Popular Bible Verses from Matthew 6

Share

Mes kyns oll hwilewgh gwlaskor Duw ha'y ewnder, hag oll an taklow ma a vydh res dhywgh maga ta.

Na vedhewgh ytho prederus a'n vorow, rag an vorow a breder anedhi hy honan; lowr dhe'n jydh yw y dhrog ev y honan.

‘Rakhenna my a lever dhywgh, na wrewgh mos yn prederow a-dro dh'agas bewnans pandr'a dhebrowgh na pandr'a evowgh, na byth moy a-dro dh'agas korf pandr'a wiskowgh. A nyns yw bewnans moy ages boes, ha'n korf ages dillas?

Mes ty pan byssi, ke a-ji dhe'th chambour ha wosa degea dha dharas, gwra pysi dhe'th Tas usi yn-dann gel, ha'th Tas a wel yn-dann gel a attal dhis.

‘Yn kettellma ytho, gwrewgh pysi: Agan Tas ni eus y'n nevow, sanshes re bo dha hanow; re dheffo dha wlaskor; dha vodh re bo gwrys, yn nor kepar hag yn nev.

Ro dhyn ni hedhyw agan bara pub-dydhyek

ha gav dhyn agan kendonow kepar dell evyn ni ynwedh dh'agan kendonoryon.

Ha na wra agan dri yn temptasyon, mes delirv ni dhiworth drog.

Rag mara kwrewgh gava dhe dus aga hammwriansow, agas Tas a nev a wra gava dhy'hwi ynwedh

Mirewgh orth ydhyn an ayr: ny wrons i gonis has na mysi na kuntell travyth yn skiberyow, hwath agas Tas a nev a's mag. A nyns owgh hwi moy agas pris agessa i?

‘Na guntellewgh dhywgh agas honan tresoryow war an nor, le may ma goedhan ha gossen ow tiswul ha may hwra ladron terri a-bervedh ha ladra. Mes kuntellewgh dhywgh tresoryow yn nev, le na wra goedhan na gossen diswul, na ladron terri a-bervedh ha ladra; rag le may ma agas tresor, ena y fydh agas kolonn ynwedh.

‘Ny yll denvyth servya dew vester; rag poken ev a gas an eyl ha kara y gila, po lel yw dhe'n eyl hag ev a dhispres y gila. Ny yllowgh servya ha Duw ha mammon.

Ytho mar kweth Duw yndella gwels an gwelyow, yw bew hedhyw ha tewlys yn forn a-vorow, a ny wra ev meur dhe voy agas kwetha hwi, A hwi a voghes fydh?

Mes ty pan rylli dha alusen, na as dha leuv gledh dhe wodhvos pandr'a wra dha leuv dhyghow, rag may fo dha alusen yn-dann gel; ha'th Tas neb a wel yn-dann gel a attal dhis.

‘Gwaytyewgh na wryllowgh agas oberow da a-rag tus rag bos gwelys gansa; poken ny'gas bydh gober vyth dhiworth agas Tas eus y'n nevow.

‘Ha pan wryllowgh penys heb dybri, na vedhewgh avel an falswesyon, trist aga semlans, rag i a dhifas aga bejeth may hallons bos gwelys gans tus, i dhe wul penys; yn hwir y lavarav dhywgh, i re's teva aga gober. Mes ty pan wrylli penys, gwra ura dha benn ha golgh dha fas, ma na vo apert dhe dus ty dhe wul penys, saw dhe'th Tas, usi yn-dann gel; ha'th Tas neb a wel yn-dann gel a attal dhis.