2 Byitusu 2

Anyawuyi akatayi n əɓa agbmazhnii

1Shi sheaɓəgwognayi katái ɓəi fyi n aza atasni nyi, n ɓwasnu lo nu, a ɓə gye anyawuyi akatai n fyi n əfye atasni ce. Ɓa ɓə lo ɓe n nyawu atukwopmi ɓo agbmazhni nyai fyaa, ɓa ɓə la Dagayi duduyi aɓəna n wo ɓə si əɓa nyi; ɓai ɓe n agbmazhnii n pyepyei kpe n əɓahni. 2Bəgyé ɓə vyi əɓa alu afyekwnu nya jesnu ɓai zhni ai ci gaiciyanunui zokwo wyegba. 3Fyi n əɓa fnana, anyawuyi ye ɓə gyi fye fyi n anabagyi azhnizhniyi. Əɓa knyiznu kwo la mwasa tu n ɓa, jesnu əɓa agbmazhni too kpmaya n ɓa m.

4Ntuge ngye Shekwoyi to ɓə fa amaləka əsa n ɓa ɓə zhni leifyi ncei nyi m, ama wa tnu n ɓai fyi n anapyi, wa kwu ɓa fyi n agbma n wyegbmai, a kwu ɓa gwufyi ntu owada ɓo; 5ngye wo to ɓə fa anyikwokwoi əsa n wo ɓə ɓe n nuwna akpmakwnui kpe n əkwo aza anukwoi m, ama wa gnyi Nuhu waazizhniyi ɓəfyecezhni nya, ɓədo n azajei ngwnu-tnaaba; 6ngye wo ɓə kwu azhiyaakwo Sodom n Gwomwora nyai zhniagbma wa kpe ɓa əná ɓa kwu zè ətnu, jesnu wa kwu ɓa zhni ɓədogbe əɓo nya n kwo ɓə zhni aɓənukwoizhniyi; 7njesnu ngye wo ɓə la Lotu ɓəfyeceyi gnyi, n wo ɓə gnyi n bwugbawnui ntu afyekwnuyi aɓəzhni tna-owaɓwashi nya ɓo nyi 8(ntuge Lotu, ɓəfyeceyii n wo ɓə gyianyì dna n əɓa atasni fyegyifyegyi nyi, ɓə kwu gnyagwnugnya sni dna n əwo wyewyeyi ɓəfyeceyi ntu aɓəzhni tna-owaɓwashi nya ɓo, n wo ɓə gyewye jesnu woi wo nyi). 9Ngye kwo lo nlonu, akpəge Dagayi kpəlo she wo ɓa gnyi shekwodnawoyi ya n mwumwu jesnu wa kwu atna-aɓəfyeceyi zhi ntu tata ɓo n owada nyipyei. 10Nshnisnusnu dəye zhni gaiciya nu ntu n aza yi ɓo n ɓa vyi nayi aɓəpwawo wnuwnuya nyi jesnu ɓai ci ikwo wyegba. Atukwognakwoyi nu n agwui myimyii, ɓa ta wodna lo ɓa knyi ashemida akpmi m.

11Kwo amaləka, kwo shikwonyi ɓa dulo n kala jesnu n ɓa dulo n ikwo, ɓa ta knyi əɓa pya akpmi əsa n ɓa ɓe n Dagayi owaznuyai kpe əɓa m. 12Ama aza ye, ɓa da atukwopmi ɓo fyi n aɓo n ɓa to n əɓa awyegai lo m. Ɓa wu ngye anyafwanya atna aɓənubwozhnii nu n ɓa to n tukwovnyii dnalo m, n a ɓə ɓwa mama ntuge ai wna a wu, ngye anyafwanya aje, əɓahni ce ɓa ɓə kwu fyí.

13A ɓə gba ɓa akpí əta n akpíi n ɓa kwu zhni. Əɓa awyega agbmadawo nya əkwo nu nge ɓa sni ənya laɓa n nyipyei zaizai. Ɓa zhni babala nu n cegyei, ɓai nyanya fyi n əɓa agbmada əsa n ɓa kwnu awyefna n fyei. 14Əɓa awye n nunui n anagbáizhnii, ɓa ta fa leifyizhni ɓo m kpeekpe; ɓai wnu aza atnamyizhii ya; ɓa zhni agbada nu n fnana, aza n aknyii kpe. 15Ɓa la kwnu n zokwo cewoi nya ɓa kwu ɓwi gbegbe, ɓai vyi Balaam zokwo Byeza nugwnu, n wo ɓə ye əkpí tnutnu gyiwye nyi. 16Ama dokwo ɓə la gnaknyi wo ntu əwo ɓənukwoizhni ɓo; nyakpa n kwo ta daɓo m; kwa daɓo n zanyikwoci əshai kwa kwnù sheɓəgwognayi nyace.

17Aza ye zhni anyaɓwo nu ntna nuwna, jesnu ɓwugye n agbmaase kwuya nyi. A n wyegbma ciciricii nu zhni gnyi ɓa. 18Ɓa da əgbe gbəloi jesnu ɓai gyigbe, ɓai wu nayi shakpe aɓəwyeda, ɓai fyi aza ɓəpwawo n ɓa ye zhi ɓai ɓwa kwnukwnuya n aza yi akwnu n ɓa fyi n abaɓwi nyi. 19Ɓa shi ɓa loloya ɓəgbe, ama əɓa n ɓahni ɓa zhni afyenu adu wnuwnuiya nya nu, ntuge “aza zhni nyahonyahoi fyenu nu n kwo zhni əɓa Dagayi.” 20Ngye ɓa ɓə kwu pwo anyi wnuwnuya ntu əyi Dagayi n əyi Gnyignyii, Yeisu Kirisiti yekpé ɓo jesnu ai kwu ɓa je wnafyi n kwo, ai kwu ɓa gyisnu, ɓa la gna wnuwnuya n azozoba a fa ayayaba. 21Kwo ɓə ɓaa ɓa du n ɓa to ɓə ɓa kpe ɓəfyecezhni zokwo ye m, a fa ədo n ɓa ɓə kwu kwo kpeye, ama ɓanyi pmyiavnu wu ɓəgbetu gyigyiyi n a ɓə la kwo dna ɓa n akwnu nyi. 22Anyìɓəsisi ye zhni gaiciya nu kpe n ɓa, “əmwi kwo la jezelo əkwo atu,” jesnu “Bwurutumyi ń a la kwo fu nuwna, kwo la jezelo aɓwoshni.”

Đang chọn:

2 Byitusu 2: GNB

Tô màu

Sao chép

So sánh

Chia sẻ

Bạn muốn lưu những tô màu trên tất cả các thiết bị của mình? Đăng ký hoặc đăng nhập

Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi

Apmazhni n gbegai nu. Ɓəznu vnyanya wnafyi lo n anyìvnyanya.

Gbagyi Contemporary Bible™, New Testament

Tìm hiểu thêm về Gbagyi Nyizeyenya Baibwulu: Shekwoyi Ɓədagbma

2 Byitusu 2

Những câu Kinh Thánh phổ biến từ 2 Byitusu 2

Những câu Kinh Thánh phổ biến từ
2 Byitusu 2