Oseas 10
10
Israelcho altarkunata ushakätsinanpaq nishqan
1Israel runakunaqa rïcu kashpan tampiyparaq wayuq üvanömi karkaykan.
Rïcuyarmi mana väliq dioskunapaq altarkunata rurarkaykan.
Mikuynin ali wayuptinmi kuyaylapaq kananpaq adorashqan wankakunatapis adornarkaykan.
2 Tayta Dioslata sirvinanpaq promitirpis manami cumplirkaykantsu.
Kananqa Tayta Diostami cuentata qopäkunqapaq.
Paymi altarninkunata y ichitsishqan wankakunatapis talamar ushakätsinqa.
3Tsaymi Israel runakuna kayno nipäkunqapaq:
<<Tayta Diosta mana mantsakushqantsipitami mandamaqnintsi reypis manana kannatsu.
Itsanqa rey karpis ¡imanöparaq yanapamashwan!
4Mandamaqnintsi reykunaqa lulapämashpantsimi imatapis awnimantsi.
Pactuta rurarkurpis manami cumplipäkuntsu.
China aselgas mirar chakracho atska kashqannömi nacionnintsicho mana ali ruraykunalana kaykan>>.
5¡Samaria runakunaqa mantsakashqami karkaykan!
¡Bet-avéncho#10.5 Bet-avén ninanqa jutsa wayi ninanmi. Bet-avénpaq parlarqa Bet-el markapaqmi parlarqan. Bet-elpaq tsayno parlarqan Tayta Diosta tsaycho adorananpa trukan turitu niraq ïduluta tsaycho adoraptinmi. Tsaypita masta musyanaykipaq liyinki 1Rey. 12.28-32; Ose. 8.5. Tsaynölami 10.8 versïculucho Avénpaq parlar Bet-elpaq parlaykan. adorapäkushqan qoripita rurashqa turituta apakärinanpaq kashqantami tantiyarkaykan!
Cürakunapis y runakunapis waqarkaykan kuyashqan ïdulu manana kananpaq kashqanta musyarmi.
6Soldädukuna tsay ïduluta apakurmi Asiria nacionpa mandaqnin reyta qaraykärinqa#10.6a Wakin runakunaqa regalapäkunqapaq nipäkun..
Tsaynöpami Efraín runakuna#10.6b Efraín runakunapaq parlarqa Israel nación runakunapaqmi parlarqan. pasaypa penqapaypaq kanqa.
Ïduluman yärakushqanpitami penqaytukushqa uysurpanqa.
7Samariacho taq reytapis shakluta yaku apashqannömi prësu apakärinqa.
8Avéncho kaykaq altarkunatapis lapantami juchutsipäkunqa.
Tsay altarkunachömi Israel runakuna ïdulukunata adorar jutsata rurarkaykan.
Juchutsir ushaptinmi tsay altarkuna kashqancho kashakuna y shirakakuna winanqa.
Tsay witsanmi runakuna pasaypa nakar puntakunata kayno nipäkunqa:
<<¡Jukla ushakänäpaq janäman juchumuy!>>
Qaqakunatapis kaynömi nipäkunqa:
<<¡Jukla nitipäkamay!>>#Luc. 23.30; Apoc. 6.16.
Israel runakuna mana cäsukushqan
9 Tayta Diosmi kayno nin:
<<Israel runakuna, unay ayluykikuna Gabaa markacho#Jue. 19.22-26. jutsata rurapäkushqanpita patsa kananyaq jutsa rurayta manami kacharinkitsu.
Tsaymi fiyu runakuna Gabaacho unay ushakashqanno qamkunapis ushakankipaq.
10Imaypis munashqä hörami castigashayki.
Penqakuypaq jutsata rurashqaykipita castigaptïmi maytsay nacionpita runakuna shapäkamunqa atacashunaykipaq.
11<<Manshu töru trïguta kushishqa jarushqannömi Israel nacionpis kaykan.
Kananqa kuyaylapaq matankanman yügutanami watashaq.
Judá nacionpis armädata tsutaq törunömi kanqa.
Jacobpita miraqkunaqa cospiadörata qarachaqnömi kanqa.
12<<Munashqäno ali kawapäkuy.
Tsayno kawarqa chakrata ali muruwan muruqnömi karkaykanki.
Tsaymi cosëchata shuntar kushikärishqaykino qamkunata kuyapashqäta tantiyar kushikärinki.
Tsayno kaptinqa purun chakrata kichaqno shonquykita kichapämay.
Höra chayamushqanami lapan shonquykiwan ashimänaykipaq.
Mana utikaypa manakamay shamur salvanäyaq.
13<<Itsanqa jutsata ruralarmi kawapäkushqanki.
Jukniki juknikipis lulapänakurmi mana ali kawarkaykanki.
Guërra carrëtaykikunaman y atska soldäduykikunamanmi yärakurkaykanki.
14Tsaymi nacionnikicho guërralana kanqapaq.
Amparakärinayki wayikunapis juchutsishqami kanqapaq.
Bet-arbelcho guërra kaptin Salmán runakunata ushakätsishqannömi qamkunatapis warmikitapis y wamraykikunatapis ushakätsishunkipaq.
15Bet-el runakuna, aläpa jutsata rurapäkushqaykipita qamkunatapis tsaynömi rurashunkipaq.
Israel nacionta atacashpanmi mandaqnin reytapis patsa manaraq waraptin wanutsipäkunqapaq>>.
Đang chọn:
Oseas 10: qvmB
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2003, Wycliffe Bible Translators, Inc. All rights reserved.