Amɔsɩ 4
4
1Nyɩɩm pɔwbɛ na be
a Samaari tãw zu ɩ zʋ̃zʋlɛ zʋ̃zʋlɛ
mɛ̃ Basan tẽw nĩi a,
nyɩ bɛrɛ wone a ƴɛ̀rʋ ŋa:
nyɩ nɛbr'ɩ a bãbàalbɛ ɛ́ dɔwrɛ a nɩ-kɔmɛ,
ɛ́ yere a nyɩ sɩrbɛ: «Nyɩ de a nyub wa n!»
2A Sore pɔ na yel:
«Mãa wa sɩrɩ n'ɩ a Naaŋmɩn na ɩ sõw a,
bibie waar'a na vɩɛ a nyɩ zu,
bɛ na vɩr nyɩ been been ír tɩ tɔ a pɛ-baara,
mɛ̃ zʋ́mɛ́ zʋm-pĩi na nyɔw a.
3Dacin vʋɔrɩ́ n'a nyɩ na mɩ́ yi,
ŋa za niwn na dɛ tori a lɛ a,
ɛ́ bɛ na diw nyɩ na ƴãw
a tẽw saa-pɛrɩ́-gʋba-lowr sɔ́r.»
A Sore n'ʋ yel.
A Ɩsɩrayɛl nɩbɛ bàwr-fofoe
4«Ɩsɩrayɛl nɩbɛ ɛ,
nyɩ gaarɛ a ɩ̃ zie cere a Betɛl,
nyɩ gaarɛ zuo a lɛ cere a Gilgal#4:4 Betɛl: Nyɛ̃ 3.14 nɩ a manʋ. — Gilgal: A yúor ŋa pɛr'ɩ “Ɩ̃ ír'ɩ a nyɩ vĩ bɛr”. A Zurdɛ̃ bà-fʋɔla zi-sõw tɩ n'ʋ. Nyɛ̃ Zoz 5.9..
Nyɩ na ta gã dãw bio a, nyɩ maalɩ a nyɩ bagɛ,
ɛ́ a deyere daar nyɩ tɩr a nyɩ bʋ̃-kʋ̀rɩ.
5Nyɩ maalɩ yãanɩ puoru bagɛ#4:5 Nyɛ̃ Lev 7.13.,
nyɩw a dipɛ̃ na ƴãw dãbɩl a
a bàwr-maal-kuur zu.
Nyɩ yel a nɩ-yaga pʋɔ
a bʋ̃-tɛrɩ nyɩ na nɔnɛ de kʋ̀ a Naaŋmɩn a,
lɛ n'a na nyɩ nɔnɛ a.»
A Sore Naaŋmɩn n'ʋ yel.
A Ɩsɩrayɛl nɩbɛ kpãa nɩ tobr
6«A mãa, mãa n'ʋ ɩ kɔ̃ nyɔw nyɩ a ten za pʋɔ,
mãa n'ʋ ɩ a dipɛ̃ dɩ nã́w a be za nyɩ na be a,
ɛcɛ nyɩ bɛ lɛb wa a ɩ̃ zie ɩ.»
A Sore n'ʋ yel.
7«Mãa n'ʋ sɩb nyɩ a saa
a nyɩ bʋ̃-kʋ́ɔrɩ deb na tɩ cɛ cuwr ata a.
Ɩ̃ ƴãw na a saa wa tẽw ŋa, ɛ́ bɛr tẽw ŋa.
Púo ŋa tɩ páw nɩ a saa ɓaarʋ,
ɛ́ púo ŋa na bɛ páw a saa ɓaarʋ a ko gã.
8Nɩbɛ mɩ́ yi n ten ayi bɩɩ ata pʋɔ
kɔ̃kɔlɩ cen tẽ-yũo pʋɔ kɛ́ bɛ tɩ nyũ kʋ̃ɔ,
ɛ́ bɛ mɩ́ tɩ nyũ sɛw ɛ.
Ɛcɛ nyɩ bɛ lɛb wa a ɩ̃ zie ɩ.»
A Sore n'ʋ yel.
9«Ɩ̃ ƴãw na bàalʋ kpɛ a nyɩ ciri,
ɩ a ko bɩɩ pɔ̃ a dàar zu,
a nyɩ zaadɛ̃ pʋɔ bome nɩ a divɛ̃ tɩɩr,
a nyɩ kãkamɛ nɩ a nyɩ olivʋ tɩɩr,
zãzule 'wɔb a na.
Ɛcɛ nyɩ bɛ lɛb wa a ɩ̃ zie ɩ.»
A Sore n'ʋ yel.
10«Ɩ̃ ƴãw nɩ bàal-faa nyɔw nyɩ
mɛ̃ a ʋl na tɩ kʋ a dʋn
a koro za a Eziptɩ tẽw a#4:10 Nyɛ̃ Ety 9.3..
Ɩ̃ kʋ n a nyɩ pɔ́lɛ́ nɩ zɛbr-sɔ-kpɛ̃ɛ ɛ́ fa a nyɩ wie,
ɩ̃ ɩ n a nyɩ laɩ pʋɔ kũuni nyũu paalɩ a nyɩ nyɔbɔgɛ,
ɛcɛ nyɩ bɛ lɛb wa a ɩ̃ zie ɩ.»
A Sore n'ʋ yel.
11«Ɩ̃ ŋmɛ n bom za nyaw taa a nyɩ zie,
mɛ̃ a lɛ ɩ̃ na tɩ dãw ɩ a Sodɔm
nɩ a Gomɔɔr#4:11 Nyɛ̃ Yzt 19.24-25. ten a.
Nyɩ ŋmɛ̃ na mɛ̃ dà-ŋmãa bɛ na ír vũumí bɛr a.
Ɛcɛ nyɩ bɛ lɛb wa a ɩ̃ zie ɩ.»
A Sore n'ʋ yel.
12«Alɛ so, Ɩsɩrayɛl i, nyɛ̃ a lɛ ɩ̃ na na ɩ b a,
ɛ́ a lɛ ɩ̃ na na ɩ b a ƴãw a, Ɩsɩrayɛl i,
cɔbrɛ fʋ̃ʋ nɩ a fʋ Naaŋmɩn tuor-taa.»
13Bʋ̃ʋ n'ʋ vɛ̃, nyɛ̃ a:
a Sob nɛ na mɩɛr a tã-bɛrɛ, ɛ́ íre a sɛsɛb,
ɛ́ wule a ʋ pʋ-tɩɛrʋ a nɩsaal a,
a Sob nɛ na dier a lige maalɛ nɩ a cãà a,
a Sob nɛ na cere a tẽw zi-kɛrɩ zu a,
a ʋ yúor dɩ na kɛ́ Sore,
a Naaŋmɩn kpɛnʋ-za-sob.
Kasalukuyang Napili:
Amɔsɩ 4: DBDC
Haylayt
Kopyahin
Paghambingin
Ibahagi
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
La Bible en Dagara © Alliance Biblique du Burkina Faso, 2013.