Ma‸htehˍ li‸ 15
15
Cha‸ chiˆ tuˬ te gʼa ve awˬ ceuˬ teˇ hpaˍ
1Oˇ htaˇ, Hpaˍriˍsehˇ hui leh li‸ bvuh‸ paˍ teˇ hpaˍ Yeˍruˆsaˍlehnˍ venˇ lo tu leh, Yeˍsuˆ geh laˬ leh kʼoˆ ve, 2Nawˬ ve awˬ la‸ gʼawˇ teˇ hpaˍ lehˬ, aˬ hto‸ ma pa taw chaw mawˇ hui piˇ taˍ ve awˬ liˇ teˇ hpaˍ hta‸ te ya‸ ve le. Awˬ lawn kʼo, yawˇ hui la‸ sheh maˇ tsuhˇ leh caˇ tuˬ caˇ ve yoˬ teh‸ kʼoˆ ve yoˬ.
3Yeˍsuˆ yawˇ hui hta‸ kʼaw‸ kʼoˆ piˇ ve, Nawˬ hui lehˬ, aˬ hto‸ ma te nawˬ hui ve awˬ liˇ hta‸ pa taw Gʼuiˬsha piˇ taˍ ve tawˇ hkawˇ hta‸ te ya‸ ve le. 4Awˬ lawn kʼo Gʼuiˬsha kʼoˆ ve, Nawˬ ve awˬ pa awˬ e hta‸ yawˆ yawˆ yan yan te-o.#Taw 20:12 Peuˬ leh, A shu yawˇ ve awˬ pa awˬ e hta‸ hkʼa mvuhˇ hkʼa na kʼoˆ ve chaw teˇ gʼaˇ lehˬ, awˬ tehˬ awˬ na gʼa suh ve yoˬ teh‸ kʼoˆ taˍ ve yoˬ. #Taw 21:17, Bon 21:18,21 5Ya‸ hkʼaˇ nawˬ hui lehˬ, Hkʼaˬ ve chaw teˇ gʼaˇ maˇ kʼoˆ, a shu yawˇ ve awˬ pa awˬ e hta‸, Ngaˬ geh hkʼa cawˬ ve nawˬ hui gʼa cawˇ ve mawˇ teˇ hpaˍ, Gʼuiˬsha hta‸ tanˇ peuˬ teh‸ kʼoˆ leh, a shu yawˇ ve awˬ pa awˬ e hta‸ yawˆ yan tuˬ maˇ loˍ teh‸ nawˬ hui kʼoˆ ve yoˬ. 6Hkʼe te leh, nawˬ hui ve awˬ liˇ hta‸ pa taw, Gʼuiˬsha piˇ taˍ ve tawˇ hkawˇ hta‸ nawˬ hui te pehˆ ve yoˬ. 7Chaw heˍ paˍ teˇ hpaˍ-oˬ, nawˬ hui awˬ lawn Iˉsaˍyaˆ kʼoˆ taˍ ve tawˇ hkawˇ lehˬ cawˇ jaˇ ve yoˬ. Yawˇ kʼoˆ ve,
8Chaw chi teˇ ceuˬ lehˬ, yawˇ hui ve maw‸ kʼaw ngaˬ hta‸
yawˆ yan ve htawˇ,
yawˇ hui ve nyi ma lehˬ ngaˬ hta‸ vuiˇ da‸ jaˇ ve yoˬ.
9Chaw yaˇ hui teh taˍ ve awˬ liˇ awˬ hkʼaˇ
teˇ hpaˍ hta‸ maˍ piˇ ve pa taw,
yawˇ hui ngaˬ hta‸ oˉ kʼoˍ pui ve lehˬ, tcuhˉ kuiˬ te‸ chiˉ maˇ cawˬ,
teh‸ kʼoˆ ve yoˬ. #Isy 29:13
10Oˇ htaˇ, yawˇ chaw awˬ moˍ lonˉ hta‸ yawˇ geh kuˬ yuˬ leh kʼoˆ piˇ ve, Hkʼa deh‸ na leh shiˍ-o‸. 11Maw‸ kʼaw hkʼaw lo‸-e ve awˬ ceuˬ lehˬ, chaw yaˇ hta‸ cha‸ chiˆ tuˬ maˇ te. Ya‸ hkʼaˇ maw‸ kʼaw hkʼaw tawˆ la ve awˬ ceuˬ lehˬ, chaw yaˇ hta‸ cha‸ chiˆ tuˬ te ve yoˬ teh‸ kʼoˆ ve yoˬ.
12Oˇ htaˇ yawˇ ve awˬ la‸ gʼawˇ teˇ hpaˍ yawˇ geh laˬ leh, Tawˇ chi teˇ hkawˇ hta‸ Hpaˍriˍsehˇ hui gʼa kaˇ htaˇ, yawˇ hui nyi ma zuhˆ ve hta‸ nawˬ shiˍ-aw laˇ teh‸, yawˇ hta‸ kʼoˆ piˇ ve yoˬ.
13Yawˇ kʼaw‸ kʼoˆ ve, Mvuhˇ naw ma hkʼoˆ chehˇ ve ngaˬ ve Awˬ pa maˇ ti taˍ ve awˬ cehˬ teˇ cehˬ le le hta‸ gʼawˬ baˬ tuˬ yoˬ. 14Chaw oˇ ve teˇ hpaˍ chehˇ taˍ piˇ sheˍ. Yawˇ hui mehˆ cuˉ ve ka‸, ya‸ kʼaw maˍ piˇ paˍ te ve yoˬ. Mehˆ cuˉ ve chaw lehˬ, mehˆ cuˉ ve chaw hta‸ ya‸ kʼaw maˍ piˇ ve kʼo, yawˇ huiˉ maˬ nyiˇ gʼaˇ gʼaˇ miˬ kʼoˍ hkʼaw ce lo‸-e tuˬ yoˬ teh‸ kʼoˆ ve yoˬ.
15Oˇ htaˇ Peˍtruˆ lehˬ, Tawˇ pa haˉ chi ve tcuhˉ kuiˬ ngaˬ hui hta‸ kʼaoˍ maˍ laˇ-oˆ teh‸ yawˇ hta‸ kʼoˆ piˇ ve yoˬ.
16Yeˍsuˆ kʼaw‸ kʼoˆ piˇ ve, Chi beu‸ hkʼa gaˬ nawˬ hui htawˇ na maˇ gʼa sheˍ leh laˇ. 17Maw‸ kʼaw hkʼaw lo‸-e ve awˬ ceuˬ hkʼa peu-eˬ lehˬ, gʼoˇ peˬ awˬ hkʼaw gaˬ leh, aˉ kʼa‸ yiˬ kuiˬ lo baˬ taˉ ve hta‸ nawˬ hui maˇ shiˍ laˇ. 18Ya‸ hkʼaˇ, maw‸ kʼaw awˬ hkʼaw lo tawˆ la ve awˬ ceuˬ lehˬ, nyi ma hkʼaw lo tawˆ la ve yoˬ. Chi teˇ hpaˍ lehˬ, chaw yaˇ hta‸ cha‸ chiˆ tuˬ te ve yoˬ. 19Awˬ lawn kʼo, haiˬ ve hta‸ dawˇ ve, chaw hta‸ tiˇ pehˍ ve, haˉ chawˇ haˉ paˆ te ve, guiˇ ya‸ ve, shu mawˇ hkʼawˇ ve, maˇ heˆ heˆ ve shaˉ hkiˆ hkanˍ ve leh, maˇ shawˍ maˇ caˆ kʼoˆ ve, chi teˇ hpaˍ lehˬ nyi ma hkʼaw lo tawˆ la ve yoˬ. 20Chi teˇ hpaˍ lehˬ, chaw hta‸ cha‸ chiˆ tuˬ te ve yoˬ. Ya‸ hkʼaˇ, la‸ sheh maˇ tsuhˇ leh caˇ tuˬ caˇ ve lehˬ, chaw hta‸ cha‸ chiˆ tuˬ te ve maˇ heˆ teh‸ kʼoˆ ve yoˬ.
Hkaˍnanˍ mvuhˇmiˬ hkʼaw chehˇ ve yaˇ miˇ teˇ gʼaˇ yonˍ ve awˬ lawn
21Yeˍsuˆ oˇ kaˬ tawˆ kʼai leh, Tuˇruˆ leh Siˉdonˍ mvuhˇmiˬ hpawˇ lo kʼai ve yoˬ. 22Oˇ htaˇ, Hkaˍnanˍ mvuhˇmiˬ hkʼaw chehˇ ve yaˇ miˇ teˇ gʼaˇ lehˬ, mvuhˇ miˬ oˇ ve teˇ tawn awˬ hkʼaw lo tawˆ la leh, Daˍviˆ ve Yaˇ hpu Jawˇmawˇ-oˬ, ngaˬ hta‸ ha kʼaˉ laˇ-oˆ. Ngaˬ ve yaˇ miˇ neˇ geh leh gʼa tu‸ gʼa hkanˍ jaˇ ve yoˬ teh‸, gʼaˇ hte‸ kuˬ ve yoˬ.
23Ya‸ hkʼaˇ, Yeˍsuˆ tawˇ teˇ peu-eˬ ka‸ maˇ kʼaw‸ yaw piˇ. Yawˇ ve awˬ la‸ gʼawˇ teˇ hpaˍ yawˇ geh laˬ leh kʼoˆ ve, Yaˇ miˇ chi ngaˬ hui awˬ hkʼaˇ suh gʼa‸ laˬ leh kuˬ chehˇ ve pa taw, yawˇ hta‸ kʼo‸-e tcuh-o teh‸ lawˬ hkawˉ ve yoˬ.
24Yeˍsuˆ kʼoˆ ve, Iˉsaˍreˍlaˆ teˇ yehˬ awˬ hkʼaw lo mehˉ kʼai peuˬ ve yawˬ teˇ hpaˍ geh laˬ tuˬ awˬ pon ceh Gʼuiˬsha ngaˬ hta‸ peu laˇ ve yoˬ teh‸ kʼaw‸ kʼoˆ piˇ ve yoˬ.
25Yaˇ miˇ oˇ ve laˬ leh yawˇ hta‸ oˉ kʼoˍ pui leh, Jawˇmawˇ-oˬ, ngaˬ hta‸ ga laˇ-oˆ teh‸ kʼoˆ ve yoˬ.
26Yeˍsuˆ kʼoˆ ve, Yaˇ ehˉ teˇ hpaˍ ve caˇ tuˬ hta‸ yuˬ leh hpuiˇ teˇ hpaˍ hta‸ caˍ piˇ maˇ cawˇ teh‸ kʼaw‸ kʼoˆ piˇ ve yoˬ.
27Yaˇ miˇ kʼaw‸ kʼoˆ ve, Jawˇmawˇ-oˬ, nawˬ kʼoˆ ve lehˬ cawˇ ve yoˬ. Ya‸ hkʼaˇ, hpuiˇ teˇ hpaˍ lehˬ, awˬ shehˍ hpaˇ ve hpui lawˇ hawˉ sheˆ taˍ ve caˇ tuˬ teˇ hpaˍ hta‸ gʼawˆ caˇ ve yoˬ teh‸ kʼoˆ ve yoˬ.
28Oˇ htaˇ Yeˍsuˆ lehˬ, Yaˇ miˇ-oˬ, nawˬ yonˍ ve lehˬ uiˍ jaˇ ve yoˬ. Nawˬ heuˆ gaˇ ve hkʼe nawˬ awˬ pon hpeh‸ la piˇ-oˆ teh‸ kʼoˆ ve yoˬ. Oˇ teˇ hkui yawˇ ve yaˇ miˇ na-e la ve yoˬ.
Chaw naˬ laiˉ gʼaˇ hta‸ gu na-e piˇ ve
29Yeˍsuˆ oˇ kaˬ lo tawˆ kʼai leh Gaˍliˍlehˇ gʼuiˬ po paˇ lo kʼai ve yoˬ. Oˇ htaˇ, yawˇ hkʼaw hkʼoˆ lo taˆ-e leh mui taˍ ve yoˬ. 30Chaw awˬ moˍ lonˉ teˇ hpaˍ yawˇ geh laˬ leh, hkui luˬ la‸ luˬ ve chaw, mehˆ cuˉ ve chaw, kʼaˍ ve chaw leh awˬ kaˍ awˬ nu chaw naˬ laiˉ gʼaˇ hta‸ htawˇ yawˇ hui shiˍ veu taˆ veu laˇ leh, yawˇ hkui paˇ lo teh taˍ ve yoˬ. Oˇ htaˇ, yawˇ yawˇ hui hta‸ gu na-e piˇ ve yoˬ. 31Hkʼe te leh, chaw kʼaˍ teˇ hpaˍ tawˇ yaw gʼa la ve, hkui luˬ la‸ luˬ ve chaw teˇ hpaˍ kʼaw‸ da‸ la leh ya‸ kʼaw juˇ gʼa la ve, mehˆ cuˉ ve chaw hui mehˆ mawˬ la ve, chi teˇ hpaˍ hta‸ chaw awˬ moˍ lonˉ gʼa mawˬ ve teˇ yanˇ, yawˇ hui anˇ jaˇ leh Iˉsaˍreˍlaˆ ve Gʼuiˬsha hta‸ chiˇ uiˍ chiˇ mvuh piˇ ve yoˬ.
Chaw awˇ hinˉ gʼaˇ hta‸ caˍ piˇ ve
32Oˇ htaˇ, Yeˍsuˆ yawˇ ve awˬ la‸ gʼawˇ hui hta‸ yawˇ geh kuˬ yuˬ leh kʼoˆ piˇ ve, Chaw awˬ moˍ lonˉ chi hta‸ ngaˬ ha kʼaˉ ve yoˬ. Awˬ lawn kʼo, yawˇ hui ngaˬ geh chehˇ ve shehˆ nyi gaˬ peuˬ leh, caˇ tuˬ te‸ chiˉ maˇ cawˬ. Yawˇ hui awˍ meu‸ jehˇ chehˇ ve teˇ yanˇ, ngaˬ yawˇ hui hta‸ maˇ kʼo‸-e tcuh gaˇ. Kʼo‸-e tcuh ve kʼo, ya‸ kʼaw kʼaˉ lo yawˇ hui gʼaˇ nuˇ jaˇ tuˬ yoˬ teh‸ kʼoˆ ve yoˬ.
33Awˬ la‸ gʼawˇ teˇ hpaˍ lehˬ, Chaw chi ma ve hkʼa bvuhˆ gʼa caˇ tuˬ ve, choˬ kaˬ heh puiˉ hkʼaw lo hkaoˍ monˇ hkʼaˬ lo ca gʼa tuˬ le teh‸, yawˇ hta‸ kʼoˆ piˇ ve yoˬ.
34Yeˍsuˆ lehˬ, Nawˬ hui geh hkaoˍmonˇ hkʼaˬ nyiˇ diˬ cawˬ le teh‸, yawˇ hui hta‸ na nyi htaˇ, Hkaoˍmonˇ suhˍ diˬ leh ngaˇ ehˉ a ciˉ cawˬ ve yoˬ teh‸, yawˇ hui kʼaw‸ kʼoˆ piˇ ve yoˬ.
35Oˇ htaˇ, chaw awˬ moˍ lonˉ miˬ chaˇ hkʼoˆ mui tuˬ yawˇ tawˇ piˇ ve yoˬ. 36Hkaoˍmonˇ oˇ ve suhˍ diˬ leh ngaˇ teˇ hpaˍ htaˬ yawˇ yuˬ leh, bon hta‸ chiˇ mvuh peuˬ hkʼaw‸ nawˉ hkʼeh‸ ve yoˬ. Peuˬ leh awˬ la‸ gʼawˇ teˇ hpaˍ hta‸ piˇ leh, yawˇ hui htawˇ chaw awˬ moˍ lonˉ teˇ hpaˍ hta‸ pehˬ piˇ ve yoˬ. 37Yawˇ hui hkʼa peu-eˬ hkʼa bvuhˆ caˇ peuˬ hkʼaw‸ nawˉ, caˇ leuˉ ve teˇ hpaˍ hta‸ kʼaw‸ gʼawˆ ve teˇ yanˇ, suhˍ hkʼawˍ lawˇ hkʼa biˇ gʼa ve yoˬ. 38Caˇ ve chaw teˇ hpaˍ lehˬ, yaˇ miˇ leh yaˇ ehˉ teˇ hpaˍ hta‸ maˇ shawˍ kʼo, hawˉ hkʼaˆ chaw mawˇ tiˉ awˇ hinˉ gʼaˇ cawˬ ve yoˬ.
39Oˇ htaˇ chaw awˬ moˍ lonˉ oˇ ve teˇ hpaˍ hta‸ kʼo‸-e tcuh peuˬ hkʼaw‸ nawˉ, yawˇ haw lo‸ kʼoˍ ciˇ leh Maˍgaˍdanˍ mvuhˇmiˬ lo kʼai ve yoˬ.
ที่ได้เลือกล่าสุด:
Ma‸htehˍ li‸ 15: LHBE
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Lahu Bible Edited © Thailand Bible Society and Bible Society of Myanmar, 2010, 2020.