Lucas 22
22
Ang Planong Pagpatay kay Hesus
(Mat. 26:1‑5; Mar. 14:1‑2; Juan 11:45‑53)
1Nalalapit na noon ang Pista ng Tinapay na Walang Pampaalsa na tinatawag ding Pista ng Paglampas ng Anghel. 2Ang mga namamahalang pari at ang mga tagapagturo ng Kautusan ay naghahanap ng paraan upang maipapatay si Hesus nang hindi nagkakagulo, dahil natatakot sila sa mga tao. 3Pumasok si Satanas kay Judas na tinatawag na Iscariote. Isa siya sa labindalawang alagad ni Hesus. 4Pumunta siya sa mga namamahalang pari at mga opisyal ng mga guwardiya sa templo, at pinag-usapan nila kung paano niya maibibigay sa kanila si Hesus. 5Natuwa sila at nakipagkasundo kay Judas na bayaran siya. 6Pumayag naman si Judas sa kasunduan, at mula noon, humanap siya ng pagkakataon upang maibigay sa kanila si Hesus nang hindi nalalaman ng mga tao.
Ang Huling Hapunan
(Mat. 26:17‑25; Mar. 14:12‑21; Juan 13:21‑30)
7Dumating ang Pista ng Tinapay na Walang Pampaalsa, ang araw na pinapatay ang tupang hinahandog bilang pag-alaala sa Paglampas ng Anghel. 8Kaya inutusan ni Hesus sina Pedro at Juan, “Ihanda ninyo ang hapunan natin para sa Pista ng Paglampas ng Anghel.”
9Nagtanong sila, “Saan nʼyo po kami gustong maghanda?”
10Sumagot si Hesus, “Pagpasok ninyo sa lungsod ng Jerusalem, sasalubungin kayo ng isang lalaking may pasan-pasang banga ng tubig. Sundan ninyo siya sa bahay na papasukan niya, 11at sabihin ninyo sa may-ari ng bahay, ‘Ipinapatanong ng Guro kung saan ang kuwartong kakainan niya ng hapunan kasama ang mga alagad niya upang ipagdiwang ang Pista ng Paglampas ng Anghel.’ 12Isasama niya kayo sa itaas at ituturo sa inyo ang isang malaking kuwarto na kumpleto ang kagamitan. Doon kayo maghanda ng hapunan natin.”
13Lumakad sila at nakita nga nila ang lahat ayon sa sinabi ni Hesus sa kanila. At inihanda nila roon ang hapunan para sa Pista.
14Pagdating ng oras ng hapunan, kumain si Hesus at ang kanyang mga apostol. 15Sinabi ni Hesus sa kanila, “Gustong-gusto kong makasalo kayo sa hapunang ito sa pagdiriwang ng Pista ng Paglampas ng Anghel, bago ako magdusa. 16Sapagkat sinasabi ko sa inyo na hindi na ako muling kakain nito hanggang sa matupad ang kahulugan nito sa araw ng paghahari ng Diyos.”
17Pagkatapos, kumuha siya ng inumin#22:17 inumin: Sa literal, kopa. Ganito rin sa talata 20|LUK 22:20., nagpasalamat sa Diyos, at sinabi sa kanila, “Kunin ninyo ito at paghati-hatian. 18Sinasabi ko sa inyo na hindi na ako muling iinom ng inuming mula sa ubas hanggang sa araw ng paghahari ng Diyos.”
19Pagkatapos, kumuha siya ng tinapay, at matapos magpasalamat sa Diyos ay pinagpira-piraso niya ito at ibinigay sa kanila. Sinabi niya, “Ito ang aking katawan na inihahandog para sa inyo. Gawin ninyo ito bilang pag-alaala sa akin.”
20Pagkatapos nilang kumain, ganoon din ang ginawa niya sa inumin: Kinuha niya ito at sinabi, “Ang inuming ito ang bagong kasunduan na pinagtibay ng dugo kong mabubuhos ng dahil sa inyo. 21Ngunit makinig kayo! Kasalo ko sa mesang ito ang taong magtatraydor sa akin. 22Sapagkat ayon sa itinalaga ng Diyos, ang Anak ng Tao ay papatayin, ngunit nakakaawa ang taong magtatraydor sa akin.” 23Nagtanungan sa isaʼt isa ang mga alagad niya kung sino kaya sa kanila ang gagawa noon.
24Nagtalo-talo ang mga alagad ni Hesus kung sino sa kanila ang pinakadakila. 25Kaya sinabi sa kanila ni Hesus, “Sa mundong ito, ang mga hari ay pinapanginoon ng mga nasasakupan nila, at ang mga may kapangyarihan ay gustong tawagin na ‘Tagatulong ng mga Tao’. 26Ngunit hindi kayo dapat maging ganoon. Ang mas mataas ay dapat magpakababa, at ang pinuno ay dapat maging tulad ng isang tagapaglingkod. 27Sapagkat sino ba ang mas mataas, ang pinaglilingkuran#22:27 pinaglilingkuran: Sa literal, nakaupo sa mesa. o ang naglilingkod? Siyempre, ang pinaglilingkuran. Ngunit naglilingkod ako sa inyo kahit na ako ang Panginoon ninyo.
28“Kayo ang nanatiling kasama ko sa mga pagsubok na dinaranas ko. 29Kaya kung paanong binigyan ako ng aking Ama ng kapangyarihang maghari, kayo rin ay bibigyan ko ng ganoong kapangyarihan. 30Makakasalo ko kayo sa aking mesa sa aking kaharian, at uupo kayo sa mga trono upang mamahala sa labindalawang lahi ng Israel.
31“Simon, makinig kang mabuti! Humingi ng pahintulot si Satanas sa Diyos na subukin niya kayong lahat tulad ng pag-aalis ng ipa sa mga trigo. 32Ngunit nanalangin ako para sa iyo, na huwag manghina ang iyong pananampalataya. At kapag nagbalik-loob ka na, palalakasin mo ang pananampalataya ng iyong mga kapatid.”
33Sumagot si Simon, “Panginoon, handa po akong mabilanggo o mamatay na kasama ninyo.”
34Ngunit sinabi sa kanya ni Hesus, “Pedro, tandaan mo, bago tumilaok ang manok ngayong gabi, tatlong beses mong ikakaila na kilala mo ako.”
35Pagkatapos, sinabi ni Hesus sa mga alagad niya, “Noong isinugo ko kayo na walang dalang pitaka, bag, o sandalyas, kinulang ba kayo?”
Sumagot sila, “Hindi po.”
36“Ngunit ngayon,” sabi ni Hesus, “Kung may pitaka o bag kayo, dalhin ninyo. At kung wala kayong espada, ipagbili ninyo ang damit ninyo at bumili kayo ng espada. 37Sapagkat sinasabi ko sa inyo na kailangang matupad ang sinasabing ito sa Kasulatan tungkol sa akin: ‘Itinuring siyang isang kriminal.’#22:37 Isa. 53:12. At natutupad na ito ngayon!”
38Sinabi ng mga alagad niya, “Panginoon, may dalawa po kaming espada.”
“Tama na iyan,” sagot niya.
Nanalangin si Hesus sa Bundok ng mga Olibo
(Mat. 26:36‑46; Mar. 14:32‑42)
39Lumabas si Hesus sa Jerusalem, at gaya ng nakaugalian niya, pumunta siya sa Bundok ng mga Olibo. Sumama rin ang mga alagad niya. 40Pagdating nila roon, sinabi niya sa kanila, “Manalangin kayo upang hindi kayo madaig ng tukso.” 41Iniwan niya ang mga alagad niya at lumayo nang kaunti.#22:41 nang kaunti: Sa literal, ng isang hagis ng bato. Pagkatapos, lumuhod siya at nanalangin, 42“Ama, kung maaari ay ilayo nʼyo sana sa akin ang mga paghihirap na darating.#22:42 ang mga paghihirap na darating: Sa literal, ang kopang ito. Ngunit hindi ang kalooban ko ang masunod kundi ang kalooban ninyo.” [ 43Nagpakita sa kanya ang isang anghel mula sa langit at pinalakas siya. 44Dahil sa paghihirap ng kanyang kalooban, lalo siyang nanalangin nang taimtim, at ang mga pawis niya ay parang dugo na tumutulo sa lupa.]#22:43‑44 Wala ang mga talatang ito sa ilang naunang manuskrito.
45Pagkatapos, tumayo siya at binalikan ang mga alagad niya, pero nadatnan niya silang natutulog dahil napagod sila sa matinding paghihinagpis. 46Kaya sinabi niya sa kanila, “Bakit kayo natutulog? Bumangon kayo at manalangin, upang hindi kayo madaig ng tukso.”
Ang Pagdakip kay Hesus
(Mat. 26:47‑56; Mar. 14:43‑50; Juan 18:3‑11)
47Nagsasalita pa si Hesus nang dumating ang maraming tao. Si Judas na isa sa labindalawang alagad ang nangunguna sa kanila. Nilapitan niya si Hesus at hinalikan. 48Sinabi ni Hesus sa kanya, “Judas, tinatraydor mo ba ang Anak ng Tao, sa pamamagitan ng isang halik?”
49Nang makita ng mga alagad ni Hesus ang maaaring mangyari, sinabi nila, “Panginoon, gagamit na ba kami ng tabak?” 50At tinaga ng isa sa kanila ang alipin ng punong pari, at naputol ang kanang tainga nito.
51Ngunit sinaway sila ni Hesus, “Tama na iyan!” Hinipo niya ang tainga ng alipin at pinagaling ito.
52Pagkatapos, kinausap ni Hesus ang mga namamahalang pari, mga opisyal ng mga guwardiya sa templo at ang mga pinuno ng mga Hudyo na naroon upang dakpin siya, “Isa ba akong tulisan? Bakit kailangan pa ninyong magdala ng mga espada at mga pamalo upang dakpin ako? 53Araw-araw akong nasa Templo, at naroon din kayo. Bakit hindi nʼyo ako dinakip? Ito na ang inyong pagkakataon, ang panahong naghahari ang kadiliman.”
Ikinaila ni Pedro si Hesus
(Mat. 26:57‑58, 69‑75; Mar. 14:53‑54, 66‑72; Juan 18:12‑18, 25‑27)
54Dinakip nila si Hesus at dinala sa bahay ng punong pari. Sumunod naman si Pedro pero nasa malayo siya. 55Nagsiga sa gitna ng bakuran ang mga naroon at naupo sila sa paligid ng siga para magpainit. Nakiupo rin si Pedro sa kanila. 56Nakita siya ng isang utusang babae sa tabi ng siga at tiningnang mabuti. Sinabi ng babae, “Kasamahan din ni Hesus ang lalaking ito!”
57Ngunit itinanggi ito ni Pedro, “Babae, hindi ko siya kilala.”
58Maya-maya, may nakakita na naman sa kanya at nagsabi, “Kasamahan ka rin nila, di ba?”
“Aba, hindi!” sagot ni Pedro.
59Pagkalipas ng isang oras, iginiit naman ng isa, “Totoong kasamahan din ni Hesus ang taong ito, dahil taga-Galilea rin siya.”
60Ngunit sumagot si Pedro, “Hindi ko alam kung ano ang pinagsasabi mo!” At habang nagsasalita pa siya ay tumilaok ang manok. 61Lumingon ang Panginoon at tiningnan si Pedro. Naalala ni Pedro ang sinabi ng Panginoon, “Bago tumilaok ang manok ngayong gabi, tatlong beses mong ikakaila na kilala mo ako.” 62Kaya lumabas si Pedro at humagulgol.
Kinutya ng mga Guwardiya si Hesus
(Mat. 26:67‑68; Mar. 14:65)
63Samantala, kinutya at binugbog si Hesus ng mga nagbabantay sa kanya. 64Piniringan nila siya at tinanong, “Hulaan mo, sino ang sumuntok sa iyo?” 65At marami pa silang sinabing masama laban sa kanya.
Dinala si Hesus sa Korte ng mga Hudyo
(Mat. 26:59‑66; Mar. 14:55‑64; Juan 18:19‑24)
66Kinaumagahan, nagtipon ang mga pinuno ng mga Hudyo, mga namamahalang pari, at ang mga tagapagturo ng Kautusan. Iniharap nila si Hesus sa kanilang korte. 67Sinabi nila, “Sabihin mo sa amin, ikaw ba ang Mesias?”
Sumagot si Hesus, “Kung sasabihin ko sa inyo, hindi naman kayo maniniwala. 68At kung tatanungin ko kayo, hindi naman kayo sasagot. 69Ngunit mula ngayon, ang Anak ng Tao ay uupo na sa kanan ng makapangyarihang Diyos.”
70“Kung ganoon, ikaw nga ang Anak ng Diyos?” sabi nila.
Sumagot si Hesus, “Kayo na rin ang nagsabi na ako nga.”
71Kaya sinabi nila, “Narinig na natin ang sinabi niya, ano pang ebidensya ang kailangan natin?”
Kasalukuyang Napili:
Lucas 22: ASD
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Ang Banal na Bibliya, Ang Salita ng Diyos™, ASD™
Karapatang-sipi © 2009, 2011, 2014, 2025 ng Biblica, Inc.
Ginamit nang may pahintulot ng Biblica, Inc.
Reserbado ang lahat ng karapatan sa buong mundo.
―――――――
Holy Bible, Tagalog Contemporary Bible™
Copyright © 2009, 2011, 2014, 2025 by Biblica, Inc.
Used with permission. All rights reserved worldwide.
