Ma‸htehˍ li‸ 16
16
Hpaˍriˍsehˇ hui awˬ heˆ hta‸ lawˬ ve
1Oˇ htaˇ, Hpaˍriˍsehˇ hui leh Saˍduˆkehˇ hui laˬ leh, yawˇ hta‸ lawˇ nyi leh kʼoˆ ve, Mvuhˇ naw ma ve awˬ heˆ a ciˉ te maˍ laˇ-oˆ teh‸ lawˬ ve yoˬ. 2Yeˍsuˆ kʼoˆ ve, Nawˬ hui lehˬ mvuhˇ hpeu‸ la htaˇ, Mvuhˇ naw ma nyiˉ lehˍ cawˬ ve kʼo, mvuhˇ da‸ tuˬ yoˬ teh‸ kʼoˆ ve yoˬ. 3Peuˬ leh mvuhˇ shawˉ htaˇ, Mvuhˇ naw ma nyiˉ lehˍ cawˬ leh moˬ hoˆ taˍ ve kʼo, ya‸ nyi mvuhˇ haw mvuhˇ yeˬ laˬ tuˬ yoˬ teh‸ nawˬ hui kʼoˆ ve yoˬ. Nawˬ hui lehˬ, mvuhˇ naw ma hta‸ nyi leh shiˍ puiˉ ve htawˇ, awˬ co-e awˬ yanˇ ve awˬ heˆ teˇ hpaˍ hta‸ nawˬ hui fuiˍ da‸ maˇ gʼa. 4Haiˬ leh te ya‸ puiˉ ve chaw teˇ co-e lehˬ, awˬ heˆ hta‸ lawˬ ve yoˬ. Ya‸ hkʼaˇ Yoˇnaˆ ve awˬ heˆ maˇ heˆ kʼo, awˬ kaˍ awˬ nu awˬ heˆ teˇ ceuˬ ka‸ yawˇ hui hta‸ maˇ maˍ piˇ teh‸ kʼoˆ leh,
yawˇ yawˇ hui hta‸ hpaˆ da‸ taˉ leh tawˆ kʼai ve yoˬ.
Hpaˍriˍsehˇ hui leh Saˍduˆkehˇ hui ve diˇ awˬ lawn
5Awˬ la‸ gʼawˇ teˇ hpaˍ gʼuiˬ po coˇ paˉ lo gaˬ ve teˇ yanˇ, hkaoˍmonˇ yuˬ kʼai tuˬ yawˇ hui leunˇ taˉ ve yoˬ. 6Yeˍsuˆ kʼoˆ ve, Hpaˍriˍsehˇ leh Saˍduˆkehˇ hui ve diˇ hta‸ shaˍ ti‸ te leh jaw kʼai-o teh‸, yawˇ hui hta‸ kʼoˆ piˇ ve yoˬ.
7Yawˇ hui lehˬ, Ngaˬ hui hkaoˍmonˇ maˇ yuˬ laˬ ve pa taw chi hkʼe kʼoˆ ve yoˬ teh‸, teˇ gʼaˇ leh teˇ gʼaˇ kʼoˆ da‸ ve yoˬ.
8Yeˍsuˆ awˬ lawn oˇ ve hta‸ shiˍ leh kʼoˆ ve, Hkʼa deh‸ maˇ yonˍ ve chaw teˇ hpaˍ-oˬ, nawˬ hui hkaoˍmonˇ maˇ yuˬ laˬ ve awˬ lawn hta‸ aˬ hto‸ ma pa taw nawˬ hui teˇ gʼaˇ leh teˇ gʼaˇ kʼoˆ da‸ ve le. 9Chi beu‸ hkʼa gaˬ nawˬ hui maˇ dawˇ gaˬ sheˍ leh laˇ. Hkaoˍmonˇ ngaˇ diˬ hta‸ chaw ngaˇ hinˉ gʼaˇ caˇ peuˬ hkʼaw‸ nawˉ, nawˬ hui awˬ leuˉ hkʼaˬ nyiˇ hkʼawˍ lawˇ kʼaw‸ gʼawˆ gʼa ve hta‸ maˇ dawˇ nawˇ leh laˇ. 10Peuˬ leh hkaoˍmonˇ suhˍ diˬ hta‸ chaw awˇ hinˉ gʼaˇ caˇ peuˬ hkʼaw‸ nawˉ, nawˬ hui awˬ leuˉ hkʼaˬ nyiˇ hkʼawˍ lawˇ kʼaw‸ gʼawˆ gʼa ve hta‸ maˇ dawˇ nawˇ leh laˇ. 11Ngaˬ hkaoˍmonˇ awˬ lawn nawˬ hui hta‸ kʼoˆ laˇ ve maˇ heˆ teh‸, aˬ hto‸ ma pa taw nawˬ hui maˇ dawˇ gaˬ ve le. Hpaˍriˍsehˇ leh Saˍduˆkehˇ hui ve diˇ hta‸ jaw kʼai-o teh‸ yawˇ kʼoˆ ve yoˬ.
12Oˇ htaˇ, hkaoˍmonˇ hkʼaw keu ve diˇ hta‸ jaw kʼai-o teh‸ yawˇ kʼoˆ ve maˇ heˆ. Hpaˍriˍsehˇ leh Saˍduˆkehˇ hui maˍ piˇ ve tawˇ hkawˇ hta‸ jaw kʼai-o teh‸ yawˇ kʼoˆ ve hta‸ yawˇ hui shiˍ la ve yoˬ.
Yeˍsuˆ awˬ lawn Peˍtruˆ shaˉ hkiˆ hkanˍ ve
13Yeˍsuˆ lehˬ, Hpiˇliˇpuˆ Kehˉsaˍriˆ mvuhˇmiˬ hpawˇ lo gaˬ ve teˇ yanˇ, yawˇ ve awˬ la‸ gʼawˇ hui hta‸ na nyi ve, Chaw yaˇ ve Yaˇ hpu hta‸ a shu hpeh‸ ve teh‸ shu kʼoˆ ve le.
14Yawˇ hui lehˬ, Chaw teˇ hpaˍ hpaˍ nawˬ hta‸ baˆtiˆsaˬ piˇ paˍ Yoˇhanˬ yoˬ teh‸ kʼoˆ ve, teˇ hpaˍ hpaˍ Eˇliˇya‸ yoˬ teh‸ kʼoˆ ve, teˇ hpaˍ hpaˍ lehˬ, Yeˍraˍmiˆ, maˇ heˆ kʼo Gʼuiˬsha ve tcuh kaˍ paˍ teˇ gʼaˇ gʼaˇ hpeh‸ ve yoˬ teh‸, yawˇ hui kʼoˆ ve yoˬ.
15Yeˍsuˆ yawˇ hui hta‸ kʼaw‸ kʼoˆ piˇ ve, Nawˬ hui teˇ hpaˍ ngaˬ hta‸ a shu hpeh‸ ve teh‸ kʼoˆ ve le.
16Siˉmonˍ Peˍtruˆ kʼaw‸ kʼoˆ ve, Nawˬ lehˬ Hkri‸ teh‸ kʼoˆ ve, te‸ chehˇ ve Gʼuiˬsha ve Yaˇ hpu hpeh‸ ve yoˬ.
17Yeˍsuˆ yawˇ hta‸ kʼaw‸ kʼoˆ piˇ ve, Yoˇnaˆ ve yaˇ paˍ Siˉmonˍ-oˬ, nawˬ lehˬ awˬ bon uiˍ ve yoˬ. Awˬ lawn kʼo, chaw yaˇ nawˬ hta‸ awˬ lawn chi hpeu‸ maˍ laˇ ve maˇ heˆ. Mvuhˇ naw ma hkʼoˆ chehˇ ve ngaˬ ve Awˬ pa nawˬ hta‸ hpeu‸ maˍ laˇ ve yoˬ. 18Peuˬ leh ngaˬ nawˬ hta‸ kʼoˆ laˇ ve, nawˬ lehˬ Peˍtruˆ yoˬ. Haˉ pui chi awˬ hkʼoˆ lo ngaˬ ve awˬ moˍ hta‸ ngaˬ te tuˬ yoˬ. Suh mvuhˇmiˬ ve yehˬ miˉ lehˬ, awˬ moˍ chi hta‸ maˇ gʼaˇ. 19Mvuhˇ naw ma mvuhˇmiˬ ve shawˇ teˇ hpaˍ ngaˬ nawˬ hta‸ pe‸ laˇ tuˬ yoˬ. Miˬguiˬ hkʼoˆ lo nawˬ hkʼa hpeh taˍ ve teˇ hpaˍ hta‸ mvuhˇ naw ma hkʼoˆ lo htawˇ hpeh taˍ tuˬ yoˬ. Miˬguiˬ hkʼoˆ lo nawˬ hkʼa hpui hkʼa ve teˇ hpaˍ hta‸ mvuhˇ naw ma hkʼoˆ lo htawˇ hpui hkʼa tuˬ yoˬ teh‸ kʼoˆ piˇ ve yoˬ.
20Oˇ htaˇ, yawˇ Hkri‸ hpeh‸ ve awˬ lawn chaw teˇ gʼaˇ hta‸ ka‸ maˇ gʼa hto piˇ tuˬ, awˬ la‸ gʼawˇ hui hta‸ yawˇ tawˇ hehnˇ chaweh piˇ taˍ ve yoˬ.
Yeˍsuˆ yawˇ gʼa suh tuˬ ve awˬ lawn hto piˇ ve
21Oˇ ve teˇ yanˇ hta‸ tanˬ leh, Yeˍsuˆ lehˬ Yeˍruˆsaˍlehnˍ venˇ lo gʼa kʼai leh, awˬ hoˉ chaw mawˇ teˇ hpaˍ, paw hkuˇ lonˉ teˇ hpaˍ leh li‸ bvuh‸ paˍ teˇ hpaˍ ve la‸ sheh awˬ hkʼaw lo laiˉ ceuˬ hta‸ gʼa tu‸ gʼa hkanˍ tuˬ ve awˬ lawn maˇ kʼoˆ, yawˇ gʼa suh leh, shehˆ nyi teˇ nyi gaˬ kʼo gʼa kʼaw‸ te‸ tu la tuˬ ve awˬ lawn maˇ kʼoˆ, yawˇ ve awˬ la‸ gʼawˇ hui hta‸ kʼaoˍ maˍ piˇ ve yoˬ.
22Peˍtruˆ yawˇ hta‸ shiˍ veu leh, Jawˇmawˇ-oˬ, chi hkʼe gʼa hpeh‸ tuˬ maˇ heˆ. Chi hkʼe ve teˇ ceuˬ nawˬ hta‸ a ciˉ ka‸ maˇ gʼa heuˆ teh‸ kʼoˆ leh yawˇ hta‸ deˇ ve yoˬ.
23Yeˍsuˆ hpfuhˆ nyi leh Peˍtruˆ hta‸ kʼoˆ piˇ ve, Saˍtanˍ-oˬ, ngaˬ awˬ hkʼaw‸ nawˉ hpawˇ lo jiˆ kʼai-o. Nawˬ lehˬ ngaˬ awˬ pon hkui htiˇ poˬ kuiˬ hpeh‸ ve yoˬ. Awˬ lawn kʼo, nawˬ ve dawˇ hkʼaˇ lehˬ, Gʼuiˬsha ve dawˇ hkʼaˇ maˇ heˆ, chaw yaˇ ve dawˇ hkʼaˇ hpeh‸ ve yoˬ.
24Oˇ htaˇ, Yeˍsuˆ yawˇ ve awˬ la‸ gʼawˇ hui hta‸ kʼoˆ piˇ ve, Chaw teˇ gʼaˇ gʼaˇ ngaˬ hkʼaˇ suh laˬ gaˇ ve kʼo, a shu yawˇ ve a loˍ hta‸ baˬ taˉ leh, a shu yawˇ ve la‸ ka hta‸ taˆ leh ngaˬ hkʼaˇ suh laˬ-o‸. 25Awˬ lawn kʼo, hkʼaˬ ve chaw teˇ gʼaˇ maˇ kʼoˆ, a shu yawˇ ve a sha‸ hta‸ ponˬ piˇ gaˇ ve kʼo, yawˇ ve a sha‸ shonˇ tuˬ yoˬ. Hkʼaˬ ve chaw teˇ gʼaˇ maˇ kʼoˆ, ngaˬ awˬ pon a sha‸ shonˇ ve kʼo, yawˇ ve a sha‸ hta‸ kʼaw‸ gʼa tuˬ yoˬ. 26Awˬ lawn kʼo, chaw teˇ gʼaˇ gʼaˇ miˬguiˬ hkʼa peu-eˬ hta‸ gʼa ve htawˇ, yawˇ ve a sha‸ shonˇ kʼai ve kʼo, yawˇ awˬ pon aˬ hto‸ ma awˬ bon cawˬ tuˬ le. Chaw teˇ gʼaˇ lehˬ, a shu yawˇ ve a sha‸ awˬ pon aˬ hto‸ ma teˇ ceuˬ hta‸ yuˬ leh pa gʼa tuˬ le. 27Awˬ lawn kʼo, chaw yaˇ ve Yaˇ hpu lehˬ, yawˇ Awˬ pa ve awˬ me‸ awˬ hponˇ awˬ hkʼaw lo yawˇ ve mvuhˇ naw ma tcuh yaˇ hui geh teˇ geh laˬ tuˬ yoˬ. Oˇ htaˇ, a shu yawˇ te taˍ ve hkʼe, chaw teˇ gʼaˇ le le hta‸ yawˇ piˇ tuˬ yoˬ. 28Ngaˬ nawˬ hui hta‸ awˬ tehˬ awˬ na kʼoˆ laˇ ve, choˬ kaˬ lo huˉ chehˇ ve chaw teˇ hpaˍ hpaˍ lehˬ, chaw yaˇ ve Yaˇ hpu chi yawˇ ve mvuhˇmiˬ awˬ hkʼaw lo laˬ ve hta‸ maˇ gʼa mawˬ sheˍ ve ceh ceh, maˇ gʼa suh teh‸ kʼoˆ ve yoˬ.
ที่ได้เลือกล่าสุด:
Ma‸htehˍ li‸ 16: LHBE
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Lahu Bible Edited © Thailand Bible Society and Bible Society of Myanmar, 2010, 2020.