Popular Bible Verses from Ecclesiastes 5

Share

E ka agad mangaku king Dios; misip kang banayad bayu ka gawang pangaku king Dios. Atyu banua ing Dios at ika atyu ka king yatu, inya e mu sasabian itang e mu agyung daptan.

Ing balang taung dininan nang pibandian ning Dios at oportunidad gamitan na king kusuelu na, magpasalamat ya at ita ing sukat nang daptan king bunga na ning kapagalan na. Iti regalu na ning Dios at telaga na.

E ya kakabsi ing sakim king salapi at e ya tutula ing magpakabandi king tubu na. Iti munaman alang kabaldugan.

Mimingat ka sana neng lulub ka king bale na ning Dios. Mas mayap ing munta ka karin ban makiramdam kesa king balamu mangmang kang babie ain-sakripisyu, uling e na balu ning mangmang ing ustu ila ning e ustu.

Tuparan mung agad itang pengaku mu king Dios uling e ya tutula karing mangmang. Tuparan mu itang pengaku mu.

Mas mayap ing e ka gagawang pangaku kesa king mangaku ka at kaybat e mu naman tuparan.

Maniaman ya tudtud ing taung mapagal king obra, mabsi ya o ali ya. Oneng e ya man mipapaiglip ing taung mabandi uli na ning kaiisip na king pibandian na.

Nung makananu tamung alang darala inyang linto tamu keti king yatu, makanyan ta ya munamang lakuan a alang darala. Ala tamung bitasang idala ketang pipagalan tamu.