JEREMIA 20:14-18

JEREMIA 20:14-18 Bybel vir almal (ABA)

Ek wens ek was nooit gebore nie, ek wens die dag toe my ma my gekry het, het nooit gekom nie. Ek wens die man sterf wat vir my pa kom sê het dat my pa 'n seun gekry het. My pa was daardie dag baie bly. Ek wens daardie man word soos die stede wat die Here verwoes het. Niemand moet jammer wees vir daardie man nie, hy moet elke dag hoor hoe skree die mense en hoe vra hulle dat iemand hulle moet help. Hy moet hoor hoe blaas hulle die ramshoring in die middel van die dag. Dit moet so sleg gaan met daardie man omdat hy my nie doodgemaak het toe ek gebore is nie. Dan was my ma my graf, dan was sy vir altyd swanger. Hoekom is ek gebore? Hoekom kry ek net seer en swaar? Hoekom misluk alles wat ek doen?

JEREMIA 20:14-18 Afrikaans 1933/1953 (AFR53)

Vervloek is die dag waarop ek gebore is; laat die dag waarop my moeder my gebaar het, nie geseënd wees nie. Vervloek is die man wat aan my vader berig gebring en gesê het: Vir jou is 'n seun gebore — waardeur hy hom grootliks verbly het. Ja, laat dié man wees soos die stede wat die HERE omgekeer het sonder dat dit Hom berou het; en laat hom in die môre angsgeroep hoor en op die middagtyd krygsgeskreeu, omdat hy my nie gedood het van die moederskoot af, sodat my moeder my graf geword het en haar skoot vir ewig swanger gebly het nie. Waarom het ek tog uit die moederskoot voortgekom om moeite en kommer te sien, sodat my dae in skande verdwyn?

JEREMIA 20:14-18 Afrikaans 1983 (AFR83)

Vervloek is die dag waarop ek gebore is, die dag waarop my ma my in die wêreld gebring het; mag dié dag altyd sonder seën wees. Vervloek is die man wat vir my pa die berig gebring het: “Jy het 'n seun,” 'n berig wat hom baie bly gemaak het. Mag dit met daardie man gaan soos met die stede wat so genadeloos deur die Here verwoes is, mag daardie man angskrete hoor in die môre, oorlogskrete op die helder middag, omdat hy my nie doodgemaak het voor ek gebore is sodat my ma my graf kon gewees het en sy nooit in kraam kon kom nie. Waarom is ek gebore net om ellende en pyn te beleef en my lewe lank verneder te word?

JEREMIA 20:14-18 Die Bybel 2020-vertaling (AFR20)

Vervloek is die dag waarop ek gebore is! Mag die dag waarop my moeder my in die wêreld gebring het, nie geseënd wees nie! Vervloek is die man wat die nuus vir my vader gebring het: “'n Kind is vir jou gebore, 'n seun!” – iets wat hom baie bly gemaak het. Mag daardie man wees soos die stede wat die HERE platgeslaan het sonder om jammer te wees. Mag hy uitroepe om hulp hoor in die môre, en oorlogskrete teen die middag, omdat hy my nie doodgemaak het in die baarmoeder, sodat my moeder my graf geword het, en haar baarmoeder ewig swanger gebly het nie. Waarom het ek ooit uit die baarmoeder uitgegaan – om swaarkry en verdriet te ervaar? Moet my dae in skande eindig?

JEREMIA 20:14-18 Contemporary Afrikaans Bible 2023 (CAB23)

Vervloek is die dag waarop ek gebore is; laat die dag waarop my moeder my gebaar het, nie geseënd wees nie. Vervloek is die man wat die tyding aan my vader gebring het deur te sê: 'n Seun is vir jou gebore; maak hom baie bly. En laat daardie man wees soos die stede wat die HERE omgekeer het en hom nie bekeer het nie; Omdat hy my nie van die moederskoot af gedood het nie; of dat my moeder my graf kon gewees het, en haar skoot om altyd groot by my te wees. Waarom het ek uit die moederskoot uitgegaan om arbeid en droefheid te sien, sodat my dae met skande verteer sou word?

JEREMIA 20:14-18 Die Boodskap (DB)

Ek is spyt dat ek ooit gebore is. Niemand mag ooit sê dat die dag van my geboorte ’n wonderlike dag was nie. Mag dit sleg gaan met die mens wat vir my pa gaan sê het: “Geluk, jy het ’n seun!” Mag dié man word soos die stede wat die Here destyds sonder om ’n oog te knip vernietig het. Mag sy dag begin met mense se angskrete en eindig met oorlogsgeskreeu! Hoekom wens ek dit? Omdat hy my nie doodgemaak het nog voor ek gebore is nie. Dan kon my ma se liggaam sommer my graf gewees het. Waarom is ek tog ooit gebore? My lewe is net swaarkry en pyn. Moet ek my hele lewe lank net verneder word?

JEREMIA 20:14-18 Nuwe Lewende Vertaling (NLV)

Ek verwens die dag wat ek gebore is! Mag niemand my geboortedag ooit as gelukkig beskou nie. Ek verwens die dag toe iemand vir my pa die nuus gebring het: “Geluk, jy het ’n seun!” Mag dié man wees soos die dorpe wat die HERE sonder genade vernietig het. Mag hy in die oggend weeklag hoor, en in die middag oorlogsgeskreeu omdat hy my nie voor my geboorte doodgemaak het nie. Ag, kon my ma se liggaam vir ewig my graf gewees het! Hoekom is ek ooit gebore om al die swaarkry en pyn te sien? Moet ek my lewe lank vernedering ervaar?