Gewilde Bybelverse vanaf 1 Koorin 4

Deel

Neya duu'nyulo. A'mwo pwol a'mwo abolo punyu aguto kig Gooti toolluro mido mollomwalo tovino wuuduuwallo'moneyokwe yiuno gamoro yogalo tokwe to'no muuduuwallonekono. Toro kwol kuruv gamoro pasudo somjomwekovlawo'ji tovino'gwowi Gooti toolluro jurogudo tov kuu'maiyo toru'no aro wuuduuwallonekono. “Oo nuvu aguto kig Gooti toolluro mido mollomwalo tomuu me'no mwalodumdonyugono.” Su toro tovino nokwo wuuduuwallonekono.

Toro te Aguto tool yere mabodowo'jure toga kevu a'mwo pworavuro moduvomwallo'moneyokwe womdo tovino yere nojagilmwalpiyo. Yiuno kemi Aguto tool abwo'ji toga yiuwi'nokai poowokalago tovida'ai kuudo dugumwuulo tomuu yiulo kuulopuu'na'dupudo su toorai bako tovi nobomorosonekono. Su toro abomoroso'ji toga kuu'maiyo toru'no bomollolupto'nosonekono. Aki Gooti tool yiuwi'nokai pwolno pwolnodo toonolluro womdo tonyuno kaiya'nodo'mdukono oo sugudo'mdukoneyokwe tovino kuudo me'no youroma'dowodekono. Gooti su tool a'mwo pwolluno aro ado'ji tov “Oo a'mwo akal womdo sugudo yodowodekono,” ado'ji tov Gooti tool a'mwo su toolluno yovo tovi nyulomoropiyawonekono.

Aki puruv kevu kuudo neya jaullulo. A'mwo aguto pwol moduvomwallo'moneyokwe womdo tovi a'mwo gabovo pwollu kwiyo'ji tov a'mwo su tool womdo tovi pi'mwono neya moduvomwalonekono.

Toro te kevu nemino aro kuudo neya jaurogaulo. Oo a'mwo su tekwojo Krais toolluro womdo tovi wiyodupudorogano. Aki toro tekwojo Gooti toolluro yiulo yogalo apuu'nallajuko tovi moduvomwalopi yiuno kuu'maiyo toru'no bomollolupto'nosodupudorogano. Nemino su toro kuudo neya jaurogaulo.