Навошта нам Вялікдзень?Узор

Навошта нам Ісус?

Мы з табой былі створаныя дзеля таго, каб жыць у адносінах з Богам. Пакуль мы не наладзім тых адносінаў, нам будзе заўжды нечага бракаваць. У выніку, мы часта сьведамыя гэтае хібы. Адзін рок музыкант апісаў гэта так: “Маю пустку глыбока ўнутры.”

Адна кабета ў сваім лісьце да мяне напісала пра “вельмі глыбокую пустэчу”. Іншая дзяўчына распавяла пра “кавалак, якога бракуе ў ейнай душы.”

Людзі спрабуюць запоўніць гэтую пустэчу па-рознаму. Некаторыя спрабуюць запоўніць яе грашыма, але тое не прыносіць задавальненьня. Арыстоцель Анасіс, які быў адным з найбагецейшых людзей у сьвеце, напрыканцы свайго жыцьця сказаў наступнае: “Мільёны не заўсёды зьяўляюцца раўназначнымі таму, што чалавеку трэба ад жыцьця.”

Іншыя спрабуюць наркотыкі альбо алькаголь або сэксуальную непераборлівасьць. Адна дзяўчына сказала мне: “Гэтыя рэчы прыносяць хуткае задавальненьне, але пасьля ты адчуваеш сябе пустым. Ёсьць і такія, хто спрабуюць цяжкую працу, музыку, спорт або пошукі посьпеху. Магчыма, у гэтых рэчах няма нічога благога, але яны не наталяюць голаду, які кожны чалавек мае ўнутры сябе.

Нават найбольш блізкія чалавечыя адносіны, якімі цудоўнымі яны б ні былі, не заспакойваюць гэтае “пустэчы глыбока ўнутры.” Нічога не запоўніць гэтае дзіркі, акрамя адносінаў з Богам, дзеля якіх мы й былі створаныя.

Паводле Новага Запавету, прычынай гэтае пустэчы ёсьць тое, што мужчыны й жанчыны пакінулі Бога.

Ісус сказаў: “Я ёсьць хлеб жыцьця” (Яна 6:35). Адно Ён здолее наталіць наш наймацнейшы голад, бо менавіта празь Яго нашыя адносіны з Богам могуць быць адноўленыя.

А) Ён наталяе наш голад сэнсу й мэты ў жыцьці

Мы знаходзім праўдзівы сэнс жыцьця ды нашае прызначэньне толькі праз адносіны з нашым Творцам.

Б) Ён наталяе наш голад жыцьця пасьля сьмерці

Бальшыня людзей ня хоча паміраць. Мы прагнем жыць пасьля сьмерці. Толькі ў Ісусе Хрысьце мы знаходзім вечнае жыцьцё.

В) Ён наталяе наш голад прабачэньня

Калі мы будзем шчырымі, то нам прыйдзецца прызнацца, што ўсе мы робім няправільныя рэчы. Праз Сваю сьмерць на крыжы Ісус зрабіў магчымым для нас атрымаць прабачэньне й аднавіць адносіны з Богам.