Leef Jou Roeping Uit: Wat Op Aarde Doen Ek Hier?Voorbeeld

Leidrade Waar Jy Moet Begin Dien

Die Bybel gebruik die term "hart" om sommer al jou begeertes, hoop, belangstellings, ambisies, drome en vriendskappe te beskryf. Die bron van alles wat jou motiveer word deur die hart verteenwoordig — wat jy graag doen en waarvoor jy die meeste omgee. Ons gebruik die woord selfs vandag nog so wanneer ons wil sê: "Ek het jou met my hele hart lief."

In Spreuke 27:19 (AFR20) staan: "Soos water 'n gesig weerspieël, so weerspieël die hart van 'n mens hom." Jy is nie wat ander mense dink jy is nie, of wat jou omstandighede jou dwing om te wees nie. Jou hart is wie jy regtig is. Dit bepaal waarom jy sekere dinge sê en waarom jy op 'n sekere manier optree.

Ons liggame het almal 'n unieke hartklop. Net so het ons almal unieke vinger-, retina- en stemafdrukke en ons harte klop in effens verskillende patrone. Dit is verstommend dat niemand uit die miljarde mense wat al geleef het, al ooit presies dieselfde hartklop as jy gehad het nie.

Net so het God aan elkeen 'n unieke emosionele hartklop gegee wat jaag wanneer ons aan die onderwerpe, aktiwiteite of omstandighede dink wat ons interesseer. Ons gee instinktief om vir sekere dinge, maar nie vir ander nie. Dit is alles leidrade wat jou kan wys waar jy moet dien.

'n Ander woord vir hart is passie. Daar is sekere onderwerpe waaroor jy geweldig passievol is en ander waaroor jy nie juis baie omgee nie. Sommige ervaringe maak jou opgewonde en trek jou aandag, terwyl ander jou nie aanstaan nie of jou baie verveel. Hierdie dinge onthul die aard van jou hart. Luister dus na innerlike aansporings wat jou kan lei na die bediening waar God jou wil hê.

Het jy toe jy grootgeword het, dalk ontdek dat jy vreeslik baie in sekere onderwerpe belangstel waaroor niemand anders in jou gesin omgegee het nie?

Waar het daardie belangstellings vandaan gekom? Hulle het van God afgekom!

God het 'n doel met hierdie aangebore belangstellings gehad. Jou emosionele hartklop is 'n sleutel tot jou begrip watter vorm jou bediening moet aanneem. Moenie jou belangstellings ignoreer nie; dink na hoe dit tot verheerliking van God gebruik kan word. Daar is 'n rede hoekom jy baie van daardie dinge hou.

Luister na vandag se klankonderrig deur Pastoor Rick >>