Перапоўнена маімі дабраславеннямі (Частка 5)Узор

Я ўжо ўзгадвала тыя дні, калі я ішла па доўгай дарозе да паштовай скрыні з думкай збегчы ад штодзённай руціны. Я прагнула чыстай асалоды ад размовы з дарослымі людзьмі, вострых адчуванняў ад таго, што ўсе спрэчкі і канфлікты засталіся за маёй спінай, або задавальнення ад простай магчымасці пайсці адной у прыбіральню! Ну, разумееш, калі маленькія пальчыкі не прасоўваюцца праз дзверы, і ніхто з дзяцей не крычыць, каб ты спяшалася, бо яны страшэнна галодныя. Так, ты разумееш.

У некаторыя дні мае думкі аб тым, каб уцячы, былі выкліканыя не маімі эгаістычнымі жаданнямі і марамі аб больш простым жыцці, а маім перакананнем, што нехта іншы лепей падыдзе для таго, каб клапаціцца аб маёй сям'і. Страта самакантролю, павышэнне голасу, дрэнныя адносіны з мужам і гарманальныя збоі - усё гэта пераконвала мяне, што маёй сям'і будзе лепей без мяне. Яны заслугоўваюць некага лепшага.

Я ніколі не ўцякала па-сапраўднаму, але я дастаткова доўга песціла гэтыя думкі, каб не раз скаціцца ўніз па цёмнай спіралі пагарды і нянавісці да сябе.

Недахоп сну, колькасць спраў, якія немагчыма выканаць адной і узровень шуму ў нашай хаце могуць спрыяць узнікненню такіх змрочных думак. Калі мы не будзем уважлівымі, то апынёмся ў бяздоннай яме адчаю, жадаючы "выхаду" з нашага сённяшняга жыцця. Ты разумееш. Гэта не рэдкасць сярод мам.

Як мы можам змагацца з гэтымі адчайнымі думкамі?

СПЫНІЦЬ іх. Заставайся са мной. Па-першае, проста спыніся. Кропка. Не рабі нічога. Не прадпрымай ніякіх дзеянняў. Не звані нікому. Не хвалюйся. Спыніся!

Стрымлівайгэтыя думкі, вазьмі іх у палон. Неадкладна! Спыні іх да таго, пакуль яны не захопяць цябе, значна перабольшваючы тое, што адбываецца на самай справе. Мы надзвычай здольныя ў тым, каб дазваляць нашым думкам прывесці нас у найгоршае месца з магчымых. Ты маеш у сабе жывую Божую сілу, якая дае табе здольнасць спыніць гэтыя думкі.

Слухайся. Рабі свае думкі паслухмянымі Слову Божаму. Прымяняй Ягоную сілу для сваіх абставін і думак. Успамінай месцы Пісання, якія супрацьстаяць негатыўным думкам. Працягні руку і папрасі каго-небудзь дапамагчы табе з ісцінамі, каб супрацьстаяць хлусні, або паглыбляйся ў Слова Божае. Хутка ўспомні пра свае адносіны с Ісусам, памятаючы, што ты Ягоная дачка, і твае паводзіны не павінны кіравацца адмоўнымі прыкладамі.

Складзісвае думкі і абставіны каля ног Ісуса, чакаючы з даверам, што Ён усё робіць табе на карысць і для Сваёй славы, нават, калі гэта падаецца немагчымым.

СССС! Спыніся, стрымлівай, слухайся, складзі. Помні аб гэтых 4 "С", калі ты будзеш спускацца па тупіковай дарозе негатыву, абмежаванасці і адчаю. Ты можаш пераадолець гэты адчай!

Ойча, я прызнаю, што я была на гэтай дарозе шмат разоў. Часам, мне падаецца, што жыццё занадта складанае, і я знаходжуся не ў тым месцы не з тымі людзьмі і раблю не тое. Дапамажы мне СПЫНІЦЬ усе негатыўныя стэрэатыпныя думкі, ведаючы што Ты змясціў мяне менавіта ў гэты час у гісторыі, менавіта з гэтымі людзьмі, якія дапамогуць мне стаць такой, якой Ты хочаш мяне бачыць, нават калі я раблю усё няправільна. Я хачу выбраць трываласць і прайсці праз цяжкія часы. Я выбіраю СПЫНІЦЬ гэтыя думкі, давяраючы Табе усе мае абставіны і людзей. Я з надзеяй чакаю пабачыць Тваю працу ў сабе. Тваю цярплівасць да мяне немагчыма зразумець. Я дзякую Табе за Тваю любоў і ласку - менавіта для мяне!

Паразважайце над гэтымі месцамі Пісання.