DIE WAGKAMERVoorbeeld

Dag #1: Ja, wag is aaklig.

Kan ek maar net eerlik wees?

Wag is moeilik.
Wag is ongemaklik.
Wag voel soos vermorste tyd.

Daar is sekere plekke waarheen ek nie meer gaan nie omdat ek nie daarvan hou om in rye te wag nie. Soos pretparke! Ek is mal oor ’n lekker tuimeltreinrit, maar om in die ry te wag? Nee dankie. Ek is mal oor strooikoeke. Maar die ry? Geen kans nie. Die kos mag wonderlik wees, die ritte onvergeetlik, maar om vir ’n uur stil te staan, net om iets vir twee minute te geniet? Ek los dit liewer.

Kan jy hiermee identifiseer? Hierdie ongeduld wys ook op ander plekke in ons lewens.

Toe ek aan hierdie dagstuk werk, het ek van my vriende en klasmaats gevra: “Waarvoor wag jy?”

Sommige het gesê hulle wag op liefde … ’n huweliksmaat, iemand om die lewe mee te deel.
Sommige wag op genesing … fisiek, emosioneel of in ’n verhouding.
Ander wag op rigting … “Wat nou, Here?” ’n Werk? ’n Roeping?
Ander wag vir vryheid … die einde van ’n hofsaak, ’n finansiële deurbraak.

Tog, in die pyn en onsekerheid, spreek God.

“Goed is die Here vir hulle wat op Hom wag, vir die mens wat na Hom soek”
— Klaagliedere 3:25 (AFR20).

Hierdie woorde kom uit ’n boek vol rou. Klaagliedere is geskryf ná die verwoesting van Jerusalem. Die mense was omring deur verlies, en tog vind die skrywer ’n vaste grond: God is nog steeds goed. Veral vir dié wat op Hom wag.

God sien die wagkamer waarin jy sit. Hy weet waarvoor jy gebid het, waarvoor jy gehuil en gevra het. Hy straf jou nie deur jou te laat wag nie. Hy berei iets voor. Iets goeds.

Maar hier is die waarheid: wag is nie passief nie. Volgens hierdie vers is wag om aktief te soek. Dis om nader te trek, selfs wanneer jy wil onttrek.

Dit maak nie saak hoe lank die ry voel of hoe moeg jy word om te hoop nie, onthou: God is nog steeds goed. En Hy is die wag werd.

Ek wil jou aanmoedig om in die Woord gewortel te bly.

Wag kan ons emosies laat deurmekaar raak as ons nie in die Woord van God gewortel is nie. Die Skrif het ’n manier om ons te herfokus.

Probeer dit:

· Lees elke oggend of aand ’n psalm (begin by Psalm 27, 37 of 42).

Want ons weet:“... 'n Mens leef nie net van brood nie, maar van elke woord wat uit die mond van God kom” (Matteus 4:4).

GEBED:

Dankie Vader, dat U ons sien. Dankie dat U in hierdie tyd naby is en nie ver nie. Dankie dat U ons hand vashou terwyl ons in die wagkamer sit.

U Woord sê U is goed vir dié wat op U wag.
Vandag neem ons U dus op u Woord.
Selfs al sien ons geen beweging nie, sal ons U bly soek.
Selfs in die stilte, sal ons glo dat U steeds praat.
Selfs wanneer die wag eindeloos voel, sal ons vertrou dat U iets voorberei wat ons nog nie verstaan nie.

Gee ons die genade om te volhard.
Gee ons geloof om te glo.
Anker ons in u goedheid wanneer ons wil twyfel.
Bowenal, leer ons om U lief te hê net vir Wie U is.

In die Naam van Jesus,
Amen.