ПошукіУзор

Бог ведае цябе. Ён ужо прачытаў твае думкі. Па завяршэньні гэтага ўроку ты можаш парэзаць на малыя кавалачкі твой дзёньнік або спаліць яго на попел, але тым часам — гэта сапраўдны ты з сапраўдным Валадаром сусьвету. Ёсьць нешта такое, чаго ты прагнеш болей чым адказаў. Табе хочацца адкрыцьця. Ты быў створаны дзеля яго. І я таксама.

Наогул навошта Богу задаваць чалавеку пытаньні, на якія Ён ужо ведае адказы? Магчыма, аднаго дня Ён патлумачыць гэта, але зноў ды зноў Сьвятое Пісьмо намякае вось на што: Бог, наш Стваральнік, Збаўца ды Кароль, жадае ўзаемадзеяньня са сваім дарагім стварэньнем, нягледзячы на ўсе нашыя кволасьці, сумневы ды памылкі. І ня проста ўзаемадзеяньня. Ён жадае ўдзелу. І ня проста ўдзелу. Ён жадае блізкасьці.

З табой. Ня з тым чалавекам, якім табе хочацца быць, і ня з тым, якім ты прыкідваесься быць перад іншымі. З табой.

Прачытай Быцьцё 1:26-2:17 ды 3:1-9, заўважаючы — магчыма, падкрэсьліваючы - кожны верш, які зьмяшчае словы, што Бог накіраваў беспасярэдне да Адама. Што Бог спытаўся ў Быцьці 3:9?

А зараз памяняйся месцамі з Адамам ды дазволь, каб Божы праніклівы позірк упаў на цябе. Дзе ты? Табе трэба некуды ісьці, але ўсякая правільная дарога да твайго месца прызначэньня пачынаецца з твайго цяперашняга месца знаходжаньня. У тваім дзёньніку напішы Богу, дакладна апісваючы, дзе ты знаходзісься ў тваім жыцьці. Калі ты знаходзісься ў даволі добрым месцы, дык так Яму й напішы. Будзь канкрэтным, нібыта ты пішаш нейкаму чалавеку, які сапраўды дбае пра цябе і парадуецца з табой. І наадварот, магчыма, што ты знаходзісься ў аднастайным становішчы альбо ў вельмі важным, балючым ды самотным.

Напішы Богу пра тое, дзе ты знаходзісься, з поўнай свабодай слова. Ты, напэўна, знаходзісься ў складаным становішчы, якое нельга апісаць адным прыметнікам. Дык раскажы Яму пра ўсе складанасьці.

Шчыра кажучы, магчыма, табе карцець задаць Богу тое ж самае пытаньне: “Госпадзе, дзе Ты? Дзе Ты падзеўся апошнім часам?” або “Дзе Ты быў, калі…?” Можа быць, ты ведаеш адказ біблійна або тэалягічна. Твая галава ведае біблійныя абяцаньні аб тым, што Ён ніколі не адступіць ад цябе і не пакіне цябе, але тваё сэрца цяпер адчувае, што Ён некуды зьнік. Ты сапраўды можаш спытацца Яго, дзе Ён ёсьць або (калі тое тычыцца мінулае пары) дзе Ён быў.

Закончы сёньняшні запіс у дзёньніку Псальмай 138:7-10 - можаш пазычыць дакладныя словы псальміста або запісаць ягоныя выразы ўласнымі словамі.