Doelgerigte GebedVoorbeeld

Bid volgens die Skrif oor die Woord

Vader, u Woord leer: In die begin was die Woord daar, en die Woord was by God en die Woord was self God (Joh. 1:1). Deur die Woord van die Here is die hemele gemaak (Ps. 33:6). U hou alle dinge deur u magswoord in stand (Heb. 1:3). U Woord staan vir altyd vas in die hemel (Ps. 119:89), en U het u Naam en u Woord bo alles gestel (Ps. 138:2). 

U, wat Uself deur die Woord openbaar (1 Sam. 3:21), open ook my verstand om die Skrif te verstaan (Luk. 24:45), en gee my deur u Gees wysheid en openbaring dat ek U kan ken (Ef. 1:17). U Woord is die lamp wat my die weg wys, die lig op my pad (Ps. 119:105), en wanneer u Woord vir mense oopgaan, bring dit lig; dit gee insig aan dié wat nog onervare is (Ps. 119:130). Laat u Woord my op die regte pad hou; moet tog nie dat enige kwaad die oorhand oor my kry nie (Ps. 119:133). U het die woorde wat ewige lewe gee (Joh. 6:68), en die Woord wat U gegee het, is die Gees wat lewend maak (Joh. 6:63). U Woord bly altyd by my (Ps. 119:15) en ek leef van elke woord wat uit u mond kom (Deut. 8:3; Matt. 4:4). Aan u Woord hou ek vas, dit weerhou my van sonde teen U (Ps. 119:11). 

Laat u Woord in sy volle rykdom in my bly sodat ek ander kan leer en onderrig (Kol. 3:16) en die Bose kan oorwin (1 Joh. 2:14). Soos ’n pasgebore kind smag ek na die suiwer geestelike melk van die Woord sodat ek daardeur kan opgroei en die saligheid kan verkry (1 Pet. 2:2). Gee dat by die aanhoor van u Woord, geloof in my sal groei (Rom. 10:17) sodat ek u wil kan doen (Heb. 11:6). Here Jesus Christus, die lewende Woord van God, U is die weg en die waarheid en die lewe (Joh. 14:6). 

Vestig u Woord in ons stede en in nasies, laat dit kragtig groei en versprei (Hand. 19:20). Die mens is soos gras, en al sy prag soos ’n veldblom; die gras verdor en die blom val af, maar die Woord van die Here, dit bly vir ewig (1 Pet. 1:24-25).