Popular Bible Verses from 1 ᑲᕒᐃᑎᔭᓇᒃ 12

Share

ᐁᑕᓱᐯᔑᑯᒡ ᐊᐎᔭ ᐃᔑᒦᓈ ᑫᑰᓐ ᑭᔐᒪᓂᑑ ᐅᑕᒑᑾᓐ ᐁᓈᑯᑑᓂᒡ ᐅᑎᔑᐊᔮᐎᓂᓂ᙮ ᒦᑕᔥ ᑲᑭᓇ ᐊᐎᔭ ᒋᐅᒋᒥᓄᓭᐙᒡ᙮

ᑮᓇᐙ ᑳᑕᔑᔦᒃ ᒦ ᐃᐌᓂ ᐅᐐᔭᐤ X᙮ ᐁᑕᓱᐯᔑᑯᔦᒃ ᑭᑑᒋᑎᐯᑖᑯᓯᒻ ᒦ ᐃᒫ X ᐅᐐᔭᐎᕽ ᑳᑕᓱᐃᔑᓈᑯᓯᔦᒃ᙮

ᐊᐲ ᑯ ᐁᒪᒋᓭᒃ ᐯᔑᒃ ᐸᑫᓯᐎᓐ, ᒦ ᐯᔑᑾᓐ ᐃᑯ ᑲᑭᓇ ᐸᑫᓯᐎᓇᓐ ᐐᒋ ᐃᓇᒪᒋᐅᑏᒪᑲᓅᓐ᙮ ᐯᔑᒃ ᐃᑕᔥ ᑲᔦ ᑭᒋ ᐃᓀᒋᑳᑌᒃ ᐸᑫᓯᐎᓐ, ᒦ ᐯᔑᑾᓐ ᐃᑯ ᑲᑭᓇ ᐁᔑᒫᒪᐎ ᒌᑫᑕᒨᒪᑲᑭᓐ᙮

ᐊᐊ ᐯᔑᒃ ᐅᒦᓂᑰᓐ ᑭᔐᒪᓂᑑᓐ ᐅᑕᒑᑯᓂ ᒥᓄᑭᑫᒋᑫᐎᓂᕽ ᒋᐃᔑᑮᔗᒡ᙮ ᒦᓇᐙ ᐯᔑᒃ ᐸᔭᑌᓂᓯᑐᑕᒧᐎᓐ ᐅᒦᓂᑰᓐ ᐃᓂ ᐯᔑᑾᓐ ᐊᒑᑾᓐ ᒋᐃᔑᑮᔗᒡ᙮ ᒦᓇᐙ ᐯᔑᒃ ᐊᐎᔭ ᑭᒋᑌᐺᑕᒧᐎᓐ ᐅᒦᓂᑰᓐ ᐅᓄ ᐯᔑᑾᓐ ᐊᒑᑾᓐ, ᔑᑾ ᐸᑳᓐ ᐊᐎᔭ ᒥᓄᐊᔮᐃᐌᐎᓇᓐ ᐅᒦᓂᑰᓐ ᐅᓄ ᐯᔑᑾᓐ ᐊᒑᑾᓐ᙮ ᒦᓇᐙ ᑕᔥ ᐯᔑᒃ ᒋᑲᔥᑭᑑᒡ ᒫᒪᑳᒋᒋᑫᐎᓇᓐ ᐃᔑᒦᓈ, ᒦᓇᐙ ᐯᔑᒃ ᑭᔐᒪᓂᑑᓐ ᒋᑲᓅᑕᒪᐙᒡ ᐃᔑᒦᓈ᙮ ᒦᓇᐙ ᑕᔥ ᐯᔑᒃ ᒋᓂᓯᑖᐌᔦᑕᕽ ᐁᑎᓄᐗᓂᓂᑭᓐ ᐃᓂ ᒦᓂᑰᐎᓇᓐ, ᑮᔥᐱᓐ ᑌᐺ ᑭᔐᒪᓂᑑᓐ ᐅᑕᒑᑯᓂ ᐁᐅᒌᒪᑲᓂᓂᑴᓐ ᑫᒫ ᑳᐐᓐ᙮ ᔑᑾ ᒦᓇᐙ ᐯᔑᒃ ᐯᐸᑳᓐ ᐃᔑᑮᔗᐎᓇᓐ ᐃᔑᒦᓈ, ᐯᔑᒃ ᐃᑕᔥ ᑲᔦ ᐃᔑᒦᓈ ᒋᐋᓂᑲᓅᑕᕽ ᐃᓂ ᐃᔑᑮᔗᐎᓇᓐ᙮

ᒦᑕᔥ ᐃᐃ ᑲᑭᓇ ᐅᓄ ᐁᓇᓄᑮᒡ ᐊᐌ ᑳᐯᔑᑯᒡ ᐊᒑᒃ ᒫᒦᓈᒡ ᑲᑭᓇ ᐊᐎᔭᐞ, ᐐᓐ ᐃᑯ ᐁᓀᑕᕽ᙮

ᒦ ᐃᐌ ᐁᓀᑖᑾᒃ ᐁᑳ ᐸᑫᐎᓂᑎᐎᓐ ᒋᐊᔮᒪᑲᓯᓄᒃ ᐐᔭᐎᒫᕽ, ᑲᑭᓇ ᑕᔥ ᑳᐯᐸᑳᓇᑎᑭᓐ ᐃᔑᓈᑯᓯᐎᓇᓐ ᐯᔑᑾᓐ ᐃᑯ ᒋᐃᔑᓈᑲᒋᐃᑏᒪᑲᑭᓐ᙮

ᐃᓇᔥᑫ ᐯᐸᑳᓐ ᑎᓄᐗᓅᓐ ᐊᒑᑯᐎ ᒦᓂᑰᐎᓇᓐ, ᒦᑕᔥ ᐁᑕ ᑭᔐᒪᓂᑑ ᐅᑕᒑᑾᓐ ᐁᔑᐯᔑᑯᓂᒡ ᑳᐅᓇᐆᔑᐌᓂᒡ᙮ ᐯᐸᑳᓐ ᑲᔦ ᑎᓄᐗᓅᓐ ᐁᔑᐸᒦᑖᑫᐙᒡ ᐊᐎᔭᒃ, ᒦᔥ ᐁᑕ ᑳᑎᐯᒋᑫᒡ ᐁᔑᐯᔑᑯᒡ ᑳᐊᓄᑮᑕᐎᓐᒡ᙮ ᔑᑾ ᐯᐸᑳᓐ ᑎᓄᐗᓅᓐ ᐁᔑᑲᔥᑭᑑᐙᒡ ᐊᐎᔭᒃ ᐅᑕᓄᑮᐎᓂᐙᓐ, ᒦᑕᔥ ᐁᑕ ᐊᐌ ᑭᔐᒪᓂᑑ ᐁᔑᐯᔑᑯᒡ ᐁᔑᐊᓄᑮᒡ ᐁᑕᓱᐯᔑᑯᓂᒡ ᐅᐱᒫᑎᓯᐎᓂᓃᕽ ᑲᑭᓇ ᑫᑰᓐ ᒋᑲᔥᑭᑑᓂᒡ᙮

ᐃᐃᒫ ᑕᔥ ᐁᔑᒫᐗᒋᐃᑎᐙᒡ ᐅᑌᐺᑕᒨᒃ ᑲᑭᓇ ᐊᐎᔭᐞ ᑭᔐᒪᓂᑑ ᐅᑮᐃᓇᓵᐞ ᑫᐅᒋᑎᐯᑖᑯᓯᓂᒡ᙮ ᓂᑕᒻ ᐅᑮᐃᓇᓵᐞ ᐃᔑᓂᔕᐙᑲᓇᐞ ᒋᓃᑳᓀᑖᑯᓯᓂᒡ᙮ ᒦᓇᐙ ᑕᔥ ᐅᑎᐹᒋᒨᐞ ᑳᑲᓅᒋᑫᑕᒫᑯᒡ ᐅᑮᐃᓇᓵᐞ ᒋᐋᓂᑫ ᓃᑳᓀᑖᑯᓯᓂᒡ᙮ ᒦᑕᔥ ᒦᓇᐙ ᐅᑭᑭᓄᐊᒫᑫᐞ ᐅᑮᐃᓇᓵᐞ ᒋᐊᓂᐋᓂᑫ ᓃᑳᓀᑖᑯᓯᓂᒡ᙮ ᒦᑕᔥ ᐃᒫ ᐁᓂᐋᓂᑲᐎᔥᑳᑫᐙᒡ ᑳᒫᒪᑳᒋᒋᑫᐙᒡ, ᒦᓇᐙ ᑕᔥ ᐃᑭ ᑳᔑᒦᓂᑰᐎᓯᐙᒡ ᒋᒥᓄᔭᔮᐃᐌᐙᒡ ᑲᔦ ᑳᐐᒋᐃᐌᐙᒡ, ᒦᓇᐙ ᑕᔥ ᐋᓂᑕ ᑳᓃᑳᓂᓰᑲᑖᑫᐙᒡ ᐃᓇᓵᐗᒃ, ᑲᔦ ᐯᐸᑳᓐ ᐃᔑᑮᔗᐎᓇᓐ ᑳᒦᓂᑣ᙮

ᐃᓇᔥᑫ ᐋᓃᔥ ᐅᐌ ᐐᔭᐎᒫ ᐁᔑᓈᑾᒃ ᑳᐐᓐ ᒥᒋᐯᔑᑯᓈᑾᓯᓅᓐ, ᐹᑏᓇᑎᓅᓐ ᐅᔕ ᐅᒫ ᑳᑕᓱᐃᔑᓈᑯᓯᕽ᙮

ᑳᐐᓐ ᐃᐃ ᑕᐃᓀᑖᑾᓯᓅᓐ᙮ ᓇᐗᒡ ᐃᑕᔥ ᐐᓐ ᑭᑖᐸᑕᓅᓐ ᐃᓂ ᑫᑰᓇᓐ ᐐᔭᐎᒫᕽ ᑳᐗᑫᐎᓈᑾᑭᓐ᙮

ᐃᓇᔥᑫ ᑮᔥᐱᓐ ᒥᓯᐌ ᐅᔥᑮᔑᑯᐗᑭᐸᓐ ᐃᐃ ᐐᔭᐎᒫ, ᐋᓃᑎ ᑫᐅᒋᓅᑕᒨᒪᑲᑭᐸᓐ? ᒥᓯᐌᔥ ᑲᔦ ᐅᑕᐗᑳᐗᑭᐸᓐ, ᐋᑎ ᑫᑮᐅᒋ ᒥᓈᒋᑫᒪᑲᑭᐸᓐ? ᐐᓐ ᐃᑕᔥ ᐐᓐ ᐊᐊ ᑭᔐᒪᓂᑑ ᐁᑕᓱᐯᔑᒃ ᐅᑮᒫᒪᐎᑑᓇᓐ ᐃᓂ ᑳᐯᐸᑳᓇᑎᓂᓂᑭᓐ ᑳᑕᓱᐃᔑᓈᑯᓯᕽ ᒋᐯᔑᑾᓂᓂᒃ ᐃᐃ ᐐᔭᐤ, ᐐᓐ ᐃᑯ ᐁᐃᔑᐅᓀᑕᕽ᙮ ᑮᔥᐱᓐ ᐁᑕ ᐯᔑᑯᐊᔮᒃ ᐃᐌ ᐸᑫᓯᐎᓐ ᑳᐐᓐ ᐐᔭᐎᒫ ᑕᐃᔑᓈᑾᓯᓅᓐ᙮