Popular Bible Verses from Fakahā 19

Share

Ke tau fiefia mo hākailangitau mo fakavīkiviki‘i e ‘Otuá! He ko e ‘aho eni e ta‘ane ‘a e Lamí, pea kuo maau ‘a e fefine malí.

Na‘e tohi ‘i hono alangá mo hono pulupulú e hingoa “Ko e Tu‘i ‘o e ngaahi tu‘i mo e ‘Eiki e ngaahi ‘eiki.”

Na‘á ku toe sio kuo ava mai e langí, pea ‘oku ‘asi mai ha hoosi tea. Ko e hingoa ‘o e toko taha na‘e heka aí ko Falala‘anga mo Mo‘oni, he ‘oku faitotonu ‘ene fakamāú mo ‘ene taú.

Na‘e hangē ‘a hono ongo fofongá ko ha ongo ulo‘i afí, pea lahi e ngaahi kalauni na‘á ne ‘ai. Na‘e tohi ‘i hono sinó ha hingoa, ka ko ia toko taha pē na‘e mahino ki ai ‘a hono ‘uhingá. Ko hono teungá na‘e pani toto, pea ko hono hingoá “Ko Folofola ‘a e ‘Otuá.”

Na‘e ha‘u ha heletā māsila mei hono ngutú ‘o taa‘i e ngaahi pule‘angá. Te ne pule‘i‘aki kinautolu ha tokotoko ukamea, pea te ne tāmoloki ke ‘osi e toenga kālepi e houhau ‘o e ‘Otua māfimafí mei he fale ngaohi‘anga uainé.

Ka na‘e puke pōpula e manu fekaí pea mo e palōfita loí, ‘a ia na‘á ne fai mana ma‘á e manu fekaí kae lava ke ne lohiaki‘i e kakai kotoa pē kuo ‘ai ‘iate kinautolu e faka‘ilonga ‘o e manu fekaí mo lotu ki hono ‘īmisí. Pea na‘e toki lī mo‘ui pē ‘a e manu fekaí mo e palōfita loí ki he fu‘u ano afi sūlifa kakahá