MARIKO 5
5
Yesu Yahonyinya Mundu wa Matimoni Kalimu
(Mat 8:28-34; Luka 8:26-39)
1Yesu nende veechi veve vatukha khuluveka lundi lwi Inyanza ya Galilaya, mu lusomo lwa Gerasa. 2Lwa Yesu yali niyakhikha khurula mu liaro, yakana nu mundu wi litimoni liali muye narulanga havundu ha vayeveelanga mivili chia vandu vakhutsa. 3Mundu mwenoyo yali wamenya mu vilindwa. Mundu avulakhuho wali wanyala khumuvoha khali ni minyololo; 4shia khase khosi vilenje vievie nende makhono via vohwangwa; navutswa shia isaa yosi yakutuulanyinyanga minyololo, ang'usanyinya vivia viali niviavohwa khu vilenje vievie. Yali ni tsingulu tsinyishi wakhanyalikha tawe. 5Yachenda chenda shia vutukhu nu mbasu mu vilindwa nende mu vikulu, nalaanjililanga nu khwikhalaka mwene na machina.
6Lwa mundu mwenoyo yalola Yesu nashili ihale wene, yilukhaka namusikamila imbeli. 7Yalaanjilila nu mwoyo mukali navoola, “Yesu, Mwana wa Nyasaye Uli Ikulu khu Viosi! Ni shina shia wenyanga khukhola? Khusayanga nuyaanza khuvirila mu lira lia Nyasaye, uvuli khusalilitsa?” 8Mundu mwenoyo yavoola ndio, shichila Yesu yali nakondeshelanga litimoni, “Rula mu mundu uyu.”
9Yesu yamureeva, “Ulaangwangwa viina?”
Mundu mwenoyo yachipa, “Nangwangwa, ‘Legioni’—livoolanga khuli vanyishi!” 10Mundu mwenoyo yatsililila khusaya Yesu nayaanza avuli khukhunga matimoni khurula mu shivala shienesho.
11Shituma shikali shi shiayo shi tsingulume tsialiho nitsiliitsanga shiukhulia himbi khundulu khwi shikulu. 12Matimoni kasaya Yesu nayaanza, “Khurumi khutsi mu tsingulume, khwinjile mutsio.” 13Yesu yakahuchila nikatsia; ma matimoni nikarula mu mundu mwenoyo nikinjila mu tsingulume. Shiayo shiosi shi tsingulume tsiali himbi tsiheelefu tsivili; tsiakholomokha khurula khu shikulu nitsitsia mu inyanza nitsikhamilamu.
14Vandu vali nivalindanga tsingulume tsienetso vilukha nivatsia mu litaala nende mu michitsi khulanditsa kali ni kakholeshe. Vandu varula nivatsia khulola kali ni kakholeshe. 15Lwa vatukha khu Yesu, valola mundu wali na matimoni manyishi muye mwenoyo, niyifwali tsinguvu, niyikhale hawenaho khandi nali mulamu; ma vandu nivaria. 16Vandu valola kali ni kakholeshe vavoolela vandi kali ni kakholeshe khu mundu wali wa matimoni manyishi muye mwenoyo, khandi khulondokhana khu tsingulume.
17Vandu vavoolela Yesu nayaanza aruli mu lusomo lwavo.
18Lwa Yesu yali niyinjilanga mu liaro, mundu wali na matimoni muye mwenoyo yamusaya nayaanza, “Nyenyanga khutsia nivi!”
19Navutswa Yesu yambakhana namuvoolela, “Simukha utsi ingo khu vandu vovo; uvavoolele shia shindu shiosi shia Nyasaye akhukholele, khandi khuli akhuvelele tsimbavasi.”
20Khulwa yako, mundu mwenoyo yasimukha natsia Dekapoli#5:20 Dekapoli: inoho “Mataala likhomi.”, nalanditsanga ka Yesu yali namukholele. Vandu voosi vakahulila vali nilichenya.
Mwana wi Shikhana wa Yairo nende Mukhali Watiila khu Tsinguvu tsia Yesu
(Mat 9:18-26; Luka 8:40-56)
21Yesu yambukha nakalukha khandi khuluveka lundi lwi inyanza. Shituma shikali shia vandu vamuvotokhana ha inyanza henaho. 22Nalwo lwa mwamihi mulala wi lisinagogi walaangwangwa Yairo yatukhaho; khandi lwa yalola Yesu, yasikama ha vilenje hehe 23namusaya nu mwoyo kwosi nayaanza, “Mwana wi shikhana wanje mutititi alwalanga muno. Nuyaanza hamba utiili makhono koko khuye ahone, khandi ave mwoyo!”
24Khulwa yako, Yesu yasimukha natsia na Yairo. Vandu vanyishi valonda Yesu, khali nivamumina khurula mu tsimbeka tsiosi.
25Litukhu lindi, khwaliho nu mundu mukhali wanyakhananga nukhuraatsa masahi khumihika likhomi na chivili. 26Vashilishi vanyishi vali vamushilikha; khandi yali yamala tsisenti tsietsie tsiosi, navutswa vukhala vukhuhona yatsililila khulwala muno. 27Lwa mukhali mwenoyo yahulila makhuva shichila Yesu, yatsia khuye khurulila inyuma mu shituma, natiila khu tsinguvu tsia Yesu. 28Yakanakana, “Niiva natiila khu tsinguvu tsietsie, nahona.”
29Lwa yatiila khu tsinguvu tsia Yesu, liraatsa lielie liasinjila vwangu; niyihulila mu mmbili kwekwe uhoni khurula mulinyakhana lielie. 30Yesu yamanya vwangu tsingulu tsirulikhu muye. Khulwa yako, yishevukha mu shituma shia vandu nareeva, “Ni viina utiili khu tsinguvu tsianje?”
31Veechi veve vamuchipa, “Ulolanga khuli vandu vakhuvotokhane; shichila shina ureevanga ni viina undilikhu?”
32Navutswa Yesu yatsililila khuheenza iyi neyo khulola mundu wali namutiilikhu. 33Mukhali mwenoyo yamanya kali nikamali khwikholekha khuye, niyitsa natechelanga nu khuria, nasikama imbeli wa Yesu, khandi namuvoolela katoto koosi.
34Yesu yamuvoolela, “Mwana wi shikhana wanje, lisuuvila liolio limali khukhuhonyinya. Simukha utsi mu milembe; uhoni khurula mulinyakhana liolio.”
35Lwa Yesu yali nashivoolanga ndio, vandu varumwa khurula mu inzu ya Yairo nivavoolela Yairo, “Mwana wi shikhana wowo umali khukhutsa; shichila shina utsilililanga khunyashitsa mwechitsi?”
36Yesu yachaya ka vavoolela Yairo; navutswa yamuvoolela, “Lekha khuria; suuvila vutswa.” 37Yesu yambakhana khuhuchililakhu mundu wosi amulonde; nikakhali Petro, Yakobo nende amwavo wewe Yohana. 38Vatukha hango ha Yairo, ha Yesu yalola vukoyanu khandi nahulila vandu nivalilanga nu khwikhula. 39Yesu yinjila munzu navareeva, “Shichila shina mukoyani khandi mulilanga? Mwana ashili khukhutsa, navutswa akonanga!”
40Navutswa vandu vasekha Yesu. Yesu yavakhunga voosi, navukula tata nende mama wu mwana mwenoyo na veechi veve vavaka, nivinjila havundu ha mwana yali nali. 41Yesu yakumila mukhono ku mwana wa Yairo, namuvoolela, “Talitha Koum,” kavoolanga, “Mwana wi shikhana wanje mutititi, mbolanga, vukha!”
42Yavukha vwangu naraanga khuchenda chenda hawenaho. Yali nali ni mihika likhomi na chivili. Lwa yaka kikholekha, vali nilichenya linyishi muno. 43Yesu yavakaya, “Muvuli khuvoolelakhu mundu wosi; navutswa mumuhe shiukhulia shialia.”
Kasalukuyang Napili:
MARIKO 5: LLLCATHOLIC
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© The Bible Society of Kenya, 2013
