Mateo 1
1
Sema Tonton Jesus
(Luke 3:23-38)
1Sejay i tonton Jesu Criston polin David tan si Abraham. 2Si Abraham, awen Isaac; si Isaac, awen Jacob; si Jacob, awen Judah tan sema iren ahi to. 3Si Judah, awen Perez ni Zehar, tan si Tamar i inecha. Si Perez, awen Hezron, tan si Hezron, awen Ram. 4Si Ram, awen Amminadab; si Amminadab, awen Nahshon; si Nahshon, awen Salmon; 5si Salmon, awen Boaz, tan si Rahab i ineto. Si Boaz, awen Obed, tan si Ruth i inen Obed. Si Obed, awen Jesse, 6tan si Jesse, awen Ari David.
Si David, awen Solomon, tan sema imbaliy den Uriah i ineto. 7Si Solomon, awen Rehoboam; si Rehoboam, awen Abijah; si Abijah, awen Asa. 8Si Asa, awen Jehoshaphat; si Jehoshaphat, awen Joram; si Joram, awen Uzziah. 9Si Uzziah, awen Jotham; si Jotham, awen Ahaz; si Ahaz, awen Hezekiah. 10Si Hezekiah, awen Manasseh; si Manasseh, awen Amos; si Amos, awen Josiah. 11Si Josiah, awen Jechoniah tan ahi to nonta timpon epilit iriy Hodjos a imekal cha ili chen iyanbalin iren bagaen cha Babylonia.
12Nonta iyakcheng a epilit iriy Hodjos a imekal cha ili cha, in-anak Jechoniah si Shealtiel. Si Shealtiel, awen Zerubbabel. 13Si Zerubbabel, awen Abiud; si Abiud, awen Eliakim; si Eliakim, awen Azor. 14Si Azor, awen Zadok; si Zadok, awen Achim; si Achim, awen Eliud. 15Si Eliud, awen Eleazer; si Eleazer, awen Matthan; si Matthan, awen Jacob. 16Si Jacob, awen Joseph, tan si Joseph, imbaliy Maria a engianak Jesus a ngichanan cha na Cristo.
17Isonga, sema emi-emiin, manipod nonta timpon Abraham ingkathod timpon David, sawal na epat i afo-afo tho. Manipod nonta timpon David ingkathod timpon epilit iriy Hodjos a imekal cha ili cha, sawal na epat ngoy afo-afo tho. Manipod nonta timpon gwara iriy Hodjos cha Babylonia ingkathod ingkay-anak na Cristo, sawal na epat ngoy afo-afo tho.
Sema Ingkay-anak Jesu Cristo
(Luke 2:1-7)
18Sejay i istoriya na ingkay-anak Jesu Cristo. Si Maria a ineto, iyaykarin mekiimbaliy cha Joseph, nem idi eg ira nin iyantakchol, aamtaan i iyabchel si Maria babaen na panakabalin na Ispirito Santo. 19Si Joseph a imbaliy to, napiyati tho na olay i dinteg Moses, nem eg to piyan a baingan si Maria, isonga niyemnem ton isi-jan a eg to ipaamted chakel a too. #1:19 Sema ogadi iren ma Hodjos nonta timpon Jesus, no gwariy dahin iyaykarin mekiimbaliy cha marikit, iyaybilang malen imbaliy to. No nat piyan niwa dahin ontoloy, mesepol a i-kanan to ma bii na papil a mengipaneknek a isi-jan to. Mesepol pay a gwariy chegwen meni-neng na iyantolagan cha. 20Idi niyemnemnem Joseph iwan, iyanparang i anghil Afo Chiyos a kiyokip ton kigwan to i “Joseph a polin David, enog i chanag a imbaliyen mos Maria tep sema inbechel to, epasamak na panakabalin na Ispirito Santo. 21Mengi-nak na dahi, et panngaran mo na Jesus tep si-kathoy mengisalakan na tothoo thod basol cha.” #1:21 Sema banag na ngaran Jesus, sema mengisalakan. 22Epasamak a emiin ira jay say metongpal i inpangowan Afo Chiyos cha profita a:
23“Mebchel i biin eg enarog
na dahi,
et mengi-nak na dahin
mengechanan na
Emmanuel.” #1:23 Isaiah 7:14
(Sema banag na Emmanuel, gwares Afo Chiyos cha si-kathayo.) 24Idi bimangon si Joseph, imag to ma kigwan niwa anghil Afo Chiyos, et inbetik tos Maria a imbaliy tod baliy to, 25nem eg to chichog ingkathod iyay-anak iwa nga-nga. Idi iyay-anak iwa nga-nga, ngichanan to na Jesus.
Kasalukuyang Napili:
Mateo 1: KAR
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2023 Wycliffe Bible Translators, Inc. All rights reserved.