Énkjínkón 2
2
Ni nda xi yaꞌa kjo̱a̱kjínkoón
1Ji ndí tsi si̱ꞌinjo̱ꞌo ji énna,
ko̱jo tsi kjójintakín ji kjo̱a̱botíxomana,
2tsi ko̱si̱e̱nnijìi̱n kjo̱a̱kjínkoón,
tsi ngi̱jin ini̱màa̱ kꞌuijñíjin ji nga nda si̱ꞌinkjé ni xi si̱ꞌin ji,
3tsi ꞌniú chji̱e̱ꞌe ji nga ka̱makjíntakín ji,
ko̱jo tsi ꞌniú chji̱e̱ꞌe ji nga nda si̱ꞌinkjé ni xi si̱ꞌin ji,
4tsi xikó maá to̱ntiboaa̱ nga ku̱i̱ndyi̱sé ji,
ko̱jo tsi xikó maá ngo ti̱jìto̱n.
5Kjiꞌa boá nga xchi̱e̱ndikín jí Néná,
ko̱jo ja̱koxi̱ nga xche̱ ji Néná.
6Ngatꞌa̱ Néná boá xi tsjá kjo̱a̱kjínkoón,
kó kjo̱a̱kjíntakoón, ko̱jo kjo̱a̱chji̱ni̱e̱e̱ tsꞌoa boá xi fotjonii̱.
7Néná boá xi tsjaá kjo̱a̱kjínkón,
kó bosikójo ko̱jo koo̱n xota̱ xi kixi̱i̱.
8Néná boá xi koo̱n ndi̱ya̱à xota̱ xi kixi̱ tsꞌén xaá,
ko̱jo koo̱n ndi̱ya̱à xota̱ xi kui kjimaꞌniátakón.
9Bo̱a̱ tsꞌén nga ka̱makjiín ji, ni xi na̱xo̱ ko̱jo ni xi kixi̱,
ni xi ngo ndséje̱n, ko̱jo ngayeje ndi̱yà xí nda.
10Kjiꞌanga kjo̱a̱kjínkoón kꞌo̱sꞌienjin ini̱màa̱,
ko̱jo nga kjo̱a̱kjíntakoón ku̱i̱ꞌíkitsie maá kjo̱a̱tsja,
11ni nda niꞌínkjé ngindiee̱ nga ngo ni ko̱ndókjo̱e̱,
ko̱jo kjo̱a̱kjínkoón boá xi skoón,
12tsi̱ꞌe̱ nga ni xi ndajiín xín sa̱ꞌínkjaꞌaa̱,
ko̱jo xota̱ xi ꞌniú ndajiín jmí ni sa̱ꞌínjo̱jiín.
13Kui xotaa̱ ꞌbijñámasien ndi̱yà xí kixi̱i̱,
kó ndi̱yà xí ndajiín boá xi fotsoꞌbáyà,
14achichí tsjá maa̱ nga tsꞌén ni xi ndajín,
kó ngaskande sꞌué má tsꞌén,
15ndi̱yà xí ńkjá ngájén boá nínga tjimá,
kó ngiti̱ ki̱a̱jín fí ndi̱yà xí na̱xo̱o̱.
16Kjo̱a̱kjínkoón boá xi sa̱ꞌíndeé
kjo̱a̱a̱ kui na̱ xi ꞌboṉcha̱jo xi̱ꞌii̱n,
kó ti̱ kꞌo̱ṉcha̱joo̱ nga,
kjiꞌanga sa̱ꞌínkjién én xí ixii̱,
17kui naa̱ íjñámasien xi̱ꞌin xi kisꞌijñajo̱ nga kjindí,
kó je kichíyaá ni xi índa ngindyi̱ko̱n Néná.
18Tsi ki̱a̱ kongín ndi̱yà xí fíni xtji̱e̱e̱n ndiꞌaa̱,
xikónií tsi ndi̱ya̱à kjo̱a̱bo̱yaa̱ je kachjábé.
19Kui xi ki̱a̱ nijan tsꞌénkámajo̱ kui naa̱,
ngiti̱ kjo̱e̱ꞌeꞌóyájín,
kó nginijánjín kjótsoꞌbá nginí ndi̱ya̱à kjo̱a̱mindyioo̱n.
20Ji ndí nda̱chií,
ki̱a̱ tꞌentji̱ngi ji ndi̱yà xí ndaa̱,
kó ngatsjéni̱xtjin nga ndi̱ya̱à xota̱ xi kixi̱i̱ ti̱ńtje̱ ji,
21ngatꞌa̱ ta̱kuítsí xota̱ xi kixi̱i̱ xi kꞌuíndo kui tꞌanangii̱,
ko̱jo kui xi ngatsjéni̱xtjin nga ni xi ndaa̱ sa̱ꞌín.
22Ta̱nga, kui xota̱ xi ꞌniú ndajiín,
si̱ꞌankjieni kui tꞌanangii̱,
kó xota̱jeé ku̱i̱yòtjíngií.
Kasalukuyang Napili:
Énkjínkón 2: MAIX
Haylayt
Ibahagi
Paghambingin
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014