’N Dankbare Hart

Dag 1 van 5 • Vandag se leesstuk

Bybeldagboek

“Maak ’n dankbaarheidsfles”

God vra dankbaarheid van sy kinders. Ook dat sy Blye Boodskap in sy volheid in ons sal bly. 

’n Facebookinskrywing van 2014 vra dat ons aan die einde van elke dag ons gelukkigste oomblik van daardie spesifieke dag op ’n papiertjie sal neerskryf, dit klein sal opvou en in ’n fles sal bewaar. Doen dit élke dag van die nuwe jaar, selfs op rillerdae, want ook ’n rillerdag behoort ten minste een gelukkige oomblik te hê.

Indien jy ’n dag sonder enige blydskapsoomblik beleef, skep vir jouself een voor die einde van daardie dag. Kyk na foto’s van jou kinders of kleinkinders, lees ’n gedig, bel ’n vriendin of sit ’n rukkie by jou man.

Wanneer dit dan weer regtig baie sleg met jou gaan, kan jy net jou hand in jou dankbaarheidsfles steek en ’n vreugdeoomblik daaruit haal om te herlees – en om God voor te dank.

GEBED: Here, daar is so baie vreugdeoomblik in my lewe, so baie dinge waarvoor ek U kan loof en dank dat my eie dankbaarheidsfles elke dag oorloop. Help my om u boodskap met my lewe uit te dra. Amen.

 

Hierdie oordenking is geneem uit GESKENK VAN GENADE deur Nina Smit. Besoek www.cumbooks.co.za vir meer inligting.