Hoop wat kaalvoet loopVoorbeeld

“Gló God kan!” So lank as wat ’n mens hoop, kan jy vorentoe beweeg – ongeag die realiteite van jou situasie. Want hoop gee jou die moed om een tree voor die ander te sit. Die feit is, daar is áltyd rede vir hoop. Want daar is altyd ’n môre – ’n môre waarin ons Vader ook sal wees. Dalk bring môre nie alles waarop jy gehoop het nie … of miskien het jy môre van voor af rede om in jouself en ander mense te twyfel. Een ding is egter waar: Jy aanbid ’n onwankelbare God. Dit maak nie saak hoe ver jy geval het, hoe groot jou probleme is, hoe uitsigloos jou situasie lyk nie, jy kán blý hoop. Want jy aanbid ’n God wat tot enigiets in staat is; wat mure kan afbreek én in ’n oogwink herbou, wat reddelose mense met liefde kan omvou en wat enige gewillige mens op die pad van oorwinning kán lei. GEDAGTE VIR DIE DAG: Geloof is as’t ware hoop in aksie. Dis om onwrikbaar te wéét dat jy van die plek waar jy nou is, vorentoe kan beweeg omdat God in jou volgende tree is. GEBED: Vader-van-hoop, ek vertrou U met my lewe. Amen. Hierdie oordenking is geneem uit HOOP WAT KAALVOET LOOP deur Milanie Vosloo © Christelike Uitgewersmaatskappy.