मत्ती 7
7
न्याय मना करो
(लूका 6:37,38,41,42)
1“कोईका बी पाप भर्या करमा को न्याय मना करो जिऊँ परमेसर बी थारा पाप भर्या करमा को न्याय कोनी करसी। 2#मर 4:24क्युं क थारो बी फेसलो बंय्यांई कर्यो जासी, जंय्यां थे न्याय करबाळी टेम दुसरा मिनखा क सागै करो हो। अर जि नापऊँ थे दुसरा ताँई नापो हो बि नापऊँई थारै ताँई बी नाप्यो ज्यासी। 3तनै डूँगर बळती तो दिखै पण पगा बळती कोनी दिखै। 4तनै खुदकी बडी-बडी गळत्या तो सुजैई कोनी अर चाल्यो दुसरा की छोटी-छोटी गळत्यानै सुदारबा जणा पाछै तू कंय्यां खे सकै ह आ भाईड़ा म तेरी गळत्यानै सुदार द्युँ। 5ओ ढोंगी पेली खुदकी बडी-बडी गळत्यानै तो सुदारले जणा पाछै कठै जार तू ओरा की छोटी-छोटी गळत्यानै पिछाणर बानै सुदारबा म बाकी मदद कर सकै ह।
6“पबितर चिजा#7:6 पबितर चिजा चढावा म चढाईड़ो मास गंडक्ड़ा क आगै मना गेरो। अर नइ सूल्डा क आगै मोती बखेरो। क्युं क ज थे अंय्यां करस्यो जणा बे सूल्डा आ मोत्यानै आपका पगा तळै रूंदसी, अर गंडक्ड़ा बी पाछै मुड़र थानै पाड़ गेरसी।”
थे जोक्यु बी चाओ हो बि ताँई परमेसरऊँ अरदास करो
(लूका 11:9–13)
7“परमेसरऊँ माँगो, जणा थानै दिओ जासी। अर ढुंढो जणा थानै लाधसी अर खुड़काओ जणा थारै ताँई खोल्यो जासी। 8क्युं क जखो माँगै, बिनै मिलै ह, जखो ढुंढै ह बिनै लाधै ह, जखो खुड़कावै ह बि ताँई खोल्यो जावै ह। 9थारै म अंय्यां को कूणसो बाप ह जिऊँ बिको बेटो रोटी माँगै जणा बो बिनै भाठा देवै ह? 10अर नइ अंय्यां को बाप ह जिऊँ बिको बेटो मछी माँगै जणा बिनै साँप पकड़ावै। 11ज थे बुरा होर बी थारा टाबर-टिकरानै चोखी चिज देबो जाणो हो। जणा थारो परम-पिता जखो ईस्बर नगरी म बिराजै ह बे बाऊँ माँगबाळा मिनखानै चोखी चिजा क्युं कोनी देसी? 12#लूक 6:31इ ताँई थे मिनखाऊँ बंय्यां को बरताव करो जंय्यां को थे बाऊँ चाओ हो। क्युं क ओ नेम-कायदा अर परमेसर की खेबाळा क जरिए परमेसर दिओ ह।
सकड़ो बारनो
(लूका 13:24)
13“सकड़ा बारना क गेलाऊँ बड़ो क्युं क चोड़ा बारना को गेलो नास कानि लेज्यावै ह। बोळा मिनख ह जखा चोड़ा बारना का गेलाऊँ जार्या हीं। 14पण सकड़ा बारना को गेलो जीवन कानि जार्यो ह। अर थोड़ा मिनख इ गेलै जार्या हीं।
करमाऊँ बेरो चालै ह क कूण कंय्यां को ह।
(लूका 6:43,44)
15“थे बा परमेसर की खेबाळाऊँ बचर रेहज्यो जखा झूठ बोलै ह! बे लल्डी की खोळ म पाड़ खाबाळा ल्याळी हीं। 16पण थे बानै बाका करमाऊँ पिछाण लेस्यो। क्युं क थे जाणो हो क झाड़ी क अँगूर कोनी लागै अर नइ केर क अंजीर। 17अंय्यांई चोखा दरखत क चोखा फळ अर बुरा दरखत क बुरा फळ लागै। 18अर नइ एक चोखा दरखत क बुरो फळ लाग सकै ह अर नइ एक बुरा दरखत क चोखा फळ लाग सकै ह। 19#मत्त 3:10; लूक 3:9पण जि दरखत क चोखा फळ कोनी लागै, बिनै का'टर आग क मांयनै बाळ्यो जावै ह। 20#मत्त 12:33इ ताँई म थानै ओज्यु खेऊँ हूँ क थे बा मिनखानै बाका करमा का फळाऊँ पिछाण लेस्यो।
ईस्बर नगरी म कूण ज्यासी
(लूका 13:25–27)
21“परबु-परबु करबाळा सगळा मिनख ईस्बर नगरी राज म कोनी ज्यासी। पण जखो बी मिनख ईस्बर नगरी म रेह्बाळा मेरा परम-पिता की इंछ्या गेल चालै ह, बोई बिमै ज्यासी। 22बि न्यायहाळै दिन बोळा मिनख मनै खेसी, ‘परबु हे परबु! म्हें थारै नामऊँ थारी बाता कोनी बताया हा के? अर थारै नामऊँ ओपरी बलायानै कोनी भगाया के? अर थारै नामऊँ बोळासारा ताजूब का काम कोनी कर्या हा के?’ 23जणा म बानै साप-साप खेस्युं क, ‘म थानै कोनी जाणू। हे बुरा करम करबाळो मेरै कनैऊँ चल्या जाओ।’
दो मिनख
(लूका 6:47–49)
24“इ ताँई जखो बी मेरा बचनानै सुणै ह अर बापै चालै ह बिकी बराबरी बि बुदीमान मिनखऊँ करी गई ह जखो आपको घर ढाड प बणायो, 25जणा मी बरस्यो, बाढ आई, भाळ की फटकार लागी पण बो ढयो कोनी क्युं क बि घर की निम ढाड प धरेड़ी ही। 26पण जखो बी मिनख मेरा बचनानै सुणै तो ह पण बापै चालै कोनी, बो बि बावळा मिनख की जंय्यां ह जखो आपको घर बाळू प बणायो, 27अर जद मी बरस्यो, बाढ आई, भाळ की फटकार लागी जणा बो घर ढेग्यो।” 28#मर 1:22; लूक 4:32अर जद ईसु आपकी बाता बानै खे सुणाई, जणा बि भीड़नै ईसु की सीख प ताजूब होयो। 29क्युं क ईसु बानै यहूदि नेता की जंय्यां कोनी पण एक अधिकार क सागै सीख देर्यो हो।
Kasalukuyang Napili:
मत्ती 7: एस डब्लु वी
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
(c) 2010-2017, New Life Computer Institute. All rights reserved
