Ma‸htehˍ li‸ 6
6
Hpu tanˇ ve awˬ lawn
1Shu gʼa mawˬ tuˬ awˬ pon chaw yaˇ mehˆ gʼuˇ suhˍ nawˬ da‸ ve kanˉ maˇ gʼa te tuˬ shaˍ ti‸ te-o. Maˇ heˆ kʼo, mvuhˇ naw ma hkʼoˆ chehˇ ve Awˬ pa geh nawˬ awˬ bon maˇ gʼa.
2Hkʼe te leh, nawˬ shu hta‸ ha kʼaˉ leh tanˇ piˇ ve teˇ yanˇ, heˍ puiˉ ve chaw hui hkʼe taˇ te. Yawˇ hui lehˬ, shu chiˇ uiˍ chiˇ mvuh laˇ tuˬ, bon yehˬ hkʼaw maˇ kʼoˆ, ya‸ kʼaw kʼaˉ lo maˇ kʼoˆ, behˬ heh ma meuˆ tcuh ve yoˬ. Ngaˬ nawˬ hui hta‸ awˬ tehˬ awˬ na kʼoˆ laˇ ve, chaw oˇ ve teˇ hpaˍ lehˬ a shu yawˇ ve awˬ bon hta‸ gʼa peuˬ. 3Ya‸ hkʼaˇ, nawˬ shu hta‸ ha kʼaˉ leh tanˇ piˇ ve teˇ yanˇ, shu maˇ gʼa mawˬ tuˬ, nawˬ la‸ sha paˉ te ve kanˉ la‸ mehˍ paˉ hta‸ taˇ shiˍ piˇ 4Shu maˇ mawˬ kuiˬ lo mawˬ puiˉ ve nawˬ ve Awˬ pa lehˬ, nawˬ hta‸ awˬ bon pe‸ laˇ tuˬ yoˬ.
Bon lawˬ ve awˬ lawn
5Nawˬ bon lawˬ ve teˇ yanˇ, heˍ puiˉ ve chaw hui hkʼe taˇ te. Awˬ lawn kʼo, yawˇ hui lehˬ shu gʼa mawˬ tuˬ, bon yehˬ hkʼaw maˇ kʼoˆ, ya‸ kʼaw ceh lo maˇ kʼoˆ, huˉ taˍ leh bon lawˬ gaˇ puiˉ ve yoˬ. Ngaˬ nawˬ hui hta‸ awˬ tehˬ awˬ na kʼoˆ laˇ ve, chaw oˇ ve teˇ hpaˍ lehˬ, a shu yawˇ ve awˬ bon hta‸ gʼa peuˬ. 6Nawˬ bon lawˬ ve teˇ yanˇ, nawˬ ve bawehˇ awˬ hkʼaw lo lo‸-e leh yehˬ miˉ hta‸ hoˆ peuˬ htaˇ heh‸, baˬ kuiˬ lo chehˇ ve nawˬ ve Awˬ pa hta‸ lawˬ-o‸. Baˬ kuiˬ lo mawˬ puiˉ ve nawˬ ve Awˬ pa lehˬ nawˬ hta‸ awˬ bon pe‸ laˇ tuˬ yoˬ.
7Nawˬ hui bon lawˬ ve teˇ yanˇ, buiˇ shaˆ aˉ naˆ chaw hkʼe taˇ te. Yawˇ hui lehˬ, awˬ bon maˇ cawˬ ve tawˇ hta‸ teˇ pawˆ peuˬ teˇ pawˆ kʼoˆ ve yoˬ. Yawˇ hui tawˇ maˇ maˇ yaw ve pa taw yawˇ hui bon lawˬ ve hkʼe biˇ la tuˬ yoˬ teh‸ dawˇ ve yoˬ. 8Yawˇ hui hkʼe taˇ te. Awˬ lawn kʼo, nawˬ hui loˍ ve teˇ hpaˍ hta‸ nawˬ hui maˇ lawˬ sheˍ htaˇ ka‸ nawˬ hui ve Awˬ pa shiˍ taˍ peuˬ. 9Hkʼe te leh, nawˬ hui bon chi hkʼe lawˬ-o‸.
Mvuhˇ naw ma hkʼoˆ chehˇ ve ngaˬ hui ve Awˬ pa-oˬ,
nawˬ ve awˬ meh hta‸ yawˆ yan te piˇ lawˬ-o‸.
10Nawˬ ve mvuhˇmiˬ gaˬ la piˇ-oˆ.
Mvuhˇ naw ma hkʼoˆ lo nawˬ ve a loˍ biˇ ve hkʼe,
miˬguiˬ hkʼoˆ hta‸ htawˇ biˇ la piˇ-oˆ.
11Ya‸ nyi loˍ ve caˇ tuˬ dawˬ tuˬ teˇ hpaˍ,
ya‸ nyi ngaˬ hui hta‸ pe‸ laˇ-oˆ.
12Shu ngaˬ hui hta‸ te ya‸ laˇ ve
venˇbaˆ hta‸ ngaˬ hui hpehˇ hkʼa peuˬ ve hkʼa shuˍ shuˍ,
ngaˬ hui ve venˇbaˆ hta‸ htawˇ hpehˇ hkʼa laˇ-oˆ.
13Venˇbaˆ beˬ ve awˬ hkʼaˇ suh ngaˬ hui hta‸ taˇ kʼai piˇ.
Ya‸ hkʼaˇ, haiˬ ve awˬ hkʼaw lo ngaˬ hui hta‸ ponˬ laˇ-oˆ.
Awˬ lawn kʼo, mvuhˇmiˬ,kanˇ paˆ leh awˬ me‸ awˬ hponˇ hkʼa peu-eˬ,
co co taiˍ taiˍ nawˬ ve yoˬ. A menˬ.
14Awˬ lawn kʼo, nawˬ hui shu ve ya‸ kuiˬ jiˆ kuiˬ hta‸ hpehˇ hkʼa kʼo, mvuhˇ naw ma hkʼoˆ chehˇ ve nawˬ hui ve Awˬ pa lehˬ, nawˬ hui ve ya‸ kuiˬ jiˆ kuiˬ hta‸ htawˇ hpehˇ hkʼa laˇ tuˬ yoˬ. 15Ya‸ hkʼaˇ, nawˬ hui lehˬ shu ve ya‸ kuiˬ jiˆ kuiˬ hta‸ maˇ hpehˇ hkʼa kʼo, nawˬ hui ve Awˬ pa htawˇ, nawˬ hui ve ya‸ kuiˬ jiˆ kuiˬ hta‸ maˇ hpehˇ.
Caˇ tuˬ ce ve awˬ lawn
16Nawˬ hui caˇ tuˬ ce ve teˇ yanˇ, heˍ puiˉ ve chaw hui hkʼe mehˆ hpfuhˇ nawˍ tiˆ taˇ te. Chaw oˇ ve teˇ hpaˍ lehˬ, yawˇ hui caˇ tuˬ ce ve hta‸ shu gʼa mawˬ gʼa shiˍ tuˬ, yawˇ hui mehˆ hpfuhˇ hta‸ nyi maˇ sha tuˬ te taˍ ve yoˬ. Ngaˬ nawˬ hui hta‸ awˬ tehˬ awˬ na kʼoˆ laˇ ve, yawˇ hui lehˬ a shu yawˇ ve awˬ bon hta‸ gʼa peuˬ. 17Ya‸ hkʼaˇ, nawˬ caˇ tuˬ ce htaˇ, oˉ kʼoˍ hta‸ naˍ manˇ shehˍ leh mehˆ hpfuhˇ tsuhˇ-oˆ. 18Chi hkʼe te ve kʼo, nawˬ hui caˇ tuˬ ce ve hta‸ shu maˇ mawˬ maˇ shiˍ. Ya‸ hkʼaˇ, shu maˇ mawˬ kuiˬ lo chehˇ ve nawˬ ve Awˬ pa mawˬ tuˬ yoˬ. Chi hkʼoˆ ka‸, shu maˇ mawˬ kuiˬ lo mawˬ puiˉ ve nawˬ ve Awˬ pa htawˇ, nawˬ hta‸ awˬ bon pe‸ laˇ tuˬ yoˬ.
Mvuhˇ naw ma hkʼoˆ lo mawˇ jeˬ shaw hpoˆ ve awˬ lawn
19Chi miˬguiˬ hkʼoˆ lo nawˬ hui ve mawˇ jeˬ taˇ shaw hpoˆ taˍ. Miˬguiˬ hkʼoˆ lo shaw hpoˆ ve kʼo, yawˇ taˆ puiˉ ve, pfuhˇ caˇ puiˉ ve leh chaw hkʼawˇ hkʼawˇ yuˬ gʼa ve yoˬ. 20Ya‸ hkʼaˇ, mvuhˇ naw ma hkʼoˆ lo nawˬ hui ve mawˇ jeˬ shaw hpoˆ taˍ loˬ. Oˇ kaˬ lo yawˇ maˇ taˆ puiˉ, pfuhˇ maˇ caˇ puiˉ leh chaw hkʼawˇ hkʼawˇ yuˬ maˇ gʼa. 21Awˬ lawn kʼo, nawˬ ve mawˇ jeˬ shaw hpoˆ taˍ ve teˇ kaˬ lo nawˬ ve nyi ma htawˇ oˇ kaˬ lo cawˬ tuˬ yoˬ.
Awˬ to ve kawˆ faiˇ
22Mehˆ shiˍ lehˬ, awˬ to ve kawˆ faiˇ yoˬ. Hkʼe te leh, mehˆ shiˍ nyi leh shu hta‸ maˇ chaweh piˇ gaˇ ve kʼo, awˬ to hkʼa peu-eˬ awˬ gʼeuˆ hkʼa deh‸ gʼa tuˬ yoˬ. 23Ya‸ hkʼaˇ nawˬ mehˆ shiˍ nyi leh maˇ piˇ gaˇ ve kʼo, awˬ to hkʼa peu-eˬ naˆ ho‸ kʼai tuˬ yoˬ. Nawˬ ve awˬ gʼeuˆ lehˬ naˆ ho‸ kʼai ve kʼo, naˆ ho‸ ve oˇ ve lehˬ uiˍ jaˇ ve yoˬ.
Gʼuiˬsha leh hpu shi mawˇ jeˬ awˬ lawn
24Chaw teˇ gʼaˇ ka‸ jawˇmawˇ nyiˇ gʼaˇ ve awˬ ceˬ te maˇ gʼa. Awˬ lawn kʼo, teˇ gʼaˇ hta‸ canˇ kʼo, teˇ gʼaˇ hta‸ ha‸ tuˬ yoˬ. Teˇ gʼaˇ hta‸ yawˆ yan kʼo, teˇ gʼaˇ hta‸ maˇ shawˍ maˇ caˆ te tuˬ yoˬ. Nawˬ hui lehˬ Gʼuiˬsha ve awˬ ceˬ ka‸, hpu shi mawˇ jeˬ ve awˬ ceˬ ka‸, teˇ pawˆ tiˉ teˇ geh te maˇ gʼa.
Dawˇ haˍ dawˇ hkiˉ ve awˬ lawn
25Hkʼe te leh, ngaˬ nawˬ hui hta‸ kʼoˆ laˇ ve, hkʼaˬ hkʼe te gʼa caˇ gʼa dawˬ tuˬ, nawˬ hui a sha‸ te‸ ve awˬ pon taˇ dawˇ hkiˉ. Hkʼaˬ hkʼe te gʼa veu‸ gʼa deh tuˬ, nawˬ hui awˬ to awˬ pon ka‸ taˇ dawˇ hkiˉ. A sha‸ te‸ ve teˇ ceuˬ lehˬ, caˇ tuˬ a‸ kehˉ awˬ hpfuhˇ hkʼaˆ leh, awˬ to htawˇ veu‸ kʼaˇ a‸ kehˉ awˬ hpfuhˇ hkʼaˆ ve maˇ heˆ laˇ. 26Mvuhˇ hpe lo poˬ toˇ ve ngaˆ teˇ hpaˍ hta‸ nyi-o. Yawˇ hui lehˬ caˬ maˇ ti, caˬ maˇ gʼeu‸ leh caˬ ciˇ yehˬ awˬ hkʼaw lo caˬ shiˍ maˇ pfuhˇ keu. Ya‸ hkʼaˇ, mvuhˇ naw ma hkʼoˆ chehˇ ve nawˬ hui ve Awˬ pa lehˬ, yawˇ hui hta‸ caˍ piˇ taw piˇ chehˇ ve yoˬ. Nawˬ hui lehˬ, ngaˆ oˇ ve teˇ hpaˍ a‸ kehˉ awˬ hpfuhˇ hkʼaˆ ve maˇ heˆ laˇ. 27Dawˇ hkiˉ ve pa taw, a shu yawˇ ve a sha‸ teˇ jaˆ kʼaw‸ zuhˬ la tuˬ, nawˬ hui awˬ hkʼaw lo hkʼaˬ ve teˇ gʼaˇ te gʼa ve le.
28Veu‸ kʼaˇ awˬ pon nawˬ hui aˬ hto‸ ma te dawˇ hkiˉ ve le. Heh puiˉ hkʼaw lo cawˬ ve shiˍ ya‸ veˆ hkʼaˬ hkʼe te uiˍ la ve hta‸ dawˇ nyi-o. Awˬ cehˬ oˇ ve teˇ hpaˍ lehˬ, kanˉ maˇ te, hkeh ka‸ maˇ gʼawˬ. 29Ya‸ hkʼaˇ, awˬ me‸ awˬ hponˇ uiˍ ve jawˇmawˇ Sawˉla‸monˍ lehˬ, awˬ cehˬ oˇ ve teˇ hpaˍ awˬ hkʼaw lo teˇ cehˬ hkʼe taw ka‸ maˇ gʼa veu‸ maˇ gʼa deh jaw teh‸, ngaˬ nawˬ hui hta‸ kʼoˆ laˇ ve yoˬ. 30Hkʼa deh‸ maˇ yonˍ ve chaw teˇ hpaˍ-oˬ, ya‸ nyi te‸ chehˇ leh shawˉ pawˍ aˬ miˍ hkʼaw baˬ keu tuˬ ve mvuh‸ cehˬ hta‸ Gʼuiˬsha chi taw taw feuˉ piˇ deh piˇ ve kʼo, oˇ ve a‸ kehˉ leuˉ leh nawˬ hui hta‸ feuˉ laˇ deh laˇ tuˬ maˇ heˆ laˇ.
31Hkʼe te leh, hkʼaˬ hkʼe gʼa caˇ tuˬ, hkʼaˬ hkʼe gʼa dawˬ tuˬ, hkʼaˬ hkʼe gʼa veu‸ gʼa deh tuˬ, taˇ dawˇ hkiˉ. 32Awˬ lawn kʼo, buiˇshaˆaˉnaˆ chaw hui chi hkʼa peu-eˬ hta‸ ca chehˇ ve yoˬ. Chi hkʼa peu-eˬ nawˬ hui loˍ ve hta‸ mvuhˇ naw ma hkʼoˆ chehˇ ve nawˬ hui ve Awˬ pa shiˍ taˍ ve yoˬ. 33Gʼuiˬsha ve mvuhˇmiˬ leh yawˇ ve hteˇ ve cawˇ ve teˇ ceuˬ hta‸ awˉ lawˉ ca-o. Chi teˇ hpaˍ hkʼa peu-eˬ htawˇ yawˇ nawˬ hui hta‸ htehˍ laˇ tuˬ yoˬ. 34Hkʼe te leh, shawˉ pawˍ awˬ pon taˇ dawˇ hkiˉ. Awˬ lawn kʼo, shawˉ pawˍ awˬ pon shawˉ pawˍ dawˇ hkiˉ tuˬ cawˬ ve yoˬ. Teˇ nyi pon teˇ nyi dawˇ haˍ tuˬ cawˬ ve lehˬ law‸ chehˇ ve yoˬ.
ที่ได้เลือกล่าสุด:
Ma‸htehˍ li‸ 6: LHBE
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Lahu Bible Edited © Thailand Bible Society and Bible Society of Myanmar, 2010, 2020.