To bairo cʉ̃ cá-áto Felipe cʉ̃ ca-tʉjʉyupʉ. Cʉ̃ ca-tʉjʉrona Espíritu Santo oco bairo cʉ̃ ca-ĩiñupʉ:
—I coro tʉ̃garica corore emʉña. Emʉri ti coro tʉacãpʉ aácʉja.
To bairo cʉ̃ ca-ĩiro Felipe ca-atʉ emʉñupʉ. Emʉ, caballo cʉ̃ ca-tʉ̃gari coropʉ ca-jañaʉ cʉ̃ ca-buerijere ca-apiyupʉ. Isaía tirʉmʉpʉ macacʉ Dio Wadarique cʉ̃ ca-ucariquere ca-bueyupʉ. To bairo cʉ̃ ca-buerijere api:
—¿Mʉ ca-buerijere mʉ api majití? cʉ̃ ca-ĩi jeniñañupʉ Felipe.
To bairo cʉ̃ ca-ĩiro:
—Yʉ api majiqueti majuucõa, yʉre ca-majioʉ cʉgoquetibacʉ. Baiyupa, yʉ mena adʉja. Atopʉ eja jãaña, Felipere cʉ̃ ca-ĩiñupʉ yua.