनुष्‍यक रूप मे रहि कऽ ओ अपना केँ विनम्र बनौलनि आ एतऽ तक आज्ञाकारी बनलाह जे मृत्‍यु, हँ, क्रूस परक मृत्‍यु सेहो, स्‍वीकार कयलनि।

किएक तँ परमेश्‍वर अपने अहाँ सभ मे काज करैत अपन प्रसन्‍नताक अनुसार चलबाक इच्‍छा आ क्षमता दूनू प्रदान करैत छथि।

एहि कारणेँ परमेश्‍वर हुनका सभ सँ ऊँच स्‍थान पर राखि अति महान्‌ कयलनि आ हुनका ओ नाम प्रदान कयलनि जे सभ नाम सँ श्रेष्‍ठ अछि, जाहि सँ यीशुक नाम सुनैत प्रत्‍येक प्राणी ठेहुनिया देअय, चाहे ओ स्‍वर्ग मे वा पृथ्‍वी पर वा पृथ्‍वीक नीचाँ रहऽ वला होअय, और पिता परमेश्‍वरक गुणगान मे प्रत्‍येक प्राणी अपना मुँह सँ स्‍वीकार करय जे यीशु मसीह प्रभु छथि।

अहाँ सभ जे किछु करब से बिनु कुड़बुड़ा कऽ आ बिना विवाद मे पड़ि कऽ करू, जाहि सँ अहाँ सभ निर्दोष आ निष्‍कपट होइ और जीवन देबऽ वला सुसमाचार पर अटल रहि कऽ एहि बेइमान आ भ्रष्‍ट पीढ़ीक बीच परमेश्‍वरक निष्‍कलंक सन्‍तान भऽ संसार मे इजोत बनि कऽ चमकी। एहि तरहेँ हम मसीहक अयबाक दिन मे एहि बात पर गौरव कऽ सकब जे हमर भाग-दौड़ आ परिश्रम कयनाइ व्‍यर्थ नहि भेल।

एहि लेल, यौ हमर प्रिय मित्र लोकनि, जाहि तरहेँ अहाँ सभ हरदम आज्ञा पालन करैत आयल छी, तहिना आब सेहो हमर उपस्‍थिति सँ बेसी हमर अनुपस्‍थिति मे पालन करैत रहू। डेराइत-कँपैत ओहन काज करैत रहू जे परमेश्‍वर सँ पाओल अपन उद्धार सँ उत्‍पन्‍न होअय।