Ma‸htehˍ li‸ 7
7
Shu hkʼoˆ venˇbaˆ taˍ ve awˬ lawn
1Shu nawˬ hui hta‸ venˇbaˆ maˇ gʼa taˍ tuˬ, nawˬ hui shu hta‸ venˇbaˆ taˇ taˍ. 2Awˬ lawn kʼo, nawˬ hui shu hta‸ venˇbaˆ taˍ ve hkʼa shuˍ shuˍ, shu nawˬ hui hta‸ venˇbaˆ kʼaw‸ taˍ laˇ tuˬ yoˬ. Nawˬ hui shu hta‸ tsuh piˇ kawˬ piˇ ve hkʼa shuˍ shuˍ, shu nawˬ hui hta‸ kʼaw‸ tsuh laˇ kawˬ laˇ tuˬ yoˬ. 3Nawˬ hui a shu yawˇ ve mehˆ shiˍ hkʼaw lo cawˬ taˍ ve toˉ la‸ lonˉ hta‸ maˇ dawˇ nyi leh, aˬ hto‸ ma te nawˬ ve awˬ viˉ awˬ nyi ve mehˆ shiˍ hkʼaw lo cawˬ taˍve mehˆ puˉ hta‸ nawˬ nyi chehˇ ve le. 4Nawˬ hui a shu yawˇ ve mehˆ shiˍ hkʼaw lo toˉ la‸ lonˉ cawˬ taˍ ve ka‸, aˬ hto‸ ma te nawˬ awˬ viˉ awˬ nyi hta‸, Nawˬ ve mehˆ shiˍ hkʼaw lo cawˬ taˍ ve mehˆ puˉ hta‸ ngaˬ yuˬ tawˆ laˇ shaˍ teh‸ ca kʼoˆ ve le. 5Heˍ puiˉ ve chaw hui-oˬ, nawˬ ve mehˆ shiˍ hkʼaw lo cawˬ taˍ ve toˉ la‸ lonˉ hta‸ awˉ lawˉ yuˬ tawˆ sheˍ. Awˬ hkʼaw‸ nawˉ, nawˬ awˬ viˉ awˬ nyi ve mehˆ shiˍ hkʼaw cawˬ taˍ ve mehˆ puˉ hta‸ hkʼaˬ hkʼe te yuˬ tawˆ tuˬ nawˬ hkʼa deh‸ mawˬ hpeh‸ tuˬ yoˬ.
6Da‸ ve kehˬ ve awˬ ceuˬ hpuiˇ hta‸ taˇ piˇ. Piˉ ko-eˍ shehnˉ teˇ hpaˍ hta‸ va‸ mehˆ gʼuˇ suhˍ taˇ ca baˬ teh taˍ. Oˇ hkʼe te ve kʼo, oˇ ve teˇ hpaˍ hta‸ yawˇ hui naˆ taˍ leh, nawˬ hui hta‸ kʼaw‸ hpfuhˆ che‸ tuˬ yoˬ.
Lawˬ loˬ, ca loˬ, htawˆ loˬ
7Lawˬ loˬ. Lawˬ kʼo gʼa tuˬ yoˬ. Ca loˬ. Ca kʼo mawˬ tuˬ yoˬ. Yehˬ miˉ hta‸ htawˆ loˬ. Htawˆ kʼo hpaw laˇ tuˬ yoˬ. 8Awˬ lawn kʼo, lawˬ ve chaw teˇ gʼaˇ le le lehˬ gʼa tuˬ yoˬ. Ca ve chaw htawˇ, mawˬ tuˬ yoˬ. Yehˬ miˉ hta‸ htawˆ ve chaw awˬ pon htawˇ, yehˬ miˉ hpaw laˇ tuˬ yoˬ. 9Nawˬ hui awˬ hkʼaw lo a shu teˇ gʼaˇ maˇ kʼoˆ, yawˇ ve yaˇ paˍ caˇ tuˬ lawˬ ve kʼo, haˉ pui shiˍ yuˬ piˇ tuˬ laˇ. 10Ngaˇ lawˬ ve kʼo, vuiˬ hta‸ yuˬ piˇ tuˬ laˇ. 11Nawˬ hui lehˬ, chaw haiˬ hpeh‸ ve ka‸ a shu yawˇ ve yaˇ hta‸ da‸ ve mawˇ piˇ hkawˇ shiˍ ve kʼo, chi a‸ kehˉ leuˉ leh, mvuhˇ naw ma hkʼoˆ chehˇ ve nawˬ hui ve Awˬ pa geh hkʼa lawˬ ve chaw teˇ hpaˍ hta‸ da‸ ve awˬ ceuˬ teˇ hpaˍ yawˇ piˇ tuˬ yoˬ maˇ heˆ laˇ.
12Hkʼe te leh, shu nawˬ hui hta‸ te laˇ piˇ lawˬ gaˇ ve hkʼe, nawˬ hui shu hta‸ oˇ hkʼe te piˇ-oˆ. Awˬ lawn kʼo, tawˇ chi teˇ hkawˇ lehˬ, awˬliˇtawˇhkawˇ li‸ leh Gʼuiˬsha ve tcuh kaˍ paˍ li‸ awˬ hkʼaw lo awˬ hkʼaˇ lonˉ hpeh‸ ve yoˬ.
Maˇ kʼoˍ ve yehˬmiˉhpe‸
13Maˇ kʼoˍ ve yehˬ miˉ hta‸ lo‸-e loˬ. Awˬ lawn kʼo, luˬ kuiˬ lo kʼai ve ya‸ kʼaw lehˬ kʼehˬ jaˇ leh, yehˬ miˉ hpe‸ ka‸ kʼoˍ jaˇ ve yoˬ. Oˇ kaˬ lo lo‸-e ve chaw ka‸ maˇ jaˇ ve yoˬ. 14Ya‸ hkʼaˇ, a sha‸ te‸ kuiˬ lo lo‸-e ve yehˬmiˉhpe‸ lehˬ, maˇ kʼoˍ leh, ya‸ kʼaw ka‸ haˍ jaˇ ve yoˬ. Ca mawˬ leh lo‸-e ve chaw a ciˉ ceh tiˉ cawˬ ve yoˬ.
Awˬ shiˍ hta‸ nyi kʼo, awˬ cehˬ hta‸ shiˍ ve
15Maˇ heˆ heˆ ve tcuh kaˍ paˍ teˇ hpaˍ hta‸ shaˍ ti‸ te-o. Awˬ hkʼaw hpawˇ yawˇ hui haiˬ jaˇ ve veˬ hpeh‸ ve ka‸, yawˬ awˬ guiˬ kʼuˉ hta‸ deh leh nawˬ hui geh laˬ ve yoˬ. 16Yawˇ hui ve awˬ shiˍ hta‸ nyi kʼo, yawˇ hui ve nyi ma hta‸ gʼa shiˍ tuˬ yoˬ. Aˉ chuˇ cehˬ lo a pehˉ meuˇ shiˍ hta‸ gʼa shaˉ jaw laˇ. Aˉ chuˇ buiˇ lo maˉ nawˆ shiˍ hta‸ gʼa shaˉ jaw laˇ. 17Da‸ ve awˬ cehˬ lehˬ, da‸ ve aw shiˍ naw‸ ve yoˬ. Maˇ da‸ ve awˬ cehˬ lehˬ, maˇ da‸ ve awˬ shiˍ naw‸ ve yoˬ. 18Da‸ ve awˬ cehˬ lehˬ, maˇ da‸ ve awˬ shiˍ maˇ naw‸ puiˉ. Chi hkʼa shuˍ shuˍ maˇ da‸ ve awˬ cehˬ lehˬ, da‸ve awˬ shiˍ maˇ naw‸ puiˉ. 19Da‸ ve awˬ shiˍ maˇ naw‸ ve awˬ cehˬ teˇ cehˬ le le hta‸ htu baˬ leh aˬ miˍ hkʼaw baˬ keu ve yoˬ. 20Hkʼe te leh chaw oˇ ve teˇ hpaˍ ve awˬ shiˍ hta‸ nyi kʼo, yawˇ hui ve nyi ma hta‸ gʼa shiˍ tuˬ yoˬ.
Nawˬ hui hta‸ ngaˬ maˇ shiˍ
21Ngaˬ hta‸ Jawˇmawˇ-oˬ, Jawˇmawˇ-oˬ teh‸ hkʼa kʼoˆ laˇ ve chaw teˇ gʼa le le lehˬ, mvuhˇ naw ma mvuhˇmiˬ awˬ hkʼaw lo gʼa lo‸-e tuˬ ve maˇ heˆ. Mvuhˇ naw ma hkʼoˆ lo chehˇ ve ngaˬ Awˬ pa ve a loˍ hta‸ te ve chaw ceh tiˉ gʼa lo‸-e tuˬ yoˬ. 22Oˇ ve teˇ nyi gaˬ kʼo, Jawˇmawˇ-oˬ, Jawˇmawˇ-oˬ, ngaˬ hui lehˬ nawˬ ve awˬ meh awˬ hkʼaw lo bon maˍ ve maˇ heˆ laˇ. Nawˬ ve awˬ meh awˬ hkʼaw lo neˇ haiˬ teˇ hpaˍ hta‸ gʼa‸ kʼoˬ leh, kanˇ paˆ uiˍ jaˇ ve laiˉ ceuˬ te peuˬ ve maˇ heˆ laˇ teh‸, chaw maˇ maˇ ngaˬ hta‸ kʼoˆ laˇ tuˬ yoˬ. 23Yawˇ hui oˇ hkʼe kʼoˆ laˇ ve teˇ yanˇ, Nawˬ hui hta‸ ngaˬ a ciˉ ka‸ maˇ shiˍ. Haiˬ ve hta‸ te ve chaw hui-oˬ, ngaˬ geh tawˆ kʼai loˬ teh‸, ngaˬ yawˇ hui hta‸ hteˇ lehˍ kʼoˆ piˇ tuˬ yoˬ.
Yehˬ te ve awˬ hkuiˉ puiˍ nyiˇ ceuˬ
24Ngaˬ maˍ piˇ ve tawˇ hkawˇ hta‸ hkʼa kaˇ leh na yuˬ ve chaw teˇ gʼaˇ le le lehˬ, haˉ pui hkʼoˆ lo yehˬ te ve cuˇ yiˍ cawˬ paˍ hta‸ shuˍ ve yoˬ. 25Mvuhˇ yeˬ laˬ leh iˉ kaˆ uiˍ taˆ la ve, mvuhˇ haw meuˆ leh yehˬ oˇ ve hta‸ htinˍ ve htawˇ, haˉ pui hkʼoˆ lo te taˍ ve pa taw, yehˬ oˇ ve maˇ paiˍ.
26Ngaˬ maˍ piˇ ve tawˇ hkawˇ hta‸ kaˇ leh maˇ na yuˬ ve chaw lehˬ, shehˇ shiˍ hkʼoˆ yehˬ te ve cuˇ yiˍ maˇ cawˬ ve chaw hta‸ shuˍ ve yoˬ. 27Mvuhˇ yeˬ laˬ leh iˉ kaˆ uiˍ taˆ la ve, mvuhˇ haw meuˆ leh yehˬ oˇ ve hta‸ htinˍ ve teˇ yanˇ, yehˬ oˇ ve paiˍ ve yoˬ. Paiˍ ve oˇ ve lehˬ jaˇ ve yoˬ teh‸, Yeˍsuˆ kʼoˆ ve yoˬ.
28Yeˍsuˆ bon maˍ peuˬ ve teˇ yanˇ, yawˇ maˍ ve tawˇ hkawˇ teˇ hpaˍ hta‸ chaw awˬ moˍ lonˉ anˇ jaˇ ve yoˬ. 29Awˬ lawn kʼo, yawˇ hui ve li‸ bvuh‸ paˍ hui hkʼe yawˇ maˍ ve maˇ heˆ. Kanˇ paˆ cawˬ paˍ hkʼe yawˇ maˍ piˇ ve yoˬ.
ที่ได้เลือกล่าสุด:
Ma‸htehˍ li‸ 7: LHBE
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Lahu Bible Edited © Thailand Bible Society and Bible Society of Myanmar, 2010, 2020.