Moenie Vir Die Vyand ’N Plek Aan Jou Tafel Gee NieVoorbeeld

Die pad na oorwinning

Kan jy sien waar jy wil hê jou siel moet wees? Is jy in beheer van jou gedagtes, gesindheid en optrede? Leef jy die lewe wat God vir jou bedoel het? Dalk het die vyand jou oortuig dat jy vassit. Hy het dít reggekry deur homself tuis te maak aan jou tafel, maar jy hoef hom nie vir ’n oomblik langer te laat bly nie. Deur Christus kan jy oorgaan tot ’n plek van oorwinning in jou lewe.

Dit gebeur wanneer jy leer om die stryd in jou gedagtes te wen. Oorwinning gaan daaroor om die saad wat in jou gedagtes gestrooi is, te ondersoek en dit nie te laat wortelskiet nie. Voordat die waarheid jou kan vrymaak, moet jy raaksien dat leuens jou gevange hou. Vra die Heilige Gees om aan jou te openbaar watter leuens jy glo. As vrees, bekommernis, versoekings of gevoelens van waardeloosheid of verwarring in jou lewe is, raai wat! Die vyand het opgedaag en ’n saadjie in jou gedagtes geplaas. Jesus is reeds deel van die oorwinningsverhaal, en Hy het jou saam met Hom ingenooi in sy verhaal. Die manier waarop jy in hierdie verhaal instap, is deur jouself te herinner aan wat die waarheid is oor wie jy in Christus is en God se getrouheid aan jou.

Glo jy dat jy in oorwinning kan leef? As die antwoord nee is, wen die verleier die stryd in jou gedagtes. Hy sirkel al hoe nader aan jou tafel en is gereed om te gaan sit. Hou die volgende in gedagte: Daar is baie op die spel. Dit is jou LEWE waarvan ons hier praat. Gelukkig kan enige saad wat die vyand in jou gedagtes strooi onmiddellik verwyder word. Selfs saad wat al vir jare daar lê, kan verwyder word. Oorwinning gaan nie oor iets wat jy doen nie. Dit gaan oor die evangelie van Jesus Christus – wat Jesus vir jou gedoen het. Jesus het Self die oorwinning behaal. God het reeds die uitkoms gegee. Deur Jesus se dood en opstanding, het Hy oor die mag van die duisternis en sonde geseëvier. Dit beteken die mag van die duisternis en sonde kán uiteindelik nie wen in die lewe van enige gelowige nie. Wanneer jy aan Jesus behoort, sal jy altyd die vyand aanvat vanuit ’n posisie van kragtige oorwinning.

Ons gebed is om elke gedagte gevange te neem en aan God gehoorsaam te maak (2 Korintiërs 10:5). Hierdie twee waarhede werk saam as een: Christus doen al die werk, maar tog moet jy deel word daarvan deur gebed en besliste optrede. In Christus het jy die geleentheid om vorentoe te beweeg en met krag te baklei. Dié krag kom van Christus. Die oorwinning kom van Christus. Maar tog moet jy met Christus saamstem. Niemand anders gaan jou gedagtes namens jou gevange neem nie. Dit is tyd vir jou om op te staan en verantwoordelikheid te aanvaar om saam met Christus te werk aan jou doel, jou toekoms en jou oorwinning.

Besluit nou, vandag, om die verhaal van die stryd in jou gedagtes te verander. Jy kan dit doen deur elke gedagte in gebed gevange te neem. Identifiseer enige bedrieglike gedagte in jou kop. Bind daardie gedagte vas in die Naam van Jesus. Verander die loop van jou verhaal deur die Skrif. Ken dit. Memoriseer dit. Speel dit oor en oor af in jou gedagtes. En uiteindelik; wees op die aanval in jou gedagtewêreld deur gedagtes wat jou sal help in jou geheue te bêre (Filippense 4:8). Ons het ’n ontsaglike hoop op die oorwinning as gevolg van God se oorvloedige genade.

NADINK-VRAE

Hoe het die Heilige Gees jou gehelp om die vyand se leuens te verwerp en God se waarheid oor sy mag oor sonde aan te gryp?

Hoe kan gebed ’n sterker wapen word in die stryd om jou gedagtes?

Watter aanvallende stappe kan jy neem om jou gedagtes op die goedheid van God se genade te fokus?