เซคาริยา 13
13
1 พะจาว กุม ตฮัน มะลอง อัฮ แม เฮี, “ซเงะ เซ เยอ, โม จัตเจือ กซัต ด่าวิต ไม่ โม ปุย เวียง เยรูซาเลม เมอ, ซ โอก รอาวม ปลาึฮ ละ. มัฮ ละ ซ รไซจ อื โม เซ เกือฮ ซง่ะ ฮา มั่ป ไม่ กัน ฆอก กัน เบร ยุฮ อื. 2ซเงะ เซ ไลลวง กัน ไว ปุย ฮุป เซ อาึ ซ ยุฮ ไลจ ไม่ ปอ โอ ปุย เญาะ ซ โฮลฮ อู ลอก มอยฮ อื เฟือฮ เอิน. โม ป อัฮ ติ แตะ มัฮ ป ซึป ลปุง อาึ เตือง โอ อื มัฮ เนอึม เซ, ไม่ ลปุ ป ฆอก ป เบร เซ, อาึ ซ โครฮ เกือฮ โอก โอยจ ฮา ปลัฮเตะ เฮี. 3ดัฮ ไก ลั่ง ป เคียต อัฮ ติ แตะ มัฮ ป ซึป ลปุง อาึ อื, มะเปือะ โกะ อื เซ ซ อัฮ เอิน เฮี ละ อื, ‘ปะ ไมจ เปอะ ยุม แปฮ, นึง เคียต เปอะ โกว มอยฮ พะจาว ละ จุ แตะ ปุย,’ ซ อัฮ เซ ละ อื. ลไล เคียต อื ซึป ลปุง พะจาว เซ, มะเปือะ อื ซ บวก เอิน อื ปอ ยุม อื.
4“ซเงะ เซ โม ป อัฮ ติ แตะ มัฮ ป ซึป ลปุง พะจาว โครยญ โฆะ อื เซ, ซ โซะกิจ นึง ป อัฮ ป มวยญ โกะ แตะ ไม่ โม ป โคะ ติ แตะ ยุ บลอง โอเอีฮ เซ. เญือะ ซ โรวต โตว จาวป เครอึง ฮาึก ซัตซิง ละ ซ ซาวป แตะ จุ ปุย นึง. 5ฮา เซ ซ อัฮ อื ตอก เฮี, ‘อาึ มัฮ โตว ป ซึป ลปุง พะจาว, อาึ มัฮ ป ยุฮ ชิจ ยุฮ รปึม. อาึ เอีจ โฮลฮ เตะ แปน คอง แตะ เน่อึม เญือม นุม ลั่ง แตะ,’ ซ อัฮ เซ. 6ดัฮ ปุย ไฮมญ ตอก เฮี โฮ, ‘ปะ เมอยุ ไก เบือง เบราะ ไอม นึง รน่าวก เปอะ เซ?’ ปุย เซ ซ โลยฮ แม อื ตอก เฮี, ‘มัฮ ฮรอย เบราะ ป อาวม เมอะ นึง เญือะ ปุโฮมว ฮรัก แตะ,’ ซ อัฮ เซ.”
รซอม ดวน ปุย ยุฮ ยุม ไม่ ป เลียง แกะ
7 พะจาว กุม ตฮัน มะลอง อัฮ เฮี, “เออ วิจ, โกฮ ตอซู ไม่ ป เลียง แกะ ยุฮ อาึ อื เมิฮ. ไมจ เปอะ ตอซู ไม่ ปุย เซ ป ซดิ ไม่ อาึ เซ. ไมจ เปอะ ยุฮ เอิน ยุม ไม่ อื, เกือฮ แกะ เซ แตกฟุง เฮียไฮ ติ แตะ. อาึ ซ ลเตือฮ ตอซู ไม่ แกะ แตวะ โม เซ. 8ปุย ไน เมือง เงอะ เฮี, เลี่ป อื, พา เลีฮ ลอวย อาึ ซ ยุฮ ไลจ ไม่ ตา ลอา เตะ. ซ เกือฮ ลั่ง โฮฮ ตา ติ เตะ โน่ง. 9ป โฮฮ ลั่ง อื ตา ติ เตะ เซ อาึ ซ ลอง เงอะ นึง งอ. ซ โล เยอะ ตอก โล ปุย มาื โฮ, ซ ลอง เงอะ ตอก ลอง ปุย ไคร โฮ. เญือม เซ โม เซ ซ ไววอน ปัว นึง อาึ. อาึ ซ โลยฮ โรฮ ละ อื. อาึ ซ อัฮ ตอก เฮี, ‘ปุย โม เฮี เอีจ มัฮ ปุย ไน อาึ.’ โม เซ ซ อัฮ โรฮ อื ตอก เฮี, ‘เยโฮวา มัฮ เนอึม พะจาว ยุฮ เอะ,’ ซ อัฮ เซ,” เอีจ มัฮ พะจาว ป อัฮ เซ ละ เปอะ.
Đang chọn:
เซคาริยา 13: lcp
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© (Active), Thai Bible Society