2 Коринфӧ 10
10
Павел дорйӧ ассьыс кесъялӧмсӧ
1Ӧткымынӧн ме йылысь шуӧны, мый ме, Павел, на дінын рам, а кор ылын наысь, сэки ме чорыд накӧд. Но ме шыася тіян дінӧ Кристос бурлунӧн да мелілунӧн. 2Кора тіянӧс: кывзӧй менӧ, мед тіянӧ локтігӧн меным эз ковмы чорзьӧдчыны. Дерт, ӧткымынкӧд ковмас чорыда сёрнитны, ӧд найӧ шуӧны, мый ми олам тайӧ муюгыдсаыс моз. 3Кӧть ми олам тайӧ муюгыдас, но вермасям огӧ муюгыдсаыс моз. 4Миян вермасянторным абу мортсянь, сыын эм Енлӧн выныс. Ми жугӧдам сійӧн чорыд мытшӧдъяс, ковтӧм мӧвпъяс, 5да став кыпӧдчӧмсӧ, мый паныд сувтӧ Енсӧ тӧдмалӧмлы. Ми топӧдам быдпӧлӧс мӧвпъяс, медым найӧ кывзысисны Кристослысь. 6Ми дасьӧсь мыждыны быдпӧлӧс кывзысьтӧмлунысь, но сӧмын сэки, кор ті асьныд кутанныд тырвыйӧ кывзысьны.
7Видзӧдлӧй ас выланыд: коді зумыда эскӧ, мый сійӧ Кристослӧн, мед тӧдӧ, мый ми тшӧтш Кристослӧн. 8Меным абу яндзим, весиг кӧ ёнджыка на ошйыся. Ӧд ме ошйыся сыӧн, мый Господь пуктіс миянӧс ыджыдавны тіянӧс ёнмӧдӧм могысь, эз жугӧдӧм могысь. 9Ме ог кӧсйы, мед ті мӧвпалінныд, быттьӧ аслам гижӧдъясӧн повзьӧдла тіянӧс. 10Кодсюрӧ шуӧны, мый гижӧдъясам ме чорыд да вына, а на дінын ме жеб, и сёрниӧй менам вынтӧм. 11Тадзи мӧвпалысь мед тӧдӧ: кутшӧмӧсь ми гижӧдын, сэтшӧмӧсь и тіян дінын.
12Ми огӧ лысьтӧй орччӧдны асьнымӧс либӧ ӧткодявны асьнымӧс вывтіасьысьяскӧд. Найӧ видзӧдӧны сӧмын ас выланыс да донъялӧны асьнысӧ ас сертиныс. Тадзи вӧчигӧн найӧ петкӧдлӧны ассьыныс мывкыдтӧмлунсӧ. 13Ми огӧ ошйысьӧй этш тӧдтӧг. Ошйысям сӧмын сійӧн, мый Енмыс шуис вӧчны миянлы. Сійӧ тшӧктіс уджавны тшӧтш тіян пӧвстын. 14Ми огӧ торкалӧй Енлысь шуӧмсӧ. Ми кӧ эгӧ локтӧй тіян дінӧ, артмис эськӧ торкалӧм, но ми локтім тіян дінӧ Кристослӧн Бур Юӧрнас. 15Ми огӧ ошйысьӧй этш тӧдтӧг, огӧ ошйысьӧй мукӧдлӧн уджъясӧн, но лача кутам, кор тіян эскӧмныд ёнмас, сэки миян уджыс ёнджыка на паськалас тіян пӧвстын. 16Сэки ми вермам водзӧ мунны да висьтавлыны Евангелльӧсӧ, а огӧ кутӧй мукӧдлӧн уджъясӧн ошйысьны. 17Ӧд шуӧма: «Ошйысьысь мед ошйысьӧ Господьӧн». 18Шогмана абу сійӧ, коді асьсӧ ошкӧ, а кодӧс ошкӧ Господь.
Kasalukuyang Napili:
2 Коринфӧ 10: КБ
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
(c) Institute for Bible Translation, Finland, amp Finnish Bible Society, 2023