Popular Bible Verses from Esaya 53

Share

Lelo kwena ni pa mulandu wa bumpulamafunde bwesu ecalengele ukuti bamucenaule ifyo, ni pa mulandu wa bubifi bwesu ecalengele ukuti bamupumaule ifyo. Ukulimunwa kwakwe ekwalenga ukuti ifwe tuleikala umutende, impumo shakwe eshalenga ukuti ifwe tuleundapwa.

Bonsefye ifwe twali nge mpaanga ishaluba, bonse umo umo twailefye ciyeyeye mu nshila shesu. Yawe nao epakuposa ifyabubifi fyesu fyonse pali ena.

“Cine cine alibuulile amacushi ayo twali nokuposwamo nifwe. Alisendele ubukali ubo ifwe twali nokumfwa. Ifwe twatilefye ni Lesa eumuleteele aya macushi no bulanda, pakuti amulimune.

Ifwe twalimusuulile, tatwamuposeleko na mano nakalya. Aliculile no kumfwa ubukali. Ifwe twalimusuulishe icakuti tatwalefwaya na kumulolesha, pantu tatwalemutunga pa buntu kabili tatwamucindike.

“Balemutintanya, balemucusha, lelo ena tasoseleko nangu ukulandako nakalya. Ali ngo mwana wa mpaanga uubafye tondolo ilyo balemutwala kukumwipaya, ali nge mpaanga iyibafye iyanakilila ilyo kabeya aleibeya, awe nao tewakulandako no kulanda nakalya.

“Kwena ni Yawe ewafwaile umubomfi wakwe afwantwe no kucula icibi, epakuti ukufwa kwakwe kube ilambo ilyakufuta pa bubifi. Kabili akamona ubufyashi bwakwe no kutantalisha inshiku shakwe, kabili ukufwaya kwakwa Yawe kukalenga ifyo apekanya filecitikafye bwino.

Ala ni Yawe umwine ewafwaile ukuti umubomfi wakwe akulile pa cinso cakwe, ngo muti uuteku uwalulembelya, uwalimbwa apauma ndi, apo imishila yauko ilepula mu mushili pakwanda. Talemoneka uwacindama nangu uwayemba icakuti ifwe tumuposeko amano. Takwetepo busuma bwakumoneka ubwakuti ifwe tulekonkelelako.

E mulandu wine na ine nkamutekela apacindama pakati ka bacindami. Akaakana ne mpalume conse icatapwa. Pantu umwine ewaipeeleshe kukufwa, kabili apendelwe pa mulongo wa bampulamafunde. Lelo ewasendele ifyabubifi fya bengi, no kubapapatilako pali bumpulamafunde bwabo.”

Epakuti amacushi yakwe yonse nga yapwa mu mweo wakwe akasansamuka nakabili. Akashininkisha ukuti kanshi taculilefye apafye. Ni mukwishiba emo umubomfi wandi umulungami akalungamikila abengi, kabili akasenda ne fibi fyabo fyonse.

Balimwikete mu lufyengo, bamupeela umulandu, bamupingula no kumwipaya. Tapali nangu umo uwa mu nkulo yakwe uwasakameneko kufyo balemucita, ilyo bamulofya ukufuma mu calo ca bamweo, tapali abatile, ‘Ni pa mulandu wa bumpulamafunde bwesu epo afyengelwa.’

Bapekenye inshinshi yakwe pamo pene ne ntalamisoka, ena epakushiikwa mu nshinshi ya mukankala, nangu kwena ashatalile acitapo ulufyengo nelyo lumo, nangufye ukulanda ubufi mu kanwa kakwe.