Sekaraea 9
9
Yawe bae hemi jajem olketa narafala kantri wea i stap raonem Israel
1Wanfala profesi: Hem ya nao Mesij blong Yawe agensim lan long Hadrak an taon long Damaskas. Yawe hemi lukim evrisamting wea olketa laen blong Israel an evri narafala man long wol, olketa duim.#Aesaea 17:1-3; Jeremaea 49:23-27; Emos 1:3-5. #9:1 Long Hibru Baebol, mining blong disfala ves hemi no klia. 2An lan long Hamat wea baondri blong hem hemi stat long Hadrak, disfala Mesij hemi agensim tu disfala lan wetem tufala taon long Taea an Saedon, nomata olketa pipol blong tufala taon ya i waes tumas. 3Olketa pipol blong Taea bin wakem strongfala sefples, an i hipimap plande silva an gol long ples blong olketa. Olketa garem plande tumas olsem dast long olketa rod. 4Bat Masta blong wol, bae hemi tekemaot evrisamting from datfala ples. Bae hemi spoelem evri sip blong olketa, an bonem taon blong olketa finis.#Aesaea 23:1-18; Esikiel 26:1—28:26; Joel 3:4-8; Emos 1:9-10; Matiu 11:21-22.
5Taem olketa blong Askelon i lukim olketa samting ya, olketa fraet fogud. An olketa blong Gasa i filnogud tumas long hem. Olketa blong Ekron tu i filnogud, an tingting blong olketa wikdaon fogud. Bae Gasa hemi lusim sif blong hem, an Askelon hemi kamap emti wea no eniwan hemi stap long hem.#Aesaea 14:29-31; Jeremaea 47:1-7; Esikiel 25:15-17; Joel 3:4-8; Emos 1:6-8; Sefenaea 2:4-7. 6An olketa strensa bae kam tekova long Asdod.
Yawe hemi tok olsem, ?Olketa pipol blong Filistia i praod tumas, bat bae mi mekem tingting blong olketa fo wikdaon. 7Bae mi mekem wea olketa no save kaikaim moa mit wea hemi garem blad long hem an narafala tambu kaikai tu. Olketa hu i laef yet, bae i joenem pipol blong mi, mekem olketa kamap pat long pipol blong mi tu, an bae olketa i olsem wanfala laen blong Jiuda. Olketa pipol blong Ekron, bae i kamap pipol blong mi, olsem wea pipol blong Jebus#9:7 ?pipol blong Jebus? Olketa man blong Jebus, olketa bin stap long Jerusalem bifoa King Deved hemi winim taon ya. An olketa pipol blong Jebus hu i laef yet, olketa kamap pat long olketa pipol blong Yawe. Lukim 2 Kronikols 8:7-8. bin kamap finis pipol blong mi. 8Mi bae mi gadem olketa pipol blong mi, mekem olketa soldia blong eni narafala kantri i nating save kam winim olketa. Bae mi kanot letem moa olketa enemi fo kam spoelem olketa pipol blong mi, bikos mi gohed fo lukaftarem olketa.?
King wea bae hemi kam
9Yawe hemi tok olsem,
?!Olketa pipol blong Saeon!
!Yufala mas barava hapi!
!Olketa pipol blong Jerusalem!
!Yufala mas singaot bikfala!
!Yufala lukim!
King blong yufala hemi kam nao.
Wei blong hem hemi stret olowe,
an hemi winim finis olketa enemi blong hem.
Bat hemi no haemapem hem seleva,
an hemi raed kam antap long wanfala yang dongki.#Matiu 21:5; Jon 12:15.
10?Bae mi tekemaot olketa hos an kaat fo faet from olketa soldia blong Israel an Jerusalem. Olketa bou wea olketa yusim long taem fo faet, bae mi spoelem finis. Disfala King bae hemi mekem piis wetem olketa narafala kantri, an bae hemi king long olketa lan, stat long Ded Si long ist, go kasem solwata long west, an stat long Yufretis Riva long not, go kasem en blong wol.?#Sam 72:8.
Yawe hemi gadem olketa pipol blong hem
11Yawe hemi gohed fo tok olsem, ?Mi bin mekem spesol agrimen finis wetem yufala, an blad blong olketa sakrifaes hemi ran kamdaon fo mekem agrimen ya hemi stap strong. An from samting ya, bae mi mekem yufala go fri from ples wea olketa bin fosim yufala fo stap long hem, wea hemi olsem wel wea hemi no garem wata long hem.#Eksodas 24:8. 12Hemi olsem wea yufala bin stap long prisin. Bat yufala hu bin gohed fo trastem Yawe fo sevem yufala, distaem yufala save kambaek moa long strongfala sefples blong yufala. An bikos yufala bin safa tumas, bae mi blesim yufala an dabolem olketa gudfala samting wea yufala bin garem bifoa. 13!Olketa pipol blong Jiuda! Bae mi yusim yufala olsem bou blong mi. !Olketa pipol blong Israel! Bae mi mekem yufala olsem olketa aro blong mi. An yufala olketa pipol blong Saeon, bae mi yusim yufala, olsem naef fo faet blong mi, fo agensim olketa pipol blong Gris.?#Aesaea 66:19; Esikiel 27:13; Daniel 8:21.
14 (Profet) Yawe bae hemi kam long olketa pipol blong hem, an aro wea hemi sut long hem hemi laet olsem laetning. Lod Yawe bae hemi bloum bikfala trampet blong hem, an taem hemi maas kam, bae hemi olsem bikfala win wea hemi blou kamaot long saot. 15Yawe hu hemi garem evri paoa, bae hemi gadem olketa pipol blong hem olsem wanfala sil. Bae olketa kilim an winim olketa enemi blong olketa wea i slingim ston long olketa. Taem olketa win, bae olketa mekem fist an dring, mekem olketa singaot bikfala olsem pipol wea i drang. Bae olketa fulap tumas, olsem olketa besin wea i yusim fo tekem go blad blong olketa sakrifaes fo kapsaetem go long olta. 16Long datfala de, Yawe bae hemi sevem olketa pipol blong hem, olsem man fo lukaftarem sipsip hemi lukaftarem olketa sipsip blong hem. Bae olketa stap gudfala olobaot long lan blong hem olsem olketa barava spesol ston i saen long kraon blong king. 17!Bae olketa i gudfala an luknaes tumas! An olketa gudfala kaikai an waen blong lan ya, bae hemi mekem olketa yangman an olketa yangwoman fo kamap strong.
Kasalukuyang Napili:
Sekaraea 9: SIPB
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Pijin Catholic Bible © Bible Society of the South Pacific, 2008.