Éxodo 37
37
Baúl hina arcamanta
(Ex 25.10-22)
1Bezaleelqa ruwallarantaqmi baúl hina *arcatapas acacia nisqa sach'apa tablanmanta. Chay arcapa largonmi mediran huk metro chunka centimetroyoqta. Anchonmantaqmi mediran soqta chunka pishqayoq centimetrota. Saynallataqmi sayayninmanpas mediran soqta chunka pishqayoq centimetrota. 2Hinaspan chay arcataqa qori purowan llut'iran ukhunta hinallataq hawantapas. Saynallataqmi chay arcapa enteron patankunapaqpas qorimanta moldurata ruwaran. 3Ruwallarantaqmi qorimanta tawa argollakunatapas. Hinaspan chay arcapa esquinankunapa tawantin chakinman chay argollakunataqa churaran. Ishkaytan huknin ladonman churaran, ishkaytataq huknin kaq ladonman. 4Ruwallarantaqmi acacia nisqa sach'apa k'aspimanta varillakunatapas. Hinaspan chay varillakunataqa qoriwan llut'iran. 5Hinaspan chay varillakunataqa arcapa sapa lawninpi argollakunaman ustuchiran. Saynapin chay varillakunaqa serviran, chay arcata wantunankupaq.
6Ruwallarantaqmi baúl hina arcapa tapantapas qori puromanta. Chay arcapa tapanmi largonman mediran huk metro chunka centimetroyoqta. Anchonñataqmi mediran soqta chunka pishqayoq centimetrota. 7Ruwallarantaqmi martillowan takashaspalla qorimanta ishkay *querubinwan sutichasqa huk clase *angelkunatapas chay arcapa sapa law puntankunapaq. Hinaspan chay querubinkunata arcapa tapanpa ishkaynin puntankunaman churaran. 8Huknin kaq querubinmi churasqa karan tapapa huknin puntanpi. Huknin kaqñataqmi churasqa karan tapapa huknin kaq puntanpi. Saynapin chay querubinkunaqa arcapa tapanwan huk piezalla karan. 9Chay querubinkunaqa chimpapurankan k'umuyuspa arcapa tapanta qawaranku. Saynallataqmi raphrankupas kicharisqa karan, saynapi arcapa tapanta tapananpaq.
T'anta churanapaq mesamanta
(Ex 25.23-30)
10Saynallataqmi Bezaleelqa ruwallarantaq huk mesatapas acacia sach'apa tablanmanta. Chay mesapa medidankunan khayna karan: Largonmi esqon chunka centimetrota mediran. Anchontaqmi tawa chunka pishqayoq centimetrota mediran. Saynallataqmi sayayninpas soqta chunka pishqayoq centimetrota mediran. 11Hinaspan chay mesataqa qori purowan llut'iran. Saynallataqmi mesapa enteron muyuriqninpipas qorimanta moldurata churaran. 12Ruwallarantaqmi chay mesapa muyuriqninpipas adornokunata qanchis centímetro anchoyoqta. Hinaspan qori puromanta moldurakunata churaran. 13Saynallataqmi ruwallarantaq qorimanta tawa argollakunatapas. Hinaspan mesapa tawantin esquinanman churaran, chakinkunapa waqtanpi. 14Chay argollakunaqa churasqa karan chay adornokunapa urachanpin, saynapi chay argollakunaman varillakunata ustuchispa apanankupaq. 15Chay varillakunataqa acacia sach'amanta ruwaspan, qori purowan llut'iran. Chay varillakunaqa mesata wantunankupaqmi serviran. 16Saynallataqmi ruwallarantaq mesa pataman churananpaq qori puromanta platokunata, wishllakunata, jarrakunata hinallataq vasokunatapas. Chay jarrakunaqa hinallataq vasokunapas vino *ofrendata ofrendanankupaqmi valeran.
Qorimanta ruwasqa mechero hina candelabromanta
(Ex 25.31-40)
17Saynallataqmi Bezaleelqa ruwallarantaq qori puromanta mechero hina k'anchaq *candelabrotapas. Chay candelabrotaqa martillowan takashaspallan ruwaran. Chay candelabropa tiyananpaq basenpas, tronconpas, copankunapas hinallataq adornananpaq phanchirishaq t'ikankunapas qori puromanta ruwasqan huk piezalla karan. 18Chay candelabroqa soqta brazoyoqmi karan. Chay candelabropa tronconpa sapa lawninpin kinsa brazonkuna karan. 19Chay candelabropa soqtantin brazonkunapin karan phanchirishaq almendro t'ika hina copakuna. Chay t'ika hina copakunaqa sapankama brazopin kinsa karan. 20Chay candelabropa chawpinpi kaq troncopitaqmi tawa copakuna karan, phanchirishaq almendro t'ika hina. 21Chay candelabropa tronconpin kinsa bolachakuna karan. Chay bolachakunan serviran kinsantin pares brazokunata hap'inanpaq. 22Chay bolachakunaqa huk piezallan brazonkunawan karan. Chaykunaqa llapallanmi martillowan takashaspalla ruwasqa karan qori puromanta. 23Saynallataqmi Bezaleelqa ruwallarantaq qanchis lamparakunata, mechata arreglanapaq tenazakunata hinallataq ushpata oqarinapaq platochakunatapas. Chaykunataqa qori puromantan ruwaran. 24Chay candelabrotaqa tukuy imaymanantintan kinsa chunka kinsayoq kilo qori puromanta ruwaran.
Incienso k'ananapaq altarmanta
(Ex 30.1-5)
25Saynallataqmi Bezaleelqa acacia nisqa sach'apa tablamanta ruwallarantaq incienso k'ananapaq huk *altarta. Chay altarqa cuadradon karan. Largonpas hinallataq anchonpas tawa chunka pishqayoq centimetrotan mediran. Sayaynintaqmi esqon chunka centimetrota mediran. Chay tawantin esquinanpi kaq waqrakunaqa ch'ulla piezallan altarwanqa karan. 26Chay altarpa hawanta, tawantin ladonkunata hinallataq tawantin waqrankunatawanmi, qori purowan llut'iran. Saynallataqmi ruwallarantaq altarpa muyuriqninpi qorimanta moldurakunatapas. 27Hinaspapas ruwallarantaqmi qorimanta tawa argollakunatapas. Hinaspan altarpa huknin kaq ladonpi ishkay argollakunata churaran moldurapa uranpi. Saynallataqmi altarpa huknin kaq ladonpipas churallarantaq ishkay argollakunata. Chay argollakunamanmi varillakunata ustuchiran, saynapi chay altarta wantunankupaq. 28Chay altarpaq varillakunataqa acacia nisqa sach'apa k'aspinmantan ruwaran. Hinaspan qoriwan llut'iran.
29Bezaleelqa ruwallarantaqmi ch'uyanchanapaq kaq aceitetapas hinallataq sumaq q'apaq inciensotapas. Chaykunataqa ruwaran imaynan huk perfume ruwaq runapas ruwashanman chay hinatan.
Kasalukuyang Napili:
Éxodo 37: QEAÑT
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional