Popular Bible Verses from 1 Tīmote 2

Share

‘Oku toko taha pē ‘a e ‘Otuá, pea ko Kalaisi Sīsū pē te ne lava ‘o fakaa‘u kitautolu ki he ‘Otuá. Ko e tangata mo‘oni ‘a Sīsū, peá ne foaki ‘ene mo‘uí ke fakahaofi ‘a kitautolu kotoa pē. Ko e ‘Otuá pē na‘á ne fakahā mai eni, ‘i he ‘aho na‘e tokateu ki aí.

‘Uluakí, ‘oku ou tapou atu ke ke lotu ma‘á e kakai kotoa pē. Kole ki he ‘Otuá ke ne tokoni‘i mo tāpuaki‘i kinautolu, peá ke fakahā kiate ia ‘a e hounga‘ia ho lotó koe‘uhi ko kinautolu tāutaha. Hūfia ‘a ha‘a tu‘i mo kinautolu kotoa ‘a e kau taki mā‘olungá, hei‘ilo te tau lava ai ‘o fai ‘etau lotu ki he ‘Otuá ‘i he funga ‘o e nofo melino mo fe‘ofo‘ofani.

‘Oku ou kole atu, kāinga, ke fai ho‘omou lotú, ‘o hiki hake homou nimá ‘i he loto-ma‘a, ‘o ‘ikai ‘i he ‘ita mo e feke‘ike‘i. Pea ko ‘eku faka‘amu ki he kakai fefiné, ke fai fakapotopoto ‘enau teuteú mo e ngaohi honau ‘ulú. ‘Oua mu‘a te nau kofu‘aki ha ngaahi kofu totongi mamafa, pe me‘a teuteu koula mo siliva mo mata‘itofe. Ko e teunga faka‘ofo‘ofa taha ‘o e kakai fefiné ‘a e fie tokoni ki he kakai kehé.