Popular Bible Verses from SARAY PROBIRBIO 3

Share

Manmatalek ka ed KATAWAN diad intiron pusom. Ag ka manmamatalek ed dilin pakatalus mo. Diad amin a gawaen mo nunot mo lawas so KATAWAN, et iwanwan to kad maptek a dalan.

Ag mon balut ipapasen a makabat ka nen say peteg a kakabatan mo; takotan moy KATAWAN, tan ag ka mangagaway kaogsan.

Pagalangan moy KATAWAN diad panamegley na pangibagat mod sikato na sankaabigan a bungay dalin mo. No onyay gawaen mo, napano na ilik iray kamalir mo, tan nawalaan ka na alak a diad karakel to et ag mo nisinup ya amin.

Ag mo ikakaindan so katotoluk tan say inkatoor. Isinger mo rad beklew mo tan isulat mo rad pusom.

Anak ko, ag mo luludlureyen so panametek na KATAWAN; ipasen mon sakey a pasakbay ed sika. Say KATAWAN pepeteken to ray inaro to, a singa pamepetek na ama ed anak ton ikikinon to.

Anak ko, ag mo lilingwanan so ibabangat kod sika. Nunot mo lawas iray ganggan kod sika. Say bangat ko et itdan to ka na andokey tan maaligwas a bilay.

Maliket so toon magmaliw a makabat, say toon nawalaan na pakatalus. Dakel niy nagonggonam ed kakabatan nen say diad pilak; mabli ni nen say balituk so kakabatan. Say kakabatan mabli ni nen saray alahas; ag nayarin ipara ed antokaman a labay mon nakayaryan.

No nayarian mo, manggawa kay kamaungan ed saray mankaukolan.

Lapud kakabatan na KATAWAN pinalsa to so mundo; lapud pakatalus to inlira to so tawen.