Krag Vir Elke Dag Voorbeeld

Hy kom na jou in jou twyfel

Tomas was nie teenwoordig by die eerste verskyning van Jesus nie. Daarom het hy gesukkel om Jesus se opstandingstorie te glo. Toe Jesus agt dae later weer aan sy dissipels verskyn, stap Hy dadelik na Tomas en sê vir hom om sy hande op sy wonde te plaas. Op daardie oomblik verander alles in Tomas. Nie alleen sien en voel hy nie. Hy beleef ook dat sy Here sy ongeloof raakgesien het en hom nie veroordeel het nie. 

’n Mens kan nogal met Tomas se twyfel identifiseer. Ons logika wil mos maar kan “sien” en bewyse hê. Weet vandag dat jou Here ook jou soms-twyfel raaksien en dan in jou ongeloof na jou toe kom om sy hand van liefde weer vir jou te gee.

God veroordeel nie twyfelaars nie. Hy sien hulle met oë van deernis en vergifnis raak en gee Homself dan wéér aan hulle. Hoe groot is sy onvoorwaardelike genade!

Vandag kan ek maar net sê: “My Here en my God.”