Luki 18
18
Əpʉ nə̂ əmbrʉ əyïngbanga də yashe koya
1Jezu pâ əpʉ kəwû kə atrawaya nə̂ ye ndə kə yisə̂ nə kə əndje ə pa, əndje yu Ndjapä alɔnɔ̂, əndje katə̂ kə yu ətshə ka ne. 2Tshə pâ kə əndje ə pa: «Ə̈bə̈ əyïngbanga sə̂ je lə ə̈bə̈ gala, ə̂në tshə kpê rawa Ndjapä kpê ne ə kpê rawa ə̈bə̈ əzü kpê bale ne. 3Ə̈bə̈ yashe koya sə̂ je ndje lə gala nə, ə̂në tshə nâ alɔnɔ̂ ə pâ kə ətshə ə pa: “Wä ngbanga lə takpa tə̂ ä də əyïəpʉ nə̂ əmə.” 4Äwä ngbatshe, tshə yîndə nə yî ne. Bale, mandânə, tshə pâ mâ tə̂ lɔsu ye ə pa: “Djatra əpʉ, mə kpe rawa Ndjapä kpe ne ə kpe rawa ə̈bə̈ əzü kpe bale ne, 5bale, mbrə ə̂në yashe koya səye sə kə toworo əmə, mə sə kə wa tshelə ngbanga nə̂ ye ndə kə pa tshə na na alɔnɔ̂ ə ka kumu əmə ne.”» 6Âgbɔ̂ Əyïngerə nə pâ kwatə̂ye ə pa: «E djï əpʉ ə̂në əmbrʉ əyïngbanga səkɔ pâ kɔ! 7Ndjapä sə sə kə wa tshelə ngbanga nə̂ azü ə̂në tshə kê əndje gâ ye kɔ, ə̂në əndje kɨ kə ətshə alɔnɔ̂ kɔ ne a? Tshə sə kə ka ə ka ʉrrr â kirə əpʉ kə əndje a? 8Mə pa kə e: tshə sə kə wa tshelə ngbanga nə̂ əndje diawû. Bale, alɔ ə̂në Əgblə nə̂ Əzü sə kə yi kumu ye, tshə sə kə sɔtə̂ azü ə̂në əndje sə də lɔsu kɔ pâ ashɔ səye a?»
Fariza də aworɔ ngendja lapɔ
9Tshə kwâtə̂ye ə pâ əpʉ kəwû səye mbrə alabə̈ azü ə̂në əndje wu ə pa alane sə tə aə̂rɔ̂ azü lə ala Ndjapä, ə̂në ə wu angâ əndje tə aamba azü lə ala əndje kɔ. Tshə pâ: 10«Azü bishi nâ mâ lə Anda Ndjapä ndə kə yu Ndjapä. Ə̈bə̈ nə bale sə̂ tə Fariza â bale nə sə̂ tə aworɔ ngendja lapɔ. 11Fariza nə kâ gâ lafɔ ə yû Ndjapä mâ lə ye ə pa: “Ndjapä, mə za mərshe kə əbə mbrə ə̂në mə sə sə mata ə̂dû azü ə̂në əndje sə tə alayïangba də alayïəmbrʉ ərə kɔ ə sə tə aawopra alawɔ angâ əndje də aläkɔ̈ angâ əndje kɔ ne. Mə za mərshe kə əbə mbrə ə̂në mə sə sə ndje mata aworɔ ngendja lapɔ səye ne. 12Mə sə kə ru tshelə əmə tə̂ rəgo äwä bishi lə dəmashi bale. Mə sə kə ko dimə aərə ə̂në mə sɔ̂tə̂ nə kɔ nɔ̂.” 13Bale, aworɔ ngendja lapɔ nə kâ ənə̂ ye ngrʉ̂ ə yî yîndə kə lishi gâ lafɔ ne. Tshə kô kəna ye gâ ndʉ əgʉ ye ə pâ: “Ndjapä, wü əyo əmə, mə sə tə əyïnyaka.”» 14Jezu pâ kwatə̂ye ə pa: «Mə pa kə e: alɔ ə̂në aworɔ ngendja lapɔ nə gû na ye gâ ndə ye kɔ, tshə sə̂ tə ə̂rɔ̂ əzü lə ala Ndjapä ə rô Fariza səkɔ. Mbrə ə̂në əzü ə̂në tshə mbrə tə̂ ye tə âgbɔ̂ əzü, əndje sə kə mbrə ətshə tə əngʉ əzü, əzü ə̂në tshə mbrə tə̂ ye tə əngʉ əzü, əndje sə kə mbrə ətshə tə âgbɔ̂ əzü.»
Əgɔngerə nə̂ Ndjapä sə mbrə azü ə̂në əndje sə mata aneshe
(Matiɔ 19.13-15; Markə 10.13-16)
15Azü nâ ndje də aə̂ngê aneshe kə Jezu ndə kə pa tshə goro əndje. Ə̂në atrawaya wû ərə sə̂ rəkɔ, əndje ngâ kə azü nə. 16Bale, Jezu pâ əndje e əndje â pâ əpʉ ə pa: «E kätə̂ aaya aneshe əndje na gâ tə̂ əmə! E känga äwä känga tə̂ əndje ne. Mbrə ə̂në Əgɔngerə nə̂ Ndjapä sə mbrə azü ə̂në əndje sə mata əndje kɔ. 17Djatra əpʉ, mə pa kə e: əzü ə̂në tshə yində Əgɔngerə nə̂ Ndjapä nə yi mata aya əgblə ne, tshə sə sə kə li gâ lə nə bale ne.»
Ə̈bə̈ əyï kə sə də aərə gâ ndə Jezu
(Matiɔ 19.16-30; Markə 10.17-31)
18Ə̈bə̈ âgbɔ̂ əzü yû Jezu ə pa: «Ə̂rɔ̂ awoyisə̂ ərə, ərə yekɔ də̂ mə lï ndə kə mbrə nə ndə kə sɔtə̂ sorô nə̂ alɔnɔ̂?» 19Jezu pâ kə ətshə ə pa: «Mbrə yekɔ də̂ bə ê əmə tə ə̂rɔ̂ əzü kɔ? Ə̈bə̈ əzü bale sə sə tə ə̂rɔ̂ əzü ne, kʉtə̂ Ndjapä tshî. 20Bə wusə̂ aəpʉ ə̂në ə sə lə âgbɔ̂ əpʉ nə̂ Mayïzə kɔ gâ ye ə̂në ə pa: “Pä prä əwɔ əzü wala äkɔ̈ əzü ne, wö əzü wö ne, zɨ̈ angba zɨ̈ ne, pä pä əterə gâ lə kumu ngâ zə ne, lʉ̈ abä zə də əyï zə.”#18.20 Wu Wutu 20.12-16; Əpʉ 5.16-20.» 21Âgbɔ̂ əzü nə pâ kə ətshə ə pa: «Mə vɔ̂tə̂ kə bata aəpʉ sə̂ nɔ̂ pə lə mɔdɔ tə̂ əmə.» 22Ə̂në Jezu djî əpʉ səkɔ, tshə pâ kə ətshə ə pa: «Ə̈bə̈ ərə bale kə sə pə ndə kə pa bə mbrə nə: kä aərə nə̂ zə nɔ̂ ə krü tshelə ngendja nə tə̂ alayïəyo ka ə sɔtə̂ aərə mâ lafɔ-e. Mandânə, nä gâ əmə ə zä äwä əmə.» 23Alɔ ə̂në tshə djî əpʉ səkɔ, əyo sə̂ tə lɔsu ye tə bandanə, mbrə ə̂në tshə sə̂ də aərə ngbatshe.
24Jezu wû ə pa əyo sə̂ tə̂ lɔsu ye tə bandanə ə pâ əpʉ ə pa: «Kə li aawosə də aərə ngbatshe gâ lə Əgɔngerə nə̂ Ndjapä gbɔ ə gbɔ. 25Kə li əyïrishi gâ lə Əgɔngerə nə̂ Ndjapä gbɔ ə rô kə ro agia ə̂në əndje djî əɨrɨ ye ə pa shamo#18.25 Wu foto nə lə Mar 10.25. kɔ lə əgro swa.» 26Azü ə̂në əndje djî əpʉ səkɔ pâ: «Bale, əde kə lï ndə she lə kuzu?» 27Jezu kîrə əpʉ ə pa: «Ərə ə̂në azü lï lï ndə kə mbrə nə ne, Ndjapä lï ndə kə mbrə nə.»
28Piarə pâ: «Wü-a! Ä tshî aərə nə̂ ä nɔ̂ tʉ gâ ye â za äwä zə kɔ.» 29Jezu kîrə əpʉ kə əndje ə pa: «Djatra əpʉ, mə pa kə e: əzü ə̂në tshə tshî anda nə̂ ye wala əwɔ nə wala alaye nə wala abä nə də əyï nə wala aləvu nə tʉ mbrə Əgɔngerə nə̂ Ndjapä, 30tshə sə kə sɔtə̂ aərə ngbatshe ə ro pâ nə kpəsəye ə sə kə sə tə sorô piii tə̂ alɔ ə̂në ə sə kə na gu nə mandâ nə kɔ.»
Jezu pa əpʉ kwatə̂ye ə pa əne sə kə tshu â she
(Matiɔ 20.17-19; Markə 10.32-34)
31Jezu kô atrawaya nə morofo amanə bishi gâ ngotə̂ ye ə pâ kə əndje ə pa: «E wü-a! A sə kə na mâ Jeruzalamə, aəpʉ nɔ̂ ə̂në aawopandəma Ndjapä tâ gâ lə fraka gâ pâ Əgblə nə̂ Əzü kɔ, ndəma nə sə kə wutu nə. 32Əndje sə kə za ətshə gâ lə kəna azü ə̂në əndje wusə̂ Ndjapä wu ne kɔ, əndje sə kə mɔ ətshə ə gi əyo tə̂ ye ə ku ngrusu gâ tə̂ ye. 33Əndje sə kə da ətshə də djakwa, mandânə, əndje sə kə wo ətshə. Tə̂ vəta əlo nə, tshə sə kə she nə.» 34Bale, əndje djî tshelə əpʉ sə̂ djî bale ne, tshelə âdâ əpʉ səkɔ zâ tə̂ ye wû tə̂ əndje gâ ye. Əndje wûsə̂ âdâ əpʉ nə ə̂në Jezu yîndə kə pa nə kɔ wû ne.
Jezu grɔ rəka tə̂ ə̈bə̈ əyïbula mâ Jerikɔ
(Matiɔ 20.29-34; Markə 10.46-52)
35Alɔ ə̂në Jezu ndô trö də Jerikɔ kɔ, ə̈bə̈ əyïbula sə̂ gâ tʉ gâ ndʉ äwä ə sə̂ kə e ətshe ndə aərə. 36Tshə djî tshema ə̂kpû azü nə ə̂në əndje sə̂ kə ro nə kɔ ə yû ətshe ə pa: «Ərə yekɔ kə sə̂?» 37Əndje pâ kə ətshə ə pa Jezu, əzü əgɔ Nazaratə kə ro kɔ. 38Bale, tshə tâ râwâ ə pa: «Jezu, Ɨrɨ Davidə, wü əyo əmə!» 39Azü ə̂në əndje sə̂ gâ ətshinə kɔ ngâ kə ətshə ndə kə pa tshə ngbo ama ye gâ tə̂ nə, bale, tshə tâ râwâ nə kwatə̂ye rô pâ nə ə pa: «Ɨrɨ Davidə, wü əyo əmə!» 40Jezu kâ ə zâ ama ə pa əndje na də ətshə. Alɔ ə̂në tshə nâ trö də ətshə gâ ye kɔ, Jezu yû ətshə ə pa: 41«Bə yində nə ə pa mə mbrə yekɔ kə əbə?» Tshə kîrə əpʉ ə pa: «Âgbɔ̂ Əyïngerə, mə yində kə lishi!» 42Jezu pâ kə ətshə ə pa: «Lïshi! Lɔsu zə shê əbə lə kuzu gâ ye.» 43Kʉ pə kôto səkɔ, tshə vɔ̂tə̂ kə lishi ə zâ äwä Jezu nə ə mbê Ndjapä. Ə̂kpû azü nə nɔ̂ wû ərə səkɔ, əndje mbê ndje Ndjapä nə.
Kasalukuyang Napili:
Luki 18: liy
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
2025 Association Centrafricaine pour la Traduction de la Bible et l'Alphabétisation
Luki 18
18
Əpʉ nə̂ əmbrʉ əyïngbanga də yashe koya
1Jezu pâ əpʉ kəwû kə atrawaya nə̂ ye ndə kə yisə̂ nə kə əndje ə pa, əndje yu Ndjapä alɔnɔ̂, əndje katə̂ kə yu ətshə ka ne. 2Tshə pâ kə əndje ə pa: «Ə̈bə̈ əyïngbanga sə̂ je lə ə̈bə̈ gala, ə̂në tshə kpê rawa Ndjapä kpê ne ə kpê rawa ə̈bə̈ əzü kpê bale ne. 3Ə̈bə̈ yashe koya sə̂ je ndje lə gala nə, ə̂në tshə nâ alɔnɔ̂ ə pâ kə ətshə ə pa: “Wä ngbanga lə takpa tə̂ ä də əyïəpʉ nə̂ əmə.” 4Äwä ngbatshe, tshə yîndə nə yî ne. Bale, mandânə, tshə pâ mâ tə̂ lɔsu ye ə pa: “Djatra əpʉ, mə kpe rawa Ndjapä kpe ne ə kpe rawa ə̈bə̈ əzü kpe bale ne, 5bale, mbrə ə̂në yashe koya səye sə kə toworo əmə, mə sə kə wa tshelə ngbanga nə̂ ye ndə kə pa tshə na na alɔnɔ̂ ə ka kumu əmə ne.”» 6Âgbɔ̂ Əyïngerə nə pâ kwatə̂ye ə pa: «E djï əpʉ ə̂në əmbrʉ əyïngbanga səkɔ pâ kɔ! 7Ndjapä sə sə kə wa tshelə ngbanga nə̂ azü ə̂në tshə kê əndje gâ ye kɔ, ə̂në əndje kɨ kə ətshə alɔnɔ̂ kɔ ne a? Tshə sə kə ka ə ka ʉrrr â kirə əpʉ kə əndje a? 8Mə pa kə e: tshə sə kə wa tshelə ngbanga nə̂ əndje diawû. Bale, alɔ ə̂në Əgblə nə̂ Əzü sə kə yi kumu ye, tshə sə kə sɔtə̂ azü ə̂në əndje sə də lɔsu kɔ pâ ashɔ səye a?»
Fariza də aworɔ ngendja lapɔ
9Tshə kwâtə̂ye ə pâ əpʉ kəwû səye mbrə alabə̈ azü ə̂në əndje wu ə pa alane sə tə aə̂rɔ̂ azü lə ala Ndjapä, ə̂në ə wu angâ əndje tə aamba azü lə ala əndje kɔ. Tshə pâ: 10«Azü bishi nâ mâ lə Anda Ndjapä ndə kə yu Ndjapä. Ə̈bə̈ nə bale sə̂ tə Fariza â bale nə sə̂ tə aworɔ ngendja lapɔ. 11Fariza nə kâ gâ lafɔ ə yû Ndjapä mâ lə ye ə pa: “Ndjapä, mə za mərshe kə əbə mbrə ə̂në mə sə sə mata ə̂dû azü ə̂në əndje sə tə alayïangba də alayïəmbrʉ ərə kɔ ə sə tə aawopra alawɔ angâ əndje də aläkɔ̈ angâ əndje kɔ ne. Mə za mərshe kə əbə mbrə ə̂në mə sə sə ndje mata aworɔ ngendja lapɔ səye ne. 12Mə sə kə ru tshelə əmə tə̂ rəgo äwä bishi lə dəmashi bale. Mə sə kə ko dimə aərə ə̂në mə sɔ̂tə̂ nə kɔ nɔ̂.” 13Bale, aworɔ ngendja lapɔ nə kâ ənə̂ ye ngrʉ̂ ə yî yîndə kə lishi gâ lafɔ ne. Tshə kô kəna ye gâ ndʉ əgʉ ye ə pâ: “Ndjapä, wü əyo əmə, mə sə tə əyïnyaka.”» 14Jezu pâ kwatə̂ye ə pa: «Mə pa kə e: alɔ ə̂në aworɔ ngendja lapɔ nə gû na ye gâ ndə ye kɔ, tshə sə̂ tə ə̂rɔ̂ əzü lə ala Ndjapä ə rô Fariza səkɔ. Mbrə ə̂në əzü ə̂në tshə mbrə tə̂ ye tə âgbɔ̂ əzü, əndje sə kə mbrə ətshə tə əngʉ əzü, əzü ə̂në tshə mbrə tə̂ ye tə əngʉ əzü, əndje sə kə mbrə ətshə tə âgbɔ̂ əzü.»
Əgɔngerə nə̂ Ndjapä sə mbrə azü ə̂në əndje sə mata aneshe
(Matiɔ 19.13-15; Markə 10.13-16)
15Azü nâ ndje də aə̂ngê aneshe kə Jezu ndə kə pa tshə goro əndje. Ə̂në atrawaya wû ərə sə̂ rəkɔ, əndje ngâ kə azü nə. 16Bale, Jezu pâ əndje e əndje â pâ əpʉ ə pa: «E kätə̂ aaya aneshe əndje na gâ tə̂ əmə! E känga äwä känga tə̂ əndje ne. Mbrə ə̂në Əgɔngerə nə̂ Ndjapä sə mbrə azü ə̂në əndje sə mata əndje kɔ. 17Djatra əpʉ, mə pa kə e: əzü ə̂në tshə yində Əgɔngerə nə̂ Ndjapä nə yi mata aya əgblə ne, tshə sə sə kə li gâ lə nə bale ne.»
Ə̈bə̈ əyï kə sə də aərə gâ ndə Jezu
(Matiɔ 19.16-30; Markə 10.17-31)
18Ə̈bə̈ âgbɔ̂ əzü yû Jezu ə pa: «Ə̂rɔ̂ awoyisə̂ ərə, ərə yekɔ də̂ mə lï ndə kə mbrə nə ndə kə sɔtə̂ sorô nə̂ alɔnɔ̂?» 19Jezu pâ kə ətshə ə pa: «Mbrə yekɔ də̂ bə ê əmə tə ə̂rɔ̂ əzü kɔ? Ə̈bə̈ əzü bale sə sə tə ə̂rɔ̂ əzü ne, kʉtə̂ Ndjapä tshî. 20Bə wusə̂ aəpʉ ə̂në ə sə lə âgbɔ̂ əpʉ nə̂ Mayïzə kɔ gâ ye ə̂në ə pa: “Pä prä əwɔ əzü wala äkɔ̈ əzü ne, wö əzü wö ne, zɨ̈ angba zɨ̈ ne, pä pä əterə gâ lə kumu ngâ zə ne, lʉ̈ abä zə də əyï zə.”#18.20 Wu Wutu 20.12-16; Əpʉ 5.16-20.» 21Âgbɔ̂ əzü nə pâ kə ətshə ə pa: «Mə vɔ̂tə̂ kə bata aəpʉ sə̂ nɔ̂ pə lə mɔdɔ tə̂ əmə.» 22Ə̂në Jezu djî əpʉ səkɔ, tshə pâ kə ətshə ə pa: «Ə̈bə̈ ərə bale kə sə pə ndə kə pa bə mbrə nə: kä aərə nə̂ zə nɔ̂ ə krü tshelə ngendja nə tə̂ alayïəyo ka ə sɔtə̂ aərə mâ lafɔ-e. Mandânə, nä gâ əmə ə zä äwä əmə.» 23Alɔ ə̂në tshə djî əpʉ səkɔ, əyo sə̂ tə lɔsu ye tə bandanə, mbrə ə̂në tshə sə̂ də aərə ngbatshe.
24Jezu wû ə pa əyo sə̂ tə̂ lɔsu ye tə bandanə ə pâ əpʉ ə pa: «Kə li aawosə də aərə ngbatshe gâ lə Əgɔngerə nə̂ Ndjapä gbɔ ə gbɔ. 25Kə li əyïrishi gâ lə Əgɔngerə nə̂ Ndjapä gbɔ ə rô kə ro agia ə̂në əndje djî əɨrɨ ye ə pa shamo#18.25 Wu foto nə lə Mar 10.25. kɔ lə əgro swa.» 26Azü ə̂në əndje djî əpʉ səkɔ pâ: «Bale, əde kə lï ndə she lə kuzu?» 27Jezu kîrə əpʉ ə pa: «Ərə ə̂në azü lï lï ndə kə mbrə nə ne, Ndjapä lï ndə kə mbrə nə.»
28Piarə pâ: «Wü-a! Ä tshî aərə nə̂ ä nɔ̂ tʉ gâ ye â za äwä zə kɔ.» 29Jezu kîrə əpʉ kə əndje ə pa: «Djatra əpʉ, mə pa kə e: əzü ə̂në tshə tshî anda nə̂ ye wala əwɔ nə wala alaye nə wala abä nə də əyï nə wala aləvu nə tʉ mbrə Əgɔngerə nə̂ Ndjapä, 30tshə sə kə sɔtə̂ aərə ngbatshe ə ro pâ nə kpəsəye ə sə kə sə tə sorô piii tə̂ alɔ ə̂në ə sə kə na gu nə mandâ nə kɔ.»
Jezu pa əpʉ kwatə̂ye ə pa əne sə kə tshu â she
(Matiɔ 20.17-19; Markə 10.32-34)
31Jezu kô atrawaya nə morofo amanə bishi gâ ngotə̂ ye ə pâ kə əndje ə pa: «E wü-a! A sə kə na mâ Jeruzalamə, aəpʉ nɔ̂ ə̂në aawopandəma Ndjapä tâ gâ lə fraka gâ pâ Əgblə nə̂ Əzü kɔ, ndəma nə sə kə wutu nə. 32Əndje sə kə za ətshə gâ lə kəna azü ə̂në əndje wusə̂ Ndjapä wu ne kɔ, əndje sə kə mɔ ətshə ə gi əyo tə̂ ye ə ku ngrusu gâ tə̂ ye. 33Əndje sə kə da ətshə də djakwa, mandânə, əndje sə kə wo ətshə. Tə̂ vəta əlo nə, tshə sə kə she nə.» 34Bale, əndje djî tshelə əpʉ sə̂ djî bale ne, tshelə âdâ əpʉ səkɔ zâ tə̂ ye wû tə̂ əndje gâ ye. Əndje wûsə̂ âdâ əpʉ nə ə̂në Jezu yîndə kə pa nə kɔ wû ne.
Jezu grɔ rəka tə̂ ə̈bə̈ əyïbula mâ Jerikɔ
(Matiɔ 20.29-34; Markə 10.46-52)
35Alɔ ə̂në Jezu ndô trö də Jerikɔ kɔ, ə̈bə̈ əyïbula sə̂ gâ tʉ gâ ndʉ äwä ə sə̂ kə e ətshe ndə aərə. 36Tshə djî tshema ə̂kpû azü nə ə̂në əndje sə̂ kə ro nə kɔ ə yû ətshe ə pa: «Ərə yekɔ kə sə̂?» 37Əndje pâ kə ətshə ə pa Jezu, əzü əgɔ Nazaratə kə ro kɔ. 38Bale, tshə tâ râwâ ə pa: «Jezu, Ɨrɨ Davidə, wü əyo əmə!» 39Azü ə̂në əndje sə̂ gâ ətshinə kɔ ngâ kə ətshə ndə kə pa tshə ngbo ama ye gâ tə̂ nə, bale, tshə tâ râwâ nə kwatə̂ye rô pâ nə ə pa: «Ɨrɨ Davidə, wü əyo əmə!» 40Jezu kâ ə zâ ama ə pa əndje na də ətshə. Alɔ ə̂në tshə nâ trö də ətshə gâ ye kɔ, Jezu yû ətshə ə pa: 41«Bə yində nə ə pa mə mbrə yekɔ kə əbə?» Tshə kîrə əpʉ ə pa: «Âgbɔ̂ Əyïngerə, mə yində kə lishi!» 42Jezu pâ kə ətshə ə pa: «Lïshi! Lɔsu zə shê əbə lə kuzu gâ ye.» 43Kʉ pə kôto səkɔ, tshə vɔ̂tə̂ kə lishi ə zâ äwä Jezu nə ə mbê Ndjapä. Ə̂kpû azü nə nɔ̂ wû ərə səkɔ, əndje mbê ndje Ndjapä nə.
Kasalukuyang Napili:
:
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
2025 Association Centrafricaine pour la Traduction de la Bible et l'Alphabétisation