Sekaraea 11
11
Olketa ravis king bae i lus
1 (Profet) !Lebanon! Yu mas openem olketa doa blong yu, mekem faea hemi kam bonem olketa sida tri blong yu. 2!Olketa paen tri! Yufala mas krae bikfala from olketa sida wea i foldaon finis. Olketa gudfala tri ya, faea hemi bonem olketa evriwan finis. !Olketa ok tri blong Basan! Yufala tu mas krae bikfala, bikos olketa bikfala tri long bus, olketa pipol i katemdaon evriwan finis. 3Olketa man fo lukaftarem sipsip i filnogud an krae tumas, bikos olketa ples wea i garem gudfala gras long hem i lus finis. Olketa laeon tu i krae, bikos bikfala bus kolsap long Jodan Riva, wea hemi ples blong olketa, hemi kamap nogud finis.
Tufala man fo lukaftarem sipsip
4Yawe, hu hemi God blong mi, hemi tok olsem long mi, ?Yu mas kam fo lukaftarem olketa pipol olsem man fo lukaftarem sipsip.#11:4 Long disfala sapta, toktok ya ?olketa sipsip? hemi tokpiksa abaotem olketa pipol, an toktok ya ?man fo lukaftarem sipsip? hemi tokpiksa abaotem lida blong olketa. Olketa pipol ya i olsem sipsip wea pipol i makem finis fo kaikaim. 5Olketa pipol wea i peim an busarem olketa sipsip bae i no save panis fo hem. An olketa wea i salem olketa sipsip ya, olketa tok olsem, ?!Tengkiu long Yawe! !Distaem mi kamap risman nao!? An olketa man fo lukaftarem olketa sipsip ya tu i nating sore long olketa.
6?Mi laekem yu fo duim samting ya, bikos bae mi nating sore moa long olketa pipol blong disfala lan. Bae mi mekem olketa fo agensim olketa wantok blong olketa, an mi putum olketa ya andanit long paoa blong olketa lida blong olketa. Bae olketa spoelem lan ya finis, an bae mi no sevem eniwan long olketa from disfala trabol.?
7So mi duim nao olsem wea Yawe hemi bin talem long mi. Olketa hu i peim sipsip an olketa hu i salem, olketa peim mi fo lukaftarem olketa sipsip wea pipol i makem finis fo kaikaim. Nao mi tekem tufala wokingstik fo lukaftarem sipsip. Wanfala mi kolem ?Kaen,? an narawan mi kolem ?Tugeta,? an mi gohed fo lukaftarem olketa. 8Trifala narafala man fo lukaftarem sipsip wea mifala waka tugeta i nating laekem mi, trifala agensim mi go-go mi taet long trifala. From samting ya nao, insaet long wanfala mans mi ronemaot trifala. 9Nao mi tok olsem long olketa sipsip, ?Bae mi les fo lukaftarem yufala moa. Yufala wea yufala mas dae, letem yufala dae. Yufala wea yufala mas lus, letem yufala lus. An yufala wea yufala stap laef yet, letem yufala spoelem yufala seleva go-go yufala dae evriwan.?
10Den mi tekem stik wea mi kolem ?Kaen,? an mi brekem fo somaot dat disfala spesol agrimen wea mi bin mekem wetem olketa pipol blong Israel, distaem hemi finis nao. 11An long sem de nomoa, promis ya hemi finis nao. Taem mi duim olketa samting ya, olketa wea i peim an salem olketa sipsip ya i lukim an save dat hem ya nao Mesij blong Yawe. 12An mi tok olsem long olketa, ?Sapos yufala laek fo peim wejis blong mi long mi, yufala peim nao. Bat sapos nomoa, yufala kipim.? Den olketa skelem teti silva seleni an givim long mi fo peim mi.#Eksodas 21:32; Matiu 26:15.
13Yawe hemi tok olsem long mi, ?Yu torowem go seleni ya long ples blong man fo mekem pot long graon.? So mi tekem teti silva seleni wea hemi smolfala wejis nomoa, an mi torowem go seleni ya long ples blong man ya, hu hemi waka insaet long Tambuhaos blong Yawe.#Matiu 27:9-10. 14Den mi tekem narafala stik wea mi kolem ?Tugeta,? an mi brekem fo somaot dat Jiuda an Israel i no wan pipol nomoa.
15Yawe hemi tok moa olsem long mi, ?Distaem mi laekem yu fo duim olsem wea yu wanfala krangge man fo lukaftarem sipsip. 16Samting ya hemi somaot dat bae mi putum wanfala nogud man fo lukaftarem sipsip fo rul ovarem disfala lan. Datfala man bae hemi nating lukaotem olketa wea i lus an olketa wea i go olobaot. Bae hemi nating helpem olketa wea i garem soa, o givim kaikai long olketa wea i helti. Bat bae hemi gohed fo kilim olketa wea i nambawan fo kaikaim, an hemi tekemaot lek blong olketa tu.
17?!Sore tumas long datfala man hu hemi les fo lukaftarem olketa sipsip! !Letem faet hemi kam fo spoelem hem! !Letem strong long am blong hem hemi lus! !Letem raet ae blong hem hemi kamap blaen!?
Kasalukuyang Napili:
Sekaraea 11: SIPB
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Pijin Catholic Bible © Bible Society of the South Pacific, 2008.