Zowɛl 2
2
A Sore bibir pɩɛl'a
1Nyɩ pɛblɩ wɩ́ɛ a Sɩyɔ̃ tẽw,
nyɩ lɔb cɛl a Naaŋmɩn tã-sõw#2:1 Naaŋmɩn tãw-sõw: Nyɛ̃ Ezek 20.40. zu.
A tẽw dem za, bɛ màwr,
a Sore bibir tarɛ na, ʋ pɩɛl'a.
2Liw-varkpara bibir'ʋ,
zũzuwe nɩ zũzuw-sɛblɛ bibir'ʋ.
Sãsowe na yãwmɛ ɛ́ kpɛmɛ a, waar'a,
a yɛ́r'a pàw a tan mɛ̃ a zi-wɛl-paala cãà a.
Nɩr bɛ dãw nyɛ̃ a ɩ,
ɛ́ nɩr kʋ̃ lɛb nyɛ̃ a ɩ a pùorí towtow ɛ.
3A sãsowe niŋé a, vũu nyɔw na dɩrɛ,
ɛ́ a sãsowe pùorí a ɩ vũu-zɛlɛ
na dɩrɛ pelempelem a.
A na bɛ tɩ tɔl sɛr a, a tẽw tɩ ɩ na mɛ̃
Edɛn tẽw zaadɛ̃#2:3 Nyɛ̃ Yzt 2.8-9. a,
ɛ́ a na wa tɔl baarɩ a,
ʋ ɩ n wɛja-kpalɛ faa faa.
A bɛ jɩɩrɩ bom za bɛr ɛ.
4A ɩ na mɛ̃ wie a,
mɛ̃ wi-zɔmnbɛ na gárɛ nɩ a bɛ wie a.
5A ɩ na mɛ̃ zɛbr-torkori
na vàrɛ lʋɔrɛ a tan ɩrɛ gɔmɛ a,
mɛ̃ vũu na dɩrɛ mɔ̃-kon a ɩrɛ gɔmɛ a,
mɛ̃ nɩ-bʋʋrɛ na kpɛmɛ ɛ́ pɩɛrɩ a zɛbr ƴãw a.
6A sãsowe á ŋá niŋé a,
pʋl-vʋ̃ɔ nyɔw nɩ a nɩbɛ,
a bɛ za zugamɛ bɩrɛ.
7A zɔrɛ na mɛ̃ gãdaar a,
a nyɔw nɩ a tẽw dacine dúor mɛ̃ zɛbr-nɩbɛ a,
ŋa za mɩ́ tori nɩ niwn cere, a bɛ bɩ̀ɛrɛ ɩ.
8Kãw za bɛ daarɛ a ʋ tɔ ɩ,
ŋa za na mɩ́ tu a ʋ sɔ́r cere a ƴãw.
Bɛ tɛbr'a, ɛ́ a zɔrɛ ɛ́ bɛ bʋ́rɛ yaarɛ ɩ.
9A bʋwl'ɩ a tẽw pʋɔ,
a zɔrɛ nɩ a tẽw dacine zu,
a dúor'a kpɩɛr a yie pʋɔ,
mɩ́ tu a tokoro vɛɛ ƴãw kpɛ mɛ̃ nyãnyuwr a.
10Alɛ wa tarɛ a, a tẽsɔw mɩ́ dam'a,
ɛ́ a salom ɩ mɛ̃ ʋ lore na a,
a mʋ̃tɔ̃w nɩ a cuw bɛ mɩ́ cãà caalɛ ɩ,
ɛ́ a ŋmar-bie bɛ cãà nyɩwrɛ ɩ.
11A Sore be n a ʋ zɛbr-nɩbɛ niŋé ɛ́ ŋmɛrɛ kɔkɛɛ.
A ʋ zɛbr-nɩbɛ ʋ na mɩ́ ƴɛ̀r, bɛ tu a lɛ ʋ na yel a
yãwmɛ na ɛ́ tɛr fãw bɛ dɩ vuo ɩ.
A Sore bibir ɩ n kpɛ̃ɛ,
ʋ tɛr'ɩ pʋl-vʋ̃ɔ-yaga, ãa n'ʋ na tʋ̃ɔ́ ʋ?
A Sore zie lɛb-waa daar'ɩ à à ŋá
12A Sore yere na: «Vuo cãà nɩ be
a ɩ̃ zie lɛb-waa ƴãw a ƴɛrɛŋa.
Nyɩ lɛb wa a ɩ̃ zie nɩ a nyɩ pʋɔ za:
nyɩ tɛr mʋta-tuo, nyɩ kone cire mʋta-kʋ̃ɔ,
nyɩ tuo nuru zũú kone nɩ.
13A nyɩ kparɩ bɛ n'a nyɩ na taw cɩɛrɩ ɛ,
a nyɩ socie n'a a fɛr kɛ́ nyɩ lɩɛbɩ.»
Nyɩ lɛb wa a Sore nyɩ Naaŋmɩn zie:
nɩ-vla n'ʋ ɛ́ zɔrɛ nɩbaalʋ,
a ʋ suur bɛ pawr ɛ, ɛ́ ʋ ɩ nɔ̃wfʋ tɛwr,
a nɩr dɔwrʋ mɩ́ ɩ ʋ nɩ kpɩɛrʋ.
14Ãa bãw? Kapaw ʋ nãà lɛb'a bɛr
a lɛ ʋ na tɩ tɩɛrɛ k'ʋʋ ɩ a, ɛ́ maalɩ nyɩ yaga za.
Lɛ n'a nyɩ na wa n kukur de-kʋ̀b
nɩ divɛ̃ de-kʋ̀b bome wa kʋ̀ ʋ.
A mʋta-tuo tɛrʋ nɩ a Naaŋmɩn yãayãa zɛlʋ daar'ɩ à à ŋá
15Nyɩ pɛblɩ wɩ́ɛ a Sɩyɔ̃ tẽw pʋɔ,
nyɩ ƴãw mʋta-tuo be be, nyɩ tɛr kpaa-ta-sõw.
16Nyɩ bʋɔlɩ a nɩbɛ za ɓã taa, nyɩ tɛr kpaa-ta-sõw.
Nyɩ bʋɔlɩ a nɩ-kore ɓã taa,
nyɩ bʋɔlɩ a bibiir ɓã taa,
tɩ lãwnɩ a bɛl na cãà ƴɛnɛ a.
A dɛb-sãan ʋ yi a ʋ dĩó,
ɛ́ a pɔw-sãan yi a ʋ di-gana pʋɔ.
17A bàwr-maalbɛ na tone a Sore a,
bɛ kone a Ŋmɩn-yir-kpɛ̃ɛ pʋɔ,
a zawle nɩ a bàwr-maal-kuur cará.
Bɛ lɔbr nuru zɛlɛ nɩ a Naaŋmɩn à ŋá:
«Sore e, zɔ a fʋ nɩ-bʋʋrɛ nɩbaalʋ,
ta ɩ a fʋ nɩbɛ nyɛ̃ vĩ ɛ,
ta sàw nɩ-bʋʋr-yoru wa ɩrɛ tɩ laar yere nɩ:
“Nyɩnɛ n'a a bɛ Naaŋmɩn be?”»
A Sore sɔw nɩ a ʋ nɩ-bʋʋrɛ zɛlʋ puoru
18A Sore nɔnɛ nɩ a ʋ tẽw, ʋ zɔ n a ʋ nɩbɛ nɩbaalʋ,
19ɛ́ sɔw a bɛ puoru à ŋá:
«Ɩ̃ na lɛb'a kʋ̀ nyɩ a ble, a divɛ̃ nɩ a kãá.
Nyɩ na tɩ tɩw a na.
Ɩ̃ kʋ̃ lɛb sàw towtow nyɩ ɩ nɩ-ɩ-laarɩ
a nɩ-bʋʋr-yoru sɔgɔ ɩ.
20A nyɩ dɔ̃ dem na yi
a Saa-pɛrɩ́-gʋba-lowr waar a, ɩ̃ na diw bɛ na bɛr,
ɩ̃ na diw bɛ na bɛr tẽ-kpalɛ kon pʋɔ bɛ zãá,
ɩ̃ na diw nɩ a bɛ zɛbr-nɩbɛ na de niwn a
ƴãw Kʋ̃ɔ-kpɛ̃ɛ-kũu pʋɔ,
ɛ́ diw a pùor dem ƴãw a Mediterane kʋ̃ɔ-kpɛ̃ɛ pʋɔ.
A bɛ kũuni na nyuur'ɩ faa faa pàw a zie za.
A Sore maal'ɩ yel-bɛrɛ.
21Fʋ̃ʋ tẽw i, ta zɔrɛ dɛ̃bɩ̃ɛ ɩ!
A fʋ nʋ̃ɔ̀, ʋ pur yaarɩ,
a Sore na maalɛ yel-bɛrɛ a ƴãw.
22Nyɩɩm wɛ-dʋn ɩ, nyɩ ta zɔrɛ dɛ̃bɩ̃ɛ ɩ!
A dɩlãpʋɔ mʋ̃ɔ lɛb'a sɔb tĩtĩ,
a tɩɩr wɔnɛ na,
a kãkã-tɩɩr nɩ a divɛ̃ tɩɩr wɔ̃ n zorkporo.
23Nyɩɩm Sɩyɔ̃ tẽw dem i,
nyɩ cɩlɛ ƴawr'ɩ a Sore nyɩ Naaŋmɩn ƴãw.
Ʋ kʋ̀rɛ nyɩ nɩ a kpãcãan saa, a nyɩ faafʋ ƴãw.
Ʋ mɩ́ ɩ n a kpãcãan saa
nɩ a sɩ̃ɛ-kpɛ-paala saa a wa,
a wa mɛ̃ a dãwdãw a.
24A bowe paal'ɩ ble,
a dʋw-bɛrɛ paal'ɩ divɛ̃ nɩ kãá cire.
25A Sore yere na:
Ɩ̃ lɛb'a kʋ̀rɛ nyɩ a yome al za bʋ̃-kʋ́ɔrɩ
a tãatuli, a sãsowe, a zãzule
nɩ a sãsow-nãa-nʋrɩ na 'wɔb a#2:25 Nyɛ̃ 1.4,6-7.,
al na ɩ a ɩ̃ zɛbr-nɩ-yaga ɩ̃ na tõ a nyɩ ƴãw a.
26Nyɩ na mɩ́ dɩ na tɩw,
nyɩ na danɛ mɛ̃ na,
a mãa Sore nyɩ Naaŋmɩn
na maalɛ nɔ-ɓãa-yele a nyɩ ƴãw a.
A ɩ̃ nɩbɛ bɛ be za na lɛb nyɛ̃ vĩ towtow ɛ.
27Lɛ n'a nyɩ na bãw k'ɩ̃ɩ be n
a nyɩ sɔgɔ, Ɩsɩrayɛl nɩbɛ ɛ,
k'aa Sore nyɩ Naaŋmɩn a, mãa n'ʋ,
kãw za bɛ lɛb be be ƴãw pʋɔ ɩ.
A ɩ̃ nɩbɛ bɛ be za na lɛb nyɛ̃ vĩ towtow ɛ.»
Kasalukuyang Napili:
Zowɛl 2: DBDC
Haylayt
Kopyahin
Paghambingin
Ibahagi
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
La Bible en Dagara © Alliance Biblique du Burkina Faso, 2013.