Божы плян для твайго жыцьцяУзор

Тры няпісаныя правілы плянаваньня

Уяві сабе наступнае: Ты купіў навюткую кашулю й ня можаш дачакацца, абы толькі апрануць яе ў школу, бо ты дакладна ведаеш, што гэта як раз тая самая рэч, якая прымусіць гэнага прыгожанькага хлопца або дзяўчыну заўважыць цябе. Ты плянуеш тваё адзеньне й абутак і ўпэўніваешся, што ўсё выдатна падыходзіць адно да аднаго. Падчас абеду здараецца катастрофа: ты паліваеш кетчупам усю тваю новую кашулю - і як раз тады, калі асоба, у якую ты закаханы ўжо цэлую вечнасьць, падыходзіць да твайго стала.

Часам, жыцьцё ня йдзе паводле плянаў.

У Бібліі ёсьць гісторыя пра чалавека, якога звалі Гедэён. Ён ня толькі паходзіў з найслабейшага кляну Манасіінага племя, але й быў найслабейшым чалавекам у сваёй сям’і. Было мала праўдападобна, што Бог абраў бы менавіта яго. Празь нейкі час Бог павёў Гедэёна ў бітву супраць Мадыяніцянаў, варожага племя, якое мела 38 000 ваяроў. Потым Бог сказаў Гедэёну, што ў яго было зашмат ваяроў, і калі яны паразяць Мадыяніцянаў, дык будзе выглядаць, што яны зрабілі тое ўласнымі сіламі. Таму Гедэён адправіў 20 000 чалавек дахаты. Але Бог сказаў, што ўсё адно было зашмат. Гэтак у Гедэёна засталося толькі 300 чалавек. Госпад даў Гедэёну ды Ізраілю перамогу над Мадыяніцянамі з усяго толькі 300 ваякамі - і гэта дакладна не было чымсьці такім, што Гедэён першапачаткова заплянаваў.

Разважаючы пра будучыню й пра тое, што Бог падрыхтаваў дзеля нас, важна памятаць, што рэчы не заўсёды будуць ісьці так, як мы іх плянуем.

Насамрэч, існуюць тры няпісаныя правілы плянаваньня, якіх ты мусіш прытрымлівацца:

1.) Плянуй пачынаць нанова. Жыцьцё - гэта шэраг новых пачаткаў. Як толькі ты сканчаеш пачатковую школу, трэба ісьці ў сярэднюю. Як толькі ты ўпэўнены, што ведаеш усё аб сярэдняй школе, трэба пачынаць рыхтавацца да ўнівэрсытэту й быць сапраўдным дарослым. Насамрэч, гэта ніколі не сканчаецца. Навучыся пачынаць нанова. Калі пляны зьмяняюцца, прыстасоўвайся да новых абставінаў. Хто ведае, што хоча зрабіць Бог. Прымі тую пару жыцьця, у якой ты цяпер знаходзішся.

2.) Плянуй казаць “не”. Часам трэба сказаць “не” добрым рэчам, каб сказаць “так” найлепшым рэчам. Мы ня здолеем рабіць усё. Прасі ў Бога мудрасьці ведаць, куды ты павінен інвэставаць твой час, каб зрабіць як мага больш дзеля Божага Валадарства.

3.)<3> Плянуй праяўляць фантазію. Часам, Божыя пляны могуць накіраваць нас у нечаканыя месцы. Гедэёну прыйшлося выкарыстаць тое, што ён меў - гліняныя збаны зь сьвяцільнямі - заміж звычайнае зброі. Карыстайся здольнасьцямі, якія Бог даў табе сёньня. Не зайздросьць людзям, якія маюць іншыя здольнасьці. Зразумей, што з Божаю дапамогаю тое, што Ён даў табе, здолее прынесьці больш карысьці, чым ты сабе ўяўляеш.