Божы плян для твайго жыцьцяУзор

Божы плян для твайго жыцьця датычыцца больш таго, кім ты ёсьць, чым таго, што ты робіш.

Што рабіць?

Ты, напэўна, часта задаеш гэтае пытаньне, асабліва калі табе трэба прыняць рашэньне аб нечым надзвычай важным, напрыклад, у які ўнівэрсытэт паступіць або якую прафэсію абраць.

Амаль такое самае пытаньне задаў Ісусу адзін рэлігійны кіраўнік у Бібліі: “Якая запаведзь найбольшая ў законе?” (Мацьвея 22:36) Інакш кажучы: “Што мне рабіць?”

У наступным вершы мы чытаем Ісусаў адказ: “Любі Госпада, Бога твайго, усім сэрцам тваім, і ўсёю душою тваёю, і ўсім разуменьнем тваім. Гэта ёсьць першая й найбольшая запаведзь. Другая ж падобная да яе: “Любі блізкага свайго, як самога сябе”. (Мацьвея 22:37-39).

Калі мы хочам даведацца, які ёсьць Божы плян для нашага жыцьця, то можам пачаць з гэтых дзьвюх рэчаў, што Ісус сказаў нам рабіць:

1.) Любіць Бога.

2.) Любіць іншых.

Ты, напэўна, разважаеш: “Усё гэта цудоўна, але як даведацца, куды паступіць вучыцца або якую прафэсію абраць?”

Слушнае пытаньне. Вось добрая навіна: калі ты ідзеш за Ісусам і атачаеш сябе багабойнымі людзьмі, то Сьвяты Дух дапаможа табе вырашыць.

Магчыма, што ты выбіраеш паміж двума аднолькава добрымі ўнівэрсытэтамі, і ты ня ведаеш, куды Бог хоча, каб ты паступіў. Вярнемся да таго, што Ісус сказаў раней наконт дзьвюх найбольшых запаведзяў: любіць Бога ды любіць іншых. Ці ты можаш любіць Бога й любіць іншых людзей у абодвух унівэрсытэтах? Калі ты адказаў “так”, дык няма розьніцы, які абярэш. Бог можа выкарыстаць цябе хоць у якім месцы.

Калі справа тычыцца будучых рашэньняў, то Бог не заўсёды дае нам канкрэтныя адказы накшталт “так” або “не”. Тое можа бянтэжыць, але дае шмат свабоды, калі ты разумееш, што Божы плян для твайго жыцьця датычыцца больш таго, кім ты ёсьць, чым таго, што ты робіш.

Ці гэта азначае, што мы можам проста прымаць усе рашэньні самі й жыць, як нам заўгодна? Вядома, што не! Мы не заўсёды ведаем Божую волю, але мы заўсёды можам ісьці Божымі шляхамі. Што тое азначае? Яно азначае, што нават калі мы ня ведаем, што нас чакае ў недалёкай будучыні, то мы можам працягваць слухацца Бога ў тым, да чаго Ён заклікае нас “цяперака”: ісьці за Ім, жыць сумленна, слухацца й паважаць нашых бацькоў ды кіраўнікоў, і любіць усіх людзей, якіх Бог пасылае ў нашае жыцьцё.

І вось найлепшая частка: калі мы йдзем за Мэсіям, то Ён дае нам мудрасьць Сваім Сьвятым Духам (1 Карынцянаў 2:12-13), Ён абнаўляе нашыя думкі (Рымлянаў 12:2), і дапамагае нам засяроджвацца на правільных рэчах. Калі мы атачаем сябе мудрымі людзьмі (Прыповесьці 13:20), то яны таксама дапамогуць нам прыняць правільныя рашэньні. І, вядома, адзін з найлепшых спосабаў здабыць мудрасьць - гэта праз малітву. Якава 1:5 кажа, што калі мы просім у Бога мудрасьці, то Ён абавязкова нам яе дасьць!