Popular Bible Verses from Mar. 13

Share

Kebensihan kaw te keditaan te otaw tandà te pegpesakop niyo diyà kanak. Meneng aw tomayod kaw te kedita te kelimahan, ipelowà kaw.”

Keilangan gayed kaw megpeketagad, so wedà niyo ketegahi aw eden eldawi se pegketoman niyan.

Aw ibingen kaw doton te otaw meg-okom kenyo, ikà niyo egketetana aw eden se ikegiyen niyo kandan. Dalem te aldaw sìyan, begayan kaw te kebiyasa amon meketaba kaw kandan, so kenà lekat te kenyo kebiyasa se ikegiyen niyo, meneng lekat iyan te Espiritu Santo.

Doen temanan te langit aw tanà, meneng gayed metoman se kagi ko te wedad temanan.”

“Meneng eked ko indani aw eden eldawi aw orasi se peglikò ko. Wedad palos netaga-taga aw kano a likò, pengkey menge anghil doton te langit, so olò Amay ko se netaga-taga kenyan.

Aw domineg kaw te doen gira aw menge samok, ikà niyo egkelemitan. Keilangan onà iyan meinang, meneng kenà pa niyan se temanan te keneyonan.

Yan se doun te keilangan gayed kaw megpeketagad, so wedà niyo ketegahi aw eden orasi se peglikò te Pengolo niyo, atok te pegsallep te aldaw, atok megtengà te delem, atok eked pa libtak se aldaw, atok iselem. Yan se doun te keilangan gayed kaw megpeketagad, so aw lomikò a te wedà kaw pa peketagad, kitaen ko sikiyo timedogi pa. Se impunù ko kenyo seini, yan se ipunù ko heman diyà te kedita te otaw, te keilangan megpeketagad se teg sebad-sebad otaw.”

Medita se otaw meggira, so doen pongan megbolaw diyà te doma pongan, aw doen heman menge sakop te sebad selotan megbolaw diyà te menge sakop te doma selotan. Megelà se otaw te medita ogpeanan tandà te linog aw bayil domateng diyà kandan. Pengkey medaet iyan, meneng yan olò se keteboan te kelimahan domateng dini te keneyonan, iling te keteboan te mesakit domateng te bayi agpet tebawan.

Keilangan onà itoladà se Mèpiya Indan diyà te kedita te otaw te eked pa dateng se temanan te keneyonan.

Doen kwani medita otaw megpelingo-lingo te insogò ko dan. Mikagi dan te sikandan se Misiyas, aw medita se otaw keekalan dan aw tomaking kandan.

“Meneng peg-ahà kaw, so ibingen kaw te doma otaw doton te howis, aw bedasen kaw dan kidoen te menge simbahan te Judiyo. Ipeibing kaw doton te menge gobirnador aw selotan tandà te pegpesakop niyo diyà kanak, amon mekeindan kaw te kebenalan tepad kanak diyà kandan.

so doen menge otaw domateng megpelingo-lingo te sikandan se Misiyas aw menge telekeliwat te kagi te Timanem. Meg-inang dan heman te menge kepelahan amon keekalan dan peden heman se menge otaw pinemallì te Timanem.

“Aw mepenga se kelimahan sìyan, megkengitngit se keneyonan, so eked ebey senang se aldaw aw bolan. Medagdag heman se menge bitoen lekat te langit, so mebilit se kedita dan.